No Sea Ansha

PRINCIPIO BIBLICO: “Stop di ta ansha pa boso bida.”—Mateo 6:25.

Kico esaki ta encera? Hesus a bisa e palabranan aki den su Sermon Riba Sero. Di acuerdo cu un diccionario di Bijbel, e verbo Griego cu a ser traduci como “ansha” por referi na “e reaccion natural di un hende debi na pobreza, hamber y otro problemanan cu e ta enfrenta den su bida diario.” Hopi biaha hende ta sinti nan mes ansha pa cosnan cu lo por sosode den futuro. Ta normal y ta na su luga cu nos ta preocupa tocante e necesidadnan material y bienestar di nos sernan keri. (Filipensenan 2:20) Pero ora Hesus a bisa pa “no sea nunca ansha”, e tabata conseha su siguidornan pa evita di preocupa demasiado, ya cu ora un hende tin mucho miedo di loke por sosode mañan, esey por kita su goso den bida awe.—Mateo 6:31, 34.

E conseho ey ta practico awe? Ta sabi di nos parti pa aplica e conseho di Hesus. Dicon? Wel, algun obra di referencia ta bisa cu ora un hende ta preocupa hopi, su sistema nervioso ta keda constantemente activo, y e condicion ey “por causa problema di salud, manera ulcera, problema cu curason y asma.”

Hesus a duna un bon motibo pakico nos no mester ta demasiado preocupa: E no tin sentido. Hesus a puntra: “Cua di boso, ni maske cuanto e ansha, por rek su bida un crenchi?” (Mateo 6:27) Si nos enfoca riba nos preocupacionnan, nos lo no mehora ni alarga nos bida cu ni un fraccion di un seconde. Ademas, hopi biaha, cosnan ta bay mihor di loke nos a imagina nos mes. Un experto a bisa: “Preocupa cu futuro ta tempo perdi, y hopi biaha futuro no ta mes malo cu nos a pensa.”

Con nos por evita ansiedad? Prome, confia den Dios. Si Dios ta percura cuminda pa parha y ta bisti e flornan cu bunitesa, lo e no percura pa e necesidadnan di hende cu ta pone su adoracion na prome luga den nan bida? (Mateo 6:25, 26, 28-30) Di dos, no preocupa demasiado cu e dia di mañan. Hesus a bisa: “No sea nunca ansha pa e dia di mañan, pasobra e dia di mañan lo tin su mes inkietudnan.” Bo no ta di acuerdo cu “cada dia tin su mes problemanan”?—Mateo 6:34.

Ora nos ta aplica e conseho di Hesus, nos lo evita problema fisico y experencia loke Bijbel ta yama “e paz di Dios.”—Filipensenan 4:6, 7.