Ki Futuro Bo Kier pa Bo Yunan?

BO TA considerá bo yunan como un herencia di gran balor? (Salmo 127:3) Of bo ta mira criamentu di yu como un carga financiero sin ningun garantia di éxito? En bes di trece ganashi, lantamentu di yu ta costa placa te dia nan por mantené nan mes. Mescos cu manehá un fortuna heredá ta rekerí bon planeamentu, ser un bon mayor tambe ta exigí esei.

Mayornan cu ta interesá den nan yunan kier duna nan un bon comienso den bida. Aunke cosnan malu i hopi tristu por sosodé den e mundu aki, tin hopi cos cu mayornan por haci pa protehá nan yunan. Considerá e caso di Werner cu Eva, mencioná den e artículo anterior.a

Mayornan cu Tin Interes Genuino den Nan Yunan

Werner ta conta cu en bes di ser indiferente, su mayornan a mustra interes genuino den loke tabata pasando na scol. “Mi a apreciá mashá e sugerencianan práctico cu nan a duná mi, i mi a sinti cu nan tabatin interes den mi i tabata apoyá mi. Como mayor, nan tabata basta firme, pero mi tabata sa cu nan tabata mi berdadero amigunan.” I ora Eva a bira asina angustiá cu su lesnan di scol te cu el a bira deprimí i a haña problema pa drumi, su mayornan, Francisco i Inez, a dedicá bastante tempu tambe na papia cuné i yud’é recobrá ekilibrio mental i spiritual.

Con Francisco i Inez a trata na protehá nan yunan i prepará nan p’e bida di adulto? Wel, for di tempu cu e yunan tabata mucha chikitu, e mayornan amoroso aki a enbolbé nan semper den nan actividadnan diario. En bes di djis socialisá cu nan amigunan adulto, Inez i Francisco tabata bai cu e muchanan tur caminda cu nan mes a bai. Como mayornan amoroso, tambe nan a duna nan yu homber i yu muher guia apropiado. Inez ta bisa: “Nos a siña nan tene cas limpi, ser económico i soru pa nan pañanan. I nos a yuda nan cada un scoge un fishi i balansá nan responsabilidadnan cu interesnan spiritual.”

Ta masha vital pa siña conocé bo yunan i duna guia di mayor! Laga nos examiná tres área den cua bo por haci esaki: (1) Yuda bo yunan scoge un tipo di trabou seglar adecuá, (2) prepará nan pa trata cu tension emocional na scol i na trabou, (3) mustra nan con pa satisfacé nan necesidad spiritual.

Yuda Nan Scoge Trabou Adecuá

Ya cu un persona su trabou seglar no solamente tin influencia riba su situacion financiero, sino tambe e ta exigí hopi di su tempu, ser un bon mayor ta encerá tuma cada yu su interes i abilidadnan na consideracion. Ya cu ningun persona conciencial kier ta un carga pa otronan, mayornan mester pensa seriamente riba con pa prepará nan yu p’e mantené su mes i un famia. Bo yu lo tin cu siña un fishi p’e por mantené su mes adecuadamente? Como un mayor cu berdaderamente ta interesá den bo yu, haci esfuerso consistente pa yud’é desaroyá cualidadnan manera un deseo pa traha diligentemente, e boluntad pa siña i e abilidad pa sali bon cu otro hende.

Tuma por ehempel Nicole. E ta bisa: “Mi mayornan a poné mi traha huntu cu nan den nan compania di limpiesa. Nan a sugerí pa mi duna un porcentahe di mi entrada pa contribuí cu gastunan di cas i tene loke a sobra pa mi mes gastunan of pa spar. Esaki a duná mi un mayor sentido di responsabilidad cu a resultá di ta masha probechoso despues den bida.”

E Palabra di Dios, Bijbel, no ta specificá ki tipo di trabou seglar un persona mester scoge. Pero e ta duna guia sano sí. Por ehempel, apostel Pablo a bisa: “Si un hende no kier traha, no lagu’é come tampoco.” Skirbiendo e cristiannan na Tesalónica, el a bisa tambe: “Nos ta tende cu cierto hendenan ta andando desordenadamente entre boso, sin traha mes, pero ta entremeté den loke no ta toca nan. Na hende asina nos ta duna ordu i exhortacion den Señor Jesucristo cu dor di traha ketu nan mester come cuminda cu nan mes a gana.”—2 Tesalonicensenan 3:10-12.

Tog, haña un trabou i gana placa no ta tur loke tin den bida. Cu tempu, esnan cu ta muchu ambicioso tin hopi chens di perde goso den bida i por descubrí cu nan ta ‘coriendo tras di bientu.’ (Eclesiástes 1:14) En bes di urgi nan yunan pa trata na alcansá reconocimentu i prosperidad, mayornan ta haci bon di yuda nan mira e sabiduria di apostel Juan su palabranan inspirá pa Dios: “No stima ni mundu ni loke ta den mundu. Si un hende ta stima mundu, e amor dje Tata no ta den dje; pasobra tur loke tin den mundu—e deseo di carni i e deseo di wowo i e exhibicion grandioso di bo medio di biba—no ta originá cu e Tata, sino ta originá cu mundu. Ademas, mundu ta pasa bai i tambe su deseo, pero esun cu haci e boluntad di Dios ta permanecé pa semper.”—1 Juan 2:15-17.

Con Bo Por Satisfacé Nan Necesidad Emocional?

Como mayor, pakico no ser manera un entrenadó di atleta? E no ta enfocá solamente riba desaroyá e capacidad físico dje atletanan bou di su cuido pa nan core mas duru of pa bula mas leu. Probablemente, e ta haci esfuerso tambe pa yuda nan vence cualkier actitud negativo, reforsando asina nan fortalesa emocional. Den bo caso, con bo por animá, edificá i motivá bo yunan?

Considerá Rogério, un hóben di 13 aña. Ademas di confusion interno debí na cambionan di curpa, el a hañ’é cu tension emocional pa motibu di desunion di su mayornan i dor di falta di atencion. Kico por haci pa hóbennan manera Rogério? Aunke ta imposibel pa protehá bo yunan contra tur ansiedad i mal influencia, nunca stop di cumpli cu bo papel como mayor. Sin protehá bo yunan demasiado, disipliná nan cu comprension, cordando semper cu cada yu ta único. Dor di mustra bondad i amor, bo por contribuí hopi pa haci un hóben sinti su mes sigur. Ademas, esaki lo evitá cu lo e crece cu un falta di confiansa i respet propio.

Sin importá con exitoso bo mes mayornan tabata den satisfacé bo necesidadnan emocional, tres cos por yudá bo tin éxito como un mayor cu di berdad kier yuda: (1) Evitá di bira asina absorbá cu bo mes dificultadnan cu bo ta ignorá e problemanan aparentemente chikitu di bo yunan, (2) haci esfuerso pa bo tin comunicacion diario cu ta agradabel i significativo cu nan, (3) promové un actitud positivo relacioná cu con pa resolvé problema i con pa trata cu hende.

Mirando bek riba su añanan como tiener, Birgit ta bisa: “Mi tabatin cu siña cu bo no por cambia hende pa nan ta manera abo kier. Mi mama a razoná cu mi cu si mi a mira algu den otronan cu mi no a gusta, loke ami por a haci tabata di evitá di ta manera nan. Tambe el a bisá mi cu e mihó tempu pa cambia mi manera lo ta tempu cu mi tabata yong ainda.”

Pero, bo yunan tin mester di mas cu un carera i stabilidad emocional. Puntra bo mes: ‘Mi ta mira mi trabou di mayor como un responsabilidad cu Dios a duná mi?’ Si bo ta mir’é asina, e ora ei bo mester atendé tambe e necesidad spiritual di bo yunan.

Maneranan pa Satisfacé Nan Necesidad Spiritual

Den su Sermon Riba Ceru, Jesucristo a bisa: “Felis ta esnan cu ta conciente di nan necesidad spiritual, ya cu e reino di shelu ta pertenecé na nan.” (Mateo 5:3) Kico satisfacé necesidad spiritual ta encerá? Yunan ta saca hopi beneficio ora mayornan ta pone un ehempel excelente di mustra fe den Jehova Dios. Apostel Pablo a skirbi: “Sin fe ta imposibel pa agradá [Dios] bon, pasobra esun cu ta acercá Dios mester kere cu e ta existí i cu e ta bira recompensador di esnan cu ta busk’é cu empeño.” (Hebreonan 11:6) Sin embargo, pa fe por tin berdadero nificacion, oracion ta necesario. (Romanonan 12:12) Si bo ta reconocé bo mes necesidad spiritual, lo bo busca guia divino, mescos cu e tata dje yu cu a bira e famoso Hues Samson di Israel, a haci. (Huesnan 13:8) Lo bo no solamente haci oracion, sino tambe acudí n’e Palabra inspirá di Dios, Bijbel, pa yudansa.—2 Timoteo 3:16, 17.b

Apesar di tur e trabou duru enbolbí den duna guia sano, apoyo emocional i yudansa spiritual, ser mayor por ta recompensador. Un tata di dos yu na Brazil ta comentá: “Mi no por ni imaginá mi mes di no tin mi yunan. Tin asina tantu cos bon cu nos por compartí cu nan.” Splicando pakico ta bayendo bon cu e yunan, e mama a agregá: “Semper nos ta huntu, i nos ta purba haci cosnan bira festivo i contentu. I, mas importante cu tur, semper nos ta haci oracion p’e muchanan.”

Priscilla ta corda e amor i pacenshi cu su mayornan a desplegá na dje ki ora cu tabatin un problema. “Nan tabata mi berdadero amigunan i a yudá mi den tur cos,” e ta bisa. “Na mucha, mi a sinti cu di berdad mi tabata ser tratá como ‘un herencia for di Jehova.’” (Salmo 127:3) Mescos cu hopi otro mayornan, pakico no programá tempu cu bo yunan di manera cu bo por lesa Bijbel i publicacionnan cristian huntu? Consideracion di relatonan i principionan bíblico den un ambiente positivo por yuda bo yunan sinti nan sigur i haña un berdadero speransa pa futuro.

Ora Tur Yu Lo Ta Sigur

Aunke futuro ta mustra scur pa hopi mucha awe, e Palabra di Dios ta garantisá cu pronto e tera lo ta un hogar sigur pa humanidad. Imaginá e tempu den Dios su mundu nobo primintí ora mayornan lo no tin cu preocupá mas tocante e siguridad di nan yunan! (2 Pedro 3:13) Purba visualisá e cumplimentu magnífico dje profecia aki: “E lobo realmente lo biba pa un tempu cerca lamchi machu, i e leopardo mes lo drumi cerca e lamchi di cabritu, i e bisé i e yu di leon machu cu klina i e animal bon alimentá tur huntu; i simplemente un mucha homber chikitu lo ta lider riba nan.” (Isaías 11:6) Asta awe, e siguridad spiritual describí den e palabranan aki tin un cumplimentu figurativo entre esnan cu ta sirbi Jehova. Den nan seno, lo bo sinti e cuido amoroso di Dios. Si bo manifestá amor pa Dios, bo por ta sigur cu e ta comprendé bo sintimentunan como mayor i lo yudá bo enfrentá e ansiedadnan i pruebanan cu por bini riba bo. Studia su Palabra i pone bo speransa den su Reino.

Yuda bo yunan riba e caminda pa bida eterno dor di pone un ehempel excelente. Si bo tuma refugio den Jehova Dios, bo futuro i esun di bo yunan por surpasá tur bo expectativanan. Bo por tin e mésun confiansa cu e salmista cu a canta: “Haña deleite exkisito den Jehova, i lo e duná bo e peticionnan di bo curason.”—Salmo 37:4.

[Nota]