Pascu den Oriente

• ROND DI DOSHEN AÑA PASA, un prominente erudito koreano a bishitá Peking, China. Ora e tabata contemplá un pintura den plafon di un catedral, el a mira un esena di Maria cu niño Jesus den su brasanan. El a bisa dje pintura asombroso aki:

“Un señora tabatin un mucha di mas o ménos cincu pa seis aña den su scochi. E mucha tabatin un aspecto enfermo. Parce cu e señora mes no tabatin muchu forsa pa tene su cabes na haltu, manera cos cu di duele e no por a soportá di mira su yu. I leu nan tras tabatin yen di alma di defuntu i baby cu hala ta bula rond. Segun cu mi tabata contemplá nan riba mi cabes, a parce como si fuera cu na cualkier momento nan lo a baha riba mi. Asombrá, mi a saca mi man pa gara nan.”

ESEI a sosodé hopi tempu despues cu e Reformacion a cuminsá na Europa, hopi tempu despues dje época scur di Edad Medio. Pero pa mayoria hende di paisnan oriental, cristianismo tabata mes desconocí cu e pintura mes. Cuantu e situacion ei a cambia! Tur temporada di Pascu, por mira esenanan di niño Jesus. Oriente a custumbrá cu esenanan asina, i awor hopi caya aya ta parce esnan di Europa.

Riba e anochi di 25 di november 1998, un luna promé cu Pascu, mas cu 100.000 pera di lus den e 300 palunan na cada banda di Champs Élysées na Paris ta iluminá e avenida famoso ei cla-cla. Mescos tambe, den un caya den e centro di stad na Seúl, Korea, un palu di Pascu haltísimo ta dorna un pacus grandi i ta cuminsá iluminá e anochi den e stad capital ei. No ta tarda mashá cu su cayanan ta dorná cu decoracion di Pascu.

Tur dia television, radio i korant ta presentá programanan relacioná cu Pascu. Stimulá p’e ambiente di Pascu, henter e pais ta cuminsá prepará pa celebrá fin di aña. Den purá nan ta decorá e misanan na Seúl, di cua nan cantidad ta sorprendé hopi bishitante. Dje manera ei, e spiritu di Pascu a plama caba na Korea i otro paisnan oriental rond di e tempu cu Merca ta druk cu su celebracion di Dia di Gradicimentu (Thanksgiving Day) na cabamentu di november.

Mayoria pais oriental no ta ser contá como parti di cristiandad. Por ehempel, solamente 26,3 porciento dje poblacion di Korea ta pretendé di ta cristian. Na Hong Kong ta 7,9 porciento, na Taiwan 7,4 porciento i na Hapon solamente 1,2 porciento. Ta bisto anto cu mayoria hende oriental no ta practicá cristianismo, pero no ta parce cu nan tin niun obhecion pa celebrá Pascu. De facto, hopi bes nan ta parce mas entusiasmá tocante dje cu hende den paisnan occidental. Hong Kong, por ehempel, ta bon conocí pa su celebracion di Pascu tur afó, maske mayoria di su habitantenan ta sea budista of taoista. Asta na China, caminda solamente 0,1 porciento ta pretendé di ta cristian, Pascu ta ganando popularidad cu masha rapides.

Con bin asina tantu hende den paisnan oriental ta celebrá Pascu? Pakico hende cu no ta aceptá Jesus como Mesías tambe ta celebrá Pascu, e dia cu mayoria hende cu ta pretendé di ta cristian ta mira como su fecha di nacementu? Cristiannan berdadero mester imitá nan punto di bista di Pascu? Nos lo haña e contestanan ora nos considerá con Pascu a bira asina popular na Korea, un pais oriental antiguo.