E Masacre na Port Arthur—Pakico El A Sosodé?

E Masacre na Port Arthur—Pakico El A Sosodé?

DJE CORESPONSAL DI SPIERTA! NA AUSTRALIA

DIADOMINGO atardi, 28 di april, 1996, e weer tabata hopi agradabel na Port Arthur Historical Site, un centro turístico popular na Tasmania, Australia. E Broad Arrow Café tabata yen-yen di hende comiendo nan almuerso. Rond di 1:30 p.m., un yoncuman blond di 28 aña di edad cu a caba di come riba e terasa pafó dje refreskeria a drenta e edificio i a cuminsá tira.

Clientenan a kita cai morto den nan stul, cu cuminda ainda den nan boca. Polis a bisa cu tabata “manera e matansa di un campo di bataya.” Ora e homber armá a kere cu tur tabata morto—el a mata 20—el a cana sali trankil di dje bai pafó. Den un par di seconde, el a cometé mas asesinato cu a sosodé durante e cuater añanan anterior den henter e estado insular di Tasmania!

Sin embargo, e homber armá a sigui cu su atake di matamentu, ehecutando víctimanan sistemáticamente. Por ehempel, riba caminda pa sali dje sitio histórico, el a mira Nanett Mikac cu su yu muhernan chikitu. El a mata Nanett i su yu di tres aña. Anto, segun cu esun di seis aña a purba scapa, el a bai su tras i a tir’é mata ora e mucha a bùk sconde tras di un palu.

Despues di esei, n’e hoki pa paga tol n’e salida dje sitio histórico, e homber armá a mata tres ocupante di un (auto) BMW i a bai cu e auto. Un poco mas leu, el a topa cu un pareha den un otro auto. El a forsa e homber drenta den e baul dje BMW i a mata e compañera dje homber. Siguientemente, el a stuur bai un distancia corticu pa e posada Seascape Cottage—yegando ei rond di 2:00 p.m. Einan, el a cende e BMW na candela anto a tene e homber cu el a secuestrá i e pareha di mas edad cu tabata doñonan dje posada como rehen. El a mata 12 hende desde cu el a di sali for dje refreskeria, subiendo e cantidad di mortonan na 32. Hopi otronan a ser heridá.

Predicacion Diadomingo Atardi

Miéntras tantu, Jenny Ziegler i su famia, dje congregacion Port Arthur di Testigonan di Jehova, a reuní 1:30 p.m. pa prepará pa participá den e ministerio. E famia a bai e ora ei den direccion di Port Arthur Historical Site. Jenny tabata kier a bishitá David Martin, e doño amical dje posada Seascape Cottage. Anteriormente, Jenny huntu cu un otro ruman muher cristian a disfrutá di un consideracion bíblico cuné.

Poco despues di 2:00 p.m., segun cu Jenny, su esposo i nan yunan tabata acercando e posada, nan a ripará cu huma tabata saliendo for di un auto na candela riba e yerba. Agentenan policial a stop nan i a bisa nan pa regresá di unda nan a bin. “Nos a cuminsá sinti manera algu lo bai pasa,” Jenny a comentá. “E camindanan tabata abnormalmente bandoná.”

Sin embargo, ainda sin sa cu algu tabata hopi malu, e famia a sali for dje autopista pa bai na un playa chikitu pa sigui cu nan actividad di predicá manera nan planea. Ei, tur cos a parce normal: Muchanan tabata landa, hendenan tabata cana a lo largu dje cabamentu leu dje playa, i un pareha di edad tabata sintá den nan auto ta lesa. “Mi esposo a acercá nan i nan a cuminsá un combersacion agradabel,” Jenny a conta. “El a informá nan cu a parce cu tin un problema riba e autopista i a sugerí nan pa ora nan ta bai for dje playa, nan bai via un otro ruta. Ami a papia un ratu cu un yoncuman, i poco despues di esei nos a bai.”

Famia Ziegler a sigui bai riba e caminda pa Port Arthur Historical Site. “Aki, blokeando e entrada dje sitio,” Jenny a splica, “tabatin vários auto. Mas despues nos a haña sa cu nan a blokea for di bista e curpanan di hende cu a ser tirá mata. Un homber a informá nos: ‘Un tercio a basha bala pa loco cu un scopet; kisas tin 15 morto!’ Nan a consehá nos pa bai inmediatamente.”

Un Fin Horibel

E prueba penoso tabata leu di terminá, manera Jenny a remarcá: “E biahe pa cas tabata caba cu nos nervio, pasobra nos no tabata sa na unda e homber armá tabata. Cada biaha cu nos a topa un otro auto riba caminda, nos tabata puntra nos mes si e tabata den dje. Asta ora nos a yega cas sano i salbo, nos a sinti nos vulnerabel, ya cu nos ta biba den un área isolá caminda un hende cu conocé e tereno local lo por a sconde fácilmente. Siendo cu nos rumannan cristian tabata sa unda nos a bai e atardi ei, nos a cuminsá haña yamadanan di telefon unbes pa chek si nos tabata OK.

“Segun cu nos a pensa riba loke a sosodé, nos a realisá cu si nos a yega pa bishitá e doño dje posada un par di minuut mas promé, nos por tabata entre esnan cu a ser matá. E idea cu e asesino kisas asta a wak nos dor di su rifle ora nos tabata papiando cu e polisnan einan a haci nos curpa coge ril!”

Mas cu 200 agente policial finalmente a rondoná e posada e diadomingo anochi ei, kedando di bùk abou pa motibu cu de bes en cuando e homber armá tabata basha bala riba nan. Aparentemente el a exigí un helicopter pa haci su escape, pero durante e anochi e negociacionnan a fracasá. Dialuna, rond di 8:00 a.m., a mira huma sali for dje cas. E homber armá a sali bibu, aunke el a sufri kemadura. E tres rehennan, incluyendo e doño dje posada cu famia Ziegler a purba bishitá, a ser hañá despues morto den loke a resta dje cas kimá, hisando e cantidad di mortonan na 35.

Pakico El A Sosodé?

Rond di shete siman promé, dia 13 di mart, un homber armá na Dunblane, Escocia, a drenta e gymzaal di un scol i a tira 16 mucha chikitu i nan maestra mata. Di acuerdo cu un lema ingles bieu di noticia di television, “If it bleeds, it leads” (Suceso sangriento ta bira noticia principal), e incidente aki a bira un suceso di noticia internacional. Algun experto di conducta humano a duna e posibilidad cu e homber armá australiano por tabata tratando di surpasá e cantidad di morto dje asesinato na Dunblane. Ta significante cu na Merca, e asina yamá asesino zodíaco, kende pa añanan a terorisá New York City, a bisa cu el purba surpasá otro asesinonan cu el a lesa di dje.

Un otro factor cu hopi hende ta bisa ta contribuí n’e epidemia di matansanan ta e sex i violencia cu películanan i videonan ta mustra. Herald Sun di Australia ta informá: “Un total di 2000 video violento i pornográfico a ser confiscá for dje cas di Martin Bryant, e supuesto asesino en masa di Port Arthur. . . . E descubrimentu dje videonan scondí a bin na un momento cu a bai na enfocá riba e rol di películanan violento den e masacre na Port Arthur.” Di igual manera, Daily News di New York a informá cu “tabatin dos caha cu videonan pornográfico riba e cam’i un persona” dje asesino zodíaco cu a confesá.

Ora e masacrenan di Port Arthur a bira conocí, algun stacion di television a core cambia nan programacion. Despues di esei, e columnista Penelope Layland a skirbi e artículo “E Hipocresia di Television pa cu Violencia i Pena” i a remarcá: “Den un sentido, kitando e películanan violento ei tabata manera un minuut di silencio pa bista di hende. Mañan, otro siman, otro luna, tur cos lo sigui mescos.”

Sin embargo, pa haña un mihó bista den e motibu pa cua violencia ta asina prevalente awe, nos tin cu acudí na e Bijbel. Hopi tempu pasá el a profetisá cu “den e último dianan lo presentá tempu crítico, duru pa trata cuné. Pasobra hende lo ta . . . sin dominio propio, feros, sin amor pa bondad.” (2 Timoteo 3:1-5) Por lo tantu, e aumento den violencia awendia solamente ta duna mas evidencia cu nos ta den e último dianan i cu e fin dje sistema di cosnan aki ta cerca.—Mateo 24:3-14.

Manera hopi hende por sospechá, e demoñonan—forsanan spiritual malbado invisibel—ta enbolbí den e epidemia di comportacion salbahe i inhumano. (Efesionan 6:12) Despues di describí con Satanas e Diabel i su demoñonan ta ser sacá for di shelu, Bijbel ta bisa: “Ai dje tera i di laman, pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” (Revelacion 12:7-9, 12) Nos ta bibando awor aki den e periodo ei di “ai,” i Satanas i su demoñonan ta usando cualkier medio cu nan por pa instigá hende pa cometé mas actonan di violencia.

Sin embargo, pronto Satanas, su demoñonan i nan mundu malbado lo disparcé, i e gobernacion di Dios su Reino lo introducí un mundu nobo di husticia. (Daniel 2:44; Mateo 6:9, 10; 2 Pedro 3:13; 1 Juan 2:17; Revelacion 21:3, 4) Jenny a remarcá: “N’e momentonan aki, nos ta ‘yorando cu hende cu ta yora,’ pero ta nos deseo pa compartí nos speransa di Reino cu esnan den e comunidad cu a haña un golpi fuerte dor dje tragedia aki.”—Romanonan 12:15.

[Plachi na página 17]

Broad Arrow Café, caminda e masacre a cuminsá

[Mapa Rekonosementu na página 16]