En Busca di Paradijs

MANERA PASCAL STISI A RELATA

Tabata anochi lat caba, i e cayanan dje stad Béziers, n’e parti zuid di Francia, tabata bashí. Ora nos a topa cu e muraya recien di verf di un libreria religioso, ami cu mi amigu a skirbi cu letternan pretu grandi i mahos riba dje, e palabranan dje filósofo aleman Nietzsche: ‘Tur dios ta morto. Biba e Superhende!’ Pero, kico a pone mi haci tur esaki?

MI A nace na Francia na 1951, den un famia católico di orígen italiano. Tempu mi tabata mucha nos tabata bai pasa vakansi na zuid Italia. Einan, cada pueblo tabatin su imágen di Bírgen Maria. Canando huntu cu mi welo, mi tabata sigui e inmenso imágennan aki cu paña bistí den procesionnan largu den e cerunan, pero sin ningun fe. Mi a caba mi scol básico na un scol religioso cu jesuita a dirigí. Sin embargo, mi no por corda cu mi a yega di tende algu cu realmente a edificá mi fe den Dios.

Mi a cuminsá meditá riba e propósito di bida, tempu cu mi a inscribí na un universidad na Montpellier pa studia medicina. Mi tata a ser heridá den guera i semper tabatin dokter na su cama. En bes di usa asina tantu tempu i esfuerso pa cura hende dje efectonan dañino di guera, lo no tabata mihó pa stop guera? Pero, e Guera di Vietnam tabata den pleno accion. Segun mi, e único manera lógico pa trata cancer di pulmon ta, por ehempel dor di eliminá su causa principal, esta, tabaco. I kico dje malesanan cu ta resultado di malnutricion den paisnan den desaroyo i esnan cu ta ser causá dor di comementu di mas den paisnan ricu? Lo no tabata mihó si eliminá e causanan en bes di purba remediá e consecuencianan doloroso? Pakico tabatin asina tantu sufrimentu riba tera? Mi a sinti cu tabatin algu teriblemente robes cu e sociedad aki cu tabata caba cu su mes, i p’ami, ta e gobiernunan tabata responsabel.

Mi buki faborito tabata unu cu un anarkista a skirbi, i mi tabata skirbi algun frase for di dje over riba muraya. Poco-poco, mi tambe a bira un anarkista sin fe i sin ley moral, cu no tabata kier niun Dios ni doño. Pa mi, Dios i religion ta cosnan cu hende ricu i poderoso a inventá pa nan por dominá i explotá nos cu a sobra. Ta como si fuera nan tabata bisa: ‘Traha duru pa nos riba tera, i boso recompensa den e paradijs den shelu lo ta grandi.’ Pero e tempu dje diosnan a pasa. I mester a bisa e pueblo. I un manera pa bisa nan tabata dor di skirbi riba muraya público.

Como resultado, mi studio a bai na di dos lugá. Miéntras tantu, mi a inscribí pa studia geografia i ecologia na un otro universidad di Montpellier unda un ambiente di rebelion a reina. Mas mi a studia ecologia, mas mi a cunsumí ora mi tabata mira e polucion di nos planeta bunita.

Tur aña durante vakansi den zomer mi tabata biaha kilometernan largu pidiendo lift dor di Europa. Miéntras mi tabata biaha i combersá cu cientos di shofer, mi a mira e maldad i corupcion cu ta afectá sociedad humano cu mi mes wowo. Un dia, miéntras mi tabata en busca di paradijs, mi a bin topa algun playa magnífico riba e bunita isla di Creta, i mi a haña nan tapá cu zeta. Mi a sinti un duele profundo. Tin un caminda riba tera unda un pida paradijs a keda?

Bek den Cunucu

Na Francia ecólogonan tabata boga pa hende bolbe haci uso di cunucu pa solucioná problemanan dje sociedad. Mi kier a traha cu mi man. P’esei mi a cumpra un cas di bloki chikitu den un pueblito na pia dje cerunan di Cévennes den zuid di Francia. Riba su porta mi a skirbi e lema di hippie mericano: “Paradijs Awor.” Un mucha muher aleman hóben cu tabata di biahe den nos region a bira mi compañera di bida. Mi no a pensa mes pa laga un alcalde, un representante di gobiernu, casa nos. I casa na misa? Lubidá!

Mayoria biaha nos tabata cana pia abou, i mi tabatin cabei largu i un barba mal cuidá. Cultivamentu di fruta i berdura a fasiná mi. Den zomer, shelu tabata blou i yeyenan tabata grita. E flornan di mondi tabata hole masha dushi, i e frutanan di Mediteráneo cu tabata pari— druif i figu—tabata suculento mes! A parce cu nos a haña nos neshi den paradijs.

Mi A Cuminsá Kere den Dios

Na universidad, mi a siña biologia celular, embriologia i anatomia, i e complehidad i armonia den tur e mecanismonan aki a impresioná mi profundamente. Awor cu mi por a contemplá i observá creacion den su ambiente original tur dia, su bunitesa i potencial a yena mi cu admiracion. Tur dia e buki di creacion tabata mustra mi un otro página. Un dia durante un caminata largu den e cerunan, i despues cu mi a meditá profundamente riba bida, mi a yega n’e conclusion cu mester tabatin un Creador. I mi a dicidí den mi curason di kere den Dios. Promé cu esei, mi tabatin un bashí den mi curason, un soledad cu tabata molestiá mi. E dia cu mi a cuminsá kere den Dios, mi a bisa mi mes: ‘Pascal, lo bo no ta bo so nunca mas.’ Mi a sinti un sensacion extraordinario.

Djis despues, ami cu mi compañera a haña un baby mucha muher: Amandine. E tabata mi pret’i wowo. Awor cu mi a cuminsá kere den Dios, mi a cuminsá respetá e poco leynan moral cu mi tabata sa. Mi a stop di horta i gaña, i un poco tempu despues mi a realisá cu esaki a yuda mi evitá hopi problema cu hende rondó di mi. Sí, nos tabatin nos problemanan, i mi paradijs no tabata completamente loke mi a spera. Cultivadónan local di biña tabata usa insecticida i herbicida cu tabata contaminá mi cosecha tambe. Ainda mi no a haña contesta pa mi pregunta tocante e causa di maldad. Ademas, aunke mi a lesa hopi tocante bida di famia, esaki no a evitá discusionnan pisá cu mi compañera. Nos tabatin tiki amigu, i esnan cu nos tabatin tabata falsu; algun a asta purba influenciá mi casa p’e corta mi orea. Mester tabatin un mihó paradijs.

E Contesta pa Mi Oracionnan

Na mi manera, hopi bes mi tabata haci oracion i pidi Dios pa guia den bida. Un diadomingo mainta, un señora amigabel cu tabata yama Irène Lopez i su yu homber chikitu a yega na nos porta. E tabata un Testigo di Jehova. Mi a scucha loke e tabatin di bisa i mi a aceptá e oferta pa un otro bishita. Dos hende homber a bin bishitá mi. For dje combersacion ei mi a keda corda dos cos: Paradijs i e Reino di Dios. Mi a keda conserbá e pensamentunan ei cuidadosamente den mi curason. I segun cu lunanan tabata pasa, mi a comprendé cu un dia lo mi mester drecha asuntu cu Dios si mi tabata kier un concenshi limpi i logra berdadero felicidad.

Na promé instante, mi compañera tabata dispuesto pa casa cu mi pa asina nos bida por tabata na armonia cu e Palabra di Dios. Despues e tabatin mal asociacion cu hendenan cu tabata tene mofa di Dios i di su leynan. Un anochi den primavera ora mi a yega cas, mi a haña un shok teribel. Nos cas tabata bashí. Mi compañera a bai i el a bai cu nos yu muher di tres aña. Dianan largu mi a keda spera nan regreso, pero tabata en bano. En bes di acusá Dios, mi a haci oracion pidié yudansa.

Djis despues di esei, mi a coge Bijbel, sinta bou di mi pal’i figu i cuminsá lesa. En realidad, mi a lesa su palabranan ansiosamente. Aunke mi a lesa tur sorto di buki cu sicoanalista i sicólogonan a skirbi, nunca mi a topa cu asina tantu sabiduria. Dios mester a inspirá e buki aki. E manera cu Jesus a siña i a comprendé e naturalesa humano a asombrá mi. E buki di Salmonan a consolá mi i e sabiduria práctico den e buki di Proverbionan a sorprendé mi. Mesora mi a realisá cu aunke studiamentu di creacion ta un forma excelente pa hala un persona cerca Dios, e por revelá solamente “e randnan di su camindanan.”—Job 26:14.

Tambe e Testigonan a laga pa mi e bukinan E berdad cu ta hiba na bida eterna i Logrando felicidad den bida di famía.a Mi wowo a habri ora mi a lesa esakinan. E buki Berdad a yuda mi comprendé di con hende tabata enfrentá polucion pandémico, guera, aumento di violencia, i menasa di destruccion nuclear. I mescos cu e shelu corá cu mi tabata mira for di mi hofi tabata anunciá bon weer p’e siguiente dia, e sucesonan aki a duna prueba cu e Reino di Dios tabata tras di porta. Pa loke ta trata e buki Bida di famia, mi a deseá di por a mustr’é na mi compañera i bis’é cu nos por ta felis si nos practicá e consehonan cu Bijbel ta duna. Pero no tabata posibel mas.

Haciendo Progreso Spiritual

Mi kier a sa mas, p’esei mi a pidi Robert, un Testigo, pa bishitá mi. Pa su gran sorpresa, mi a bis’é cu mi kier bautisá, i p’esei el a cuminsá un studio di Bijbel cu mi. Mesora mi a cuminsá conta otronan loke mi tabata siña i distribuí publicacionnan cu mi tabata haña na Salon di Reino.

Pa mi por a gana mi pan di cada dia, mi a inscribí pa un curso di metsla. Conciente dje beneficionan cu e Palabra di Dios por duna hende, mi a probechá di tur oportunidad pa duna testimonio informal nan mi compañeronan studiante i n’e maestronan. Un anochi, mi a topa Serge den un gang. E tabatin algun revista den su man. “Mi ta mira cu bo gusta lesa,” mi a bis’é. “Sí, pero mi ta fadá di esakinan.” Mi a puntr’é: “Bo kier algu ègt bon pa lesa?” Despues cu nos tabatin un combersacion excelente tocante e Reino di Dios, el a aceptá algun literatura bíblico. E siguiente siman, el a bai Salon di Reino cu mi, i mi a cuminsá studia Bijbel cuné.

Un dia mi a puntra Robert si mi por a bai predicá di cas pa cas. El a bai den su kashi i el a haña un bachi pa mi. E siguiente diadomingo mi a dal mi promé pasonan den e ministerio huntu cuné. Por fin, dia 7 di mart 1981, mi a simbolisá mi dedicacion na Jehova Dios públicamente mediante bautismo.

Yudansa Miéntras Mi Tabata den Dolor

Miéntras tantu mi a haña sa unda Amandine cu su mama tabata biba den estranheria. Lamentablemente, su mama, completamente legal segun e leynan dje pais unda e tabata biba, a prohibí mi di wak mi yu muher. Mi tabata aplastá. Mama di Amandine a casa, i mi desesperacion a bira mas profundo ora mi a ricibí un notificacion oficial cu a mustra cu su esposo a adoptá mi yu muher, sin ningun consentimentu di mi parti. Mi no tabatin ningun derecho mas riba mi yu. Aunke mi a tuma pasonan legal, mi no por a logra obtené derecho di bishita. Mi tabata sinti como si fuera mi tabatin un peso di 50 kilo riba mi lomba, asina inmenso mi dolor tabata.

Pero e Palabra di Jehova a sostené mi den diferente manera. Un dia cu mi tabata extremadamente afligí, mi a ripití bes tras bes e palabranan di Proverbionan 24:10: “Bo a mustra bo mes desanimá den e dia di afliccion? Bo poder lo ta poco.” E versículo aki a yuda mi pa mi no cai den otro. Na un otro ocasion, despues di otro contratempu den un intento pa wak mi yu muher, mi a bai sirbishi i mi a gara e man di tas mes duru cu mi tabata por. Durante momentonan difícil asina mi por a experenciá e berdad di Salmo 126:6 cu ta bisa: “Esun cu sin falta ta bai, asta yorando, hibando cuné un tas yen di simia, sin falta lo drenta cu sclamacion gososo, cargando su tapushinan di maishi.” Un les importante cu mi a siña ta cu, ora bo ta enfrentá pruebanan severo, una bes bo a haci tur loke bo por pa solucioná nan, bo tin cu benta nan tras di lomba i sigui cu determinacion padilanti den sirbishi di Jehova. Esaki ta e único manera pa mantené bo goso.

Purbando di Alcansá Algu Mihó

Ora nan a mira con mi a cambia, mi kerido mayornan a ofrecé nan yudansa pa mi por sigui mi studio na universidad. Mi a gradicí nan, pero awor mi tabatin un otro meta. E berdad a libra mi for di filosofia humano, misticismo i astrologia. Awor mi tabatin amigunan berdadero cu nunca lo mata otro den guera. I por fin mi a haña contesta riba mi pregunta relacioná cu e motibu pa asina tantu sufrimentu riba tera. Motivá pa gratitud, mi kier a sirbi Dios cu tur mi forsa. Jesus a dedicá su mes completamente na su ministerio, i mi kier a sigui su ehempel.

Na 1983, mi a bandoná mi negoshi di metsla pa mi bira un minister di tempu completo. Como contesta riba mi oracion, mi a haña un trabou part-time den un parke pa sostené mi mes. Esta un goso e tabata pa asistí n’e scol di pionero huntu cu Serge, e hóben cu mi a duna testimonio n’e scol di metsla! Despues di a traha tres aña como pionero regular, mi tabatin deseo di haci asta mas den sirbishi di Jehova. P’esei, na 1986, mi a keda nombrá como pionero special den e stad pintoresco Provins, no muchu leu di Paris. Hopi bes ora mi yega cas anochi, mi tabata hinca rudia den oracion na Jehova i gradicié p’e dia maraviyoso cu mi a pasa papiando cu otronan tocante dje. Eigenlijk, e dos cosnan cu ta duna mi mas goso den bida ta papia cu Dios i papia tocante Dios.

Un otro motibu di gran goso pa mi tabata e bautismo di mi mama na edad di 68 aña, kende tabata biba na Cébazan, un pueblo chikitu n’e parti zuid di Francia. Tempu cu mi mama a cuminsá lesa Bijbel mi a manda abonament riba e E Toren di Vigilancia i Spierta! p’e. E tabata un persona cu tabata razoná, i no a dura mashá cu el a reconocé e zonido dje berdad den loke el a lesa.

Betel—Un Paradijs Spiritual Remarcabel

Ora Sociedad Watch Tower a dicidí di reducí e cantidad di pioneronan special, mi a aplicá p’e Scol di Entrenamentu Ministerial i pa Betel, e sucursal di Testigonan di Jehova na Francia. Mi tabata kier pa Jehova dicidí con lo mi por a sirbié mihó. Algun luna despues na december 1989, mi a haña invitacion pa bai Betel na Louviers, nortwest di Francia. Esaki tabata un decision excelente, pasobra e sitio a pone cu mi por a yuda mi ruman homber i mi cuñá percurá pa mi mayornan ora nan tabata hopi malu. Si mi tabata den sirbishi di misionero kilometernan leu, lo mi no por a hacié.

Mi mama a bin bishitá mi vários biaha na Betel. Aunke biba alehá for di mi tabata un sacrificio p’e, hopi bes e tabata bisa mi: “Mi Yu, keda Betel. Mi ta contentu cu bo ta sirbi Jehova di e manera aki.” Lamentablemente, awor tur dos mi mayornan ta morto. Cuantu mi ta anhelá pa mira nan den un tera transformá den un paradijs literal!

Mi ta kere ègt cu si tin un cas cu merecé e descripcion “Paradijs Awor,” esei ta Betel: e “Cas di Dios”—pasobra e berdadero paradijs ta principalmente den sentido spiritual, i na Betel tin spiritualidad abundante. Nos tin oportunidad pa cultivá e frutanan di spiritu. (Galationan 5:22, 23) E cuminda spiritual ricu cu nos ta ricibí tur dia durante e consideracion dje texto diario di Bijbel i e studio di famia mediante E Toren di Vigilancia ta yuda fortalecé mi p’e sirbishi na Betel. Ademas, e echo cu bo por asociá cu rumannan spiritual, cu pa décadanan ta sirbiendo Jehova fielmente, ta haci Betel un lugá único pa progresá spiritualmente. Aunke awor mi tin 17 aña separá for di mi yu muher, mi a haña un cantidad di hóben celoso na Betel cu mi ta considerá como mi yunan. I nan progreso spiritual ta duna mi goso. Durante e último ocho añanan aki mi tabatin shete diferente asignacion. Aunke e cambionan aki no tabata semper fácil, a lo largu e entrenamentu ta beneficioso.

Mi tabata cultivá un tipo di bonchi cu ta producí un shen biaha. Asina tambe, mi a experenciá cu, ora bo sembra loke ta malu, lo bo cosechá un shen biaha pió, i no djis un biaha so. Experencia ta manera un scol unda e lesnan ta masha caru. Lo mi a preferá di no a bai e scol ei nunca, i en bes di esei ser criá den e camindanan di Jehova. Esta un privilegio pa e hóbennan cu mayornan cristian ta lanta! Sin duda, ta mihó sembra loke ta bon den sirbishi di Jehova i cosechá shen biaha mas tantu na pas i satisfaccion.—Galationan 6:7, 8.

Tempu cu mi tabata traha pionero, tin biaha mi tabata pasa banda dje libreria cu mi a skirbi e lema anarkista riba su muraya. Asta mi a yega di drenta paden i papia cu e doño tocante e Dios bibu i su propósito. Sí, Dios ta bibu! I ademas, Jehova, e único Dios berdadero, ta un Tata fiel cu nunca ta bandoná su yunan. (Revelacion 15:4) Cu mas multitud di hende for di tur nacion haña e paradijs spiritual awor, i e Paradijs restorá cu tin cu bini, dor di sirbi i alabá e Dios bibu, Jehova!

[Nota]

[Plachi na página 26]

Conmoví dor dje maraviyanan di creacion, mi a dicidí den mi curason pa kere den Dios. (Man drechi) Den sirbishi di Betel awe