Observando e Mundu
E Plaga di Malesanan Contagioso
Un tercer parti dje 52 miyon mortonan cu a sosodé aña pasá tabata debí na malesanan contagioso, segun e Organisacion Mundial di Salú (OMS). Mayoria dje aproximadamente 17 miyon cu a muri tabata muchanan chikitu. Segun The World Health Report 1996, publicá dor di OMS, por lo ménos 30 malesa contagioso nobo a ser identificá den e último 20 añanan, incluyendo e vírus di Ebola i AIDS. Maske cu ta costa poco placa pa prevení i trata malesanan grandi manera tuberculósis, cólera i malaria, nan a cuminsá aumentá atrobe i bira cada bes mas resistente na remedi. E motibu, segun e raport, ta “e uso incontrolá i incorecto di antibióticanan,” huntu cu otro factornan, manera biahamentu internacional i crecementu di poblacion den áreanan tropical cu ta pestá cu sangura.
Confesionarionan den Libreria
Un asociacion católico italiano a dicidí di instalá confesionarionan den su cadena di librerianan religioso, cada un completo cu un pastor pa confesá cerca dje. E experimento a cuminsá na Milan. Tur diarason den un libreria den stad, tabatin un pastor disponibel pa “tur cu kier mira un pastor—pero no den un misa—pa pidi pa conseho spiritual, of asta pa confesá,” e gerente dje tienda a bisa. El a agregá: “E promé resultadonan tabata muchu mas mihó cu asta nos expectativanan di mas optimista.” Pakico e iniciativa? “Pa compensá e menguamentu den e sacramento di penitencia,” e corant italiano La Repubblica ta splica.
Nada Ta Bai Perdí
Despues cu tuma e rond di 270 kilo di carni, kico ta sosodé cu e resto dje baca? Algun dje órganonan interno, manera e schildklier, páncreas, pulmonnan, baso, glándula adrenal, ovarionan, hipofise i e hal dje higra i e halblaas, ta ser usá pa traha remedi. Colágen ta ser extraé dje wesunan, hoefnan i cueru, pa usa den hidratante i locion. Kraakbeen i vet ta terminá den componentenan manera butyl stearate, PEG-150 distearate i glycol stearate usá den hopi makiahe i productonan pa cabei. Mayoria habon ta trahá di vetnan di animal. I e wesu i hoefnan ta ser mulá pa traha gelatina cu ta ser usá den cientos di productonan di cuminda, incluyendo ijscream, algun mangel i hopi productonan “sin vet.” Tin partinan ta terminá tambe den un gran variedad di producto manera krijt, lusafé, wax pa flur, linoli, antivries, cement, cos pa mata mal yerba, celofan, papel fotográfico, artículonan di deporte, furu i prendanan di bisti. E prijs mas haltu ta ser pagá pa e piedranan di gal—US$600 pa 28,4 gram! Comerciantenan di Lehano Oriente ta cumpra nan pa usa como afrodisiaco.
Tragedia di Parto
Rond di 585.000 hende muher ta muri tur aña durante embaraso of ora di duna lus, un investigacion nobo extenso, conducí dor di UNICEF (Fondo di Nacionnan Uní pa Mucha) ta bisa. Segun e raport The Progress of Nations 1996, hopi dje tragedia di parto ta prevenibel. E ta declará: “P’e mayor parti, esaki ta morto, no di esnan malu, of hopi bieu of hopi yong, sino di muhernan salú den nan flor di bida.” Rond di 75.000 muher ta muri tur aña pa motibu di aborto mal hací; 40.000 como resultado di parto obstruí; 100.000 di venenamentu di sanger; 75.000 di daño na celebro i na nier pa motibu di eclampsia (steipi i preshon haltu di sanger den último parti di embaraso); i mas di 140.000 pa motibu di hemoragia. Ta ser bisá cu e scarcedad di cuido di partera den hopi pais ta mayoria biaha responsabel. Funcionarionan di UNICEF ta bisa cu e datonan ta indicá cu 1 di cada 35 hende muher na Sur Asia i 1 di cada 13 den paisnan africano na rand di Sahara ta muri di cosnan relacioná cu embaraso i parto, compará cu 1 di cada 7.300 na Cánada, 1 di cada 3.300 na Merca i 1 di cada 3.200 na Europa. E cifranan dje investigacion nobo ta casi 20 porciento mas haltu cu e cálculo anterior di rond di 500.000 morto pa aña.