Bon Condicion te na Extremo

SEGUN The Toronto Star, “un resultado abnormal dje movementu di fitness, ta hendenan obsesioná pa haci ehercicio den exceso.” Star ta informá cu tantu hende homber como hende muher ta padecé di esaki. Hende homber lo por haci ehercicio den exceso pa sinti nan hóben atrobe, algun dokter i terapeuta ta bisa. Pero por lo general e motibunan fundamental pakico hende muher ta haci di mas ehercicio ta cu nan tin un imágen trocí di nan curpa i trastorno den comementu.

Hopi hende ta cuminsá haci ehercicio pa sinti nan bon i haña un mihó curpa, pero cu tempu ta cuminsá haci di mas djis pa satisfacé e necesidad pa haci ehercicio. Richard Suinn, un sicólogo di deporte i consehero pa vários tim olímpico, ta afirmá cu ehercicio den exceso ta bisto ora e ta “basá riba un compromiso emocional i no djis riba un programa di ehercicio.” Ora di trata cu e problema aki, dokter i terapeutanan ta purba averiguá ki impacto e ehercicio ei tin riba e bida dje pashentnan. Si nan ta core pariba pabou pa mantené un carera exigente i tambe un hogar cu yu, di mas ehercicio lo afectá nan bienestar. Segun Dr. Thomas Schwenk, profesor di medicina familiar, “nan por wel ta físicamente salú, pero nan tin ruptura social, ruptura na trabou i desunion den famia.”

Star ta mencioná algun señal di advertencia relacioná cu adictonan di ehercicio: ‘Nan ta scoge ehercicionan cu nan por haci nan so, manera core baiskel, landa, djog of hisa peso; nan no ta flexibel pa cu e orario di ehercicio; nan ta kere cu ehercicio ta un obligacion i cu ta insoportabel pa falt’e; i otro aspectonan di bida personal ta bai atras.’

Maske expertonan riba e tereno di fitness ta reconocé e beneficionan di haci ehercicio den forma moderá, nan ta spierta tambe pa e efectonan perhudicial di haci ehercicio den exceso.—1 Timoteo 4:8.