Con pa Mehora Nos Sirbishi: Nos Manera di Contesta un Persona Rabia

Dicon Esey Ta Importante: Mayoria di hende cu nos topa den sirbishi ta amabel. Sinembargo, Hesus a profetisa cu algun hende lo odia nos. (Juan 17:14) Pesey, nos no mester keda sorprendi si nos topa un persona rabia den sirbishi. Ora nos haya nos cu un situacion asina, nos mester contesta na un manera cu ta laga Jehova, esun cu nos ta representa, keda contento. (Rom. 12:17-21; 1 Ped. 3:15) Nos contesta suave por evita cu cos por sali for di man. Ademas, esey por ta un testimonio pa tanto e persona como esnan cu ta mira, y esaki por pone cu nan lo ta mas dispuesto pa scucha ora un testigo di Jehova pasa un otro biaha.—2 Cor. 6:3.

Con pa Haci Esaki:

Keda trankil y amigabel. Di e manera ey bo por baha e tension. No pensa cu ta cu bo e persona ta rabia. (Ecl. 7:9) Kisas e tin un problema of bo a bin na un mal momento. Y hasta si ta nos mensahe ta pon’e cunsumi, mayoria di biaha esey ta debi cu e ta malinforma.—2 Cor. 4:4.
Contesta na un manera suave. (Prov. 15:1) Bo a lant’e for di soño of strob’e cu su cosnan di haci? Aunke nos no ta pidi despensa pa e echo cu nos ta cumpli cu e trabou di predica, nos por pidi despensa si pa e echo cu nos a bin na un mal momento. Si e persona ta rabia debi na rumornan falso cu el a tende di nos, bo por bis’e: “Mi por compronde dicon bo ta rabia. Pero, e informacion cu nan a duna bo no ta corecto. Mi por splica bo dicon?” Awor, kico si e no ta di acuerdo cu un di nos creencianan, kisas tocante expulsion of sanger? Bo por contest’e: “Mi ta compronde. Tin mas hende cu e mesun preocupacion. Pero bo tabata sa cu e siñansa ey ta basa riba Bijbel? Bo ta permiti mi mustra bo esey?”
Si e persona ta hopi rabia, ta mihor pa nos bay sin bisa nada. Si e bisa cu e no kier pa testigonan di Jehova bin na su cas, bis’e cu nos lo respeta esey.

Purba di Haci Esaki Durante e Luna Aki:

Tene sesionnan di practica durante bo estudio di famia.
Despues di a papia cu un persona rabia den sirbishi, puntra bo compañero con bo por a trata cu e situacion na un mihor manera.