Mateo 6:34—No Preocupa pa e Dia di Mañan

“No sea nunca ansha pa e dia di mañan, pasobra e dia di mañan lo tin su mes inkietudnan. Cada dia tin su mes problemanan.”—Mateo 6:34, Traduccion di Mundo Nobo.

“No preokupá pa e dia di mañan, pasobra e dia di mañan ta preokupá pa su mes problemanan. Kada dia tin sufisiente problema di su mes.”—Mateo 6:34, Beibel na papiamentu koriente.

Splicacion di Mateo 6:34

Ora Hesus a papia e palabranan ey, e kier a laga su oyentenan compronde cu nan no mester ta demasiado preocupa, of mucho ansha, tocante problema cu lo por surgi den futuro. Na luga di preocupa, lo ta mihor pa trata cu problema un dia a la bes.

Hesus no tabata kiermen cu nos no mester pensa riba e dia di mañan of keda sin plania pa futuro. (Proverbionan 21:5) Mas bien, e kier a yuda nos pa nos no ta demasiado preocupa, of ansha, tocante loke kisas por sosode mañan. E ansha ey por kita nos goso y stroba nos di concentra riba loke nos tin cu haci. Keda preocupa tocante e problemanan di mañan, no ta yuda nos soluciona nan. Hopi biaha, loke ta preocupa nos ni sikiera ta sosode, of si e pasa mes, e no ta dje grave ey manera nos a pensa.

Contexto di Mateo 6:34

E palabranan aki di Hesus ta parti di su famoso Sermon Riba Sero cu nos ta haya na Mateo capitulo 5 pa 7. Den e discurso ey, Hesus a splica cu demasiado preocupacion no ta haci nos mas feliz ni ta rek nos bida. (Mateo 6:27) El a bisa tambe cu ora nos ta pone Dios prome den nos bida, nos no tin nodi ta demasiado preocupa pa e cosnan di mañan. Dios ta cuida mata y bestia, pues sigur lo e cuida tambe hende cu ta sirbie.—Mateo 6:25, 26, 28-33.