Con Bo Por Protehá Bo Yunan?

DESPUES di a bai un scol den su bario pa añanan largu, Wernera a cuminsá bai un scol mas haltu huntu cu rond di 3.000 otro hóben na São Paulo, Brazil. Pa promé bes, el a mira otro alumnonan ta bende i usa droga. Dor cu e tabata di un estatura corticu, no a tarda muchu cu alumnonan mas bieu a fors’é pasa den ritonan degradante i riscante p’e bira miembro di nan grupo.

Eva, ruman muher di Werner, tambe tabatin problema. Dor cu e kier a haci su best, el a studia asina tantu te cu el a haña un ‘inzinking.’ Mescos cu otro adolesentenan, Werner cu Eva tabatin mester di tantu proteccion físico como emocional. Ki clase di yudansa bo yunan tin mester di dje? Con bo por prepará nan p’e bida di adulto? Sí, ki futuro bo kier pa bo yunan?

Nan Tin Mester di Mas cu e Necesidadnan Básico

Pensa un ratu riba e desafio cu mayornan ta enfrentá pa protehá nan yunan awe. Pa motibu di un deterioro den e calidad di bida di famia i un aumento di pobresa, den hopi pais e cantidad di mucha cu ta biba riba caya ta aumentando. Muchanan ta resultá den e proceso laboral dor cu nan no ta ser protehá contra explotacion. Uso di droga tambe ta destruí hopi mucha. Por ehempel, ora un cierto tiener brazileño a bira drogadicto, pas a disparcé for di su cas. Ademas dje tension emocional cu su mayornan a experenciá, nan tabatin cu lucha pa financiá su recuperacion, i narcotraficantenan sin misericordia tabata bini na nan porta pa exigí pago.

Sin embargo, apesar dje presionnan di bida, hopi mayor ta sigui lucha pa duna nan yunan no solamente cuminda, paña i dak, sino tambe proteccion contra violencia, uso di droga i otro problemanan. Esaki ta un esfuerso encomendabel, pero e ta suficiente? Kico di proteccion contra daño emocional i spiritual? Hopi hende ta realisá cu ser un bon mayor ta encerá enfrentá desafionan cu tin di haber cu e tipo di amigu i recreo cu nan yunan ta scoge. Pero, con mayornan por evitá di sea protehá nan yunan di mas of bira muchu permisivo cu nan? Bo ta ser invitá pa considerá e contestanan hañá den e siguiente artículo.

[Nota]