Pascu​—Con Bini Asta den Oriente?

TIN un creencia oriental antiguo cu ta corda hende di Papa Pascu. Esei ta e creencia koreano den un cierto Chowangshin, i bo por haña algu similar entre algun chines i hapones.

Hende a mira Chowangshin como un dios encargá cu cushina, un dios di candela cu tabata relacioná cu e antiguo adoracion di candela dje koreanonan. (Den antigwedad, e koreanonan tabata transportá carbon cendé cu masha cuidou pa haci sigur cu esakinan no ta paga nunca.) Nan tabata kere cu e dios aki ta vigilá e comportacion di miembronan di famia pa un aña, i despues subi na shelu dor di e stoof i ‘schoorsteen’ dje cushina.

Supuestamente, Chowangshin a raportá n’e rey di shelu dia 23 dje luna lunar di december. Tabata sper’é bek na fin dje aña pasando via e schoorsteen i stoof, pa trece recompensa i castigu segun cada un su comportacion. Riba e dia di su regreso, e miembronan dje famia mester a cende bela den cushina i otro caminda den cas. Cuadronan dje dios di cushina ei ta mustra cu e tabatin algu mas mescos cu Papa Pascu: nan tabata pint’é na corá! Tabata un custumber pa un esposa traha un par di mea koreano tradicional i duna su suegra riba e solsticio di winter (22 di december, e dia cu solo ta mas alehá for dje hemisferio nort). Esei tabata pa simbolisá su deseo pa mama di su casá por tabatin un bida largu, ya cu e dianan ta cuminsá bira mas largu despues dje fecha ei.

Bo no ta mira algun similaridad entre e puntonan anterior i Pascu? Nan tin e mésun historia i custumbernan: e schoorsteen, bela, dunamentu di regalo, mea, un homber bieu bistí na corá i e fecha dje celebracion. Tog, e similaridadnan ei so no ta suficiente pa splica con bini hende a aceptá Pascu asina fácil na Korea. Nobo-nobo cu a cuminsá celebrá Pascu na Korea ya e creencia den Chowangshin a casi disparcé. De facto, awe mayoria koreano no sa mes cu un creencia asina a yega di existí.

Sin embargo, esaki ta ilustrá con custumbernan relacioná cu e solsticio di winter i cu fin di aña a plama rond mundu via diferente ruta. Den siglo cuater E.C., e iglesia dominante den e Imperio Romano a cambia nomber di Saturnalia, e fiesta romano pagano dje nacementu di dios-solo, i a hacié parti di Pascu. E celebracion di Pascu a bira nada mas cu un rebibamentu di custumbernan local bou di un otro nomber. Con esei tabata posibel?

E Papel di Dunamentu di Regalo

Dunamentu di regalo ta un dje custumbernan cu nunca no a disparcé. Pa hopi tempu, koreanonan a haña hopi goso den duna i ricibí regalo. Esaki tabata un motibu cu a haci e celebracion di Pascu popular na Korea.

Despues di Guera Mundial II, p’e soldánan mericano stacioná na Korea cu kier a fortalecé nan lasonan cu e pueblo, misanan tabata lugánan pa topa otro i parti regalo i suministro di alivio. Esaki tabata tuma lugá foral riba dia di Pascu. Hopi mucha tabata bai misa pa curiosidad, i ei pa promé bes nan a haña regalo di chuculati. Manera bo por comprendé, dor di esei hopi di nan a anhelá p’e siguiente Pascu yega.

P’e muchanan ei, Papa Pascu tabata un soldá mericano bistí cu un muts corá. Proverbionan 19:6 ta bisa: “Tur hende ta compañero dje homber cu ta duna regalo.” Sí, dunamentu di regalo a resultá di ta masha eficas. Pero manera bo por concluí for dje versículo ei, e regalonan ei no ta garantisá un amistad duradero. Asta na Korea, hopi ta esnan kende nan experencianan cu misa no ta bai mas leu cu un chuculati cu nan a purba den nan hubentud. Pero Pascu sí hende no a lubidá. Huntu cu Korea su crecementu económico rápido, comercio tambe a crece, i dunamentu di regalo riba Pascu tabata un medio simpel pa stimulá hende pa gasta placa. Negoshinan a probechá di Pascu pa aumentá ganashi.

Esei ta duna bo un idea di loke Pascu ta den paisnan oriental awe. Cu mira riba e cumpramentu impulsivo den tempu di Pascu, nan ta desaroyá productonan nobo. Plannan pa propaganda ta cuminsá rond di juli pa augustus. Cifranan di benta ta yega nan máximo na fin di aña, apoyá pa tur e cumpramentu di regalo, carchi i grabacionnan musical di Pascu. Sí, propaganda lo haci e hóben promedio sinti su mes malu si e keda cas i no haña ningun regalo riba Noche Buena!

Segun cu e dia di Pascu ta acercá, pacusnan i centronan comercial na Seúl ta colma cu hende cu ta bini pa cumpra regalo, i mescos ta sosodé den otro stadnan oriental tambe. Tráfico ta pega pisá. Hotel, área di negoshi, restaurant i clubnan nocturno ta yen di cliente. Por tende zonido di paranda, entre otro, cantamentu duru. Riba Noche Buena, por mira homber i muhernan burachi coge nan caminda den cayanan sushi.

Asina ta Pascu awe. Pascu na Oriente no ta un fiesta dje supuesto cristiannan mas. Ta bisto cu na Korea i na otro caminda, comerciantenan ta esnan cu ta saca mas ganashi for di cristiandad su dia di fiesta. Ta comerciantenan so nos mester culpa anto pa un Pascu cu a desviá asina tantu for dje spiritu di Cristo? Cristiannan berdadero mester examiná e cuestionnan serio enbolbí mas profundamente.

E Orígen di Pascu

Ora bo hinca un animal salbahe den un kouchi na un dierentuin, e ta keda un bestia. I lo ta un eror grave pa kere cu el a bira mansu djis pasobra e tin algun tempu caba den un kouchi i aparentemente ta gusta hunga cu su yunan. Probablemente bo a tende informe di trahadónan den dierentuin cu a ser atacá.

Den cierto sentido nos por bisa mescos tocante celebracion di Pascu. Na promé instante e tabata un “bestia” cu ta biba pafó di cristianismo. Bou dje subtema “Relacion cu e Saturnalia Romano,” The Christian Encyclopedia (na koreano)a ta comentá tocante Pascu:

“E Brumalia i Saturnalia pagano tabatin rais muchu profundo den custumber popular pa laga influencia cristian pone nan un banda. Tal bes e echo cu emperador Constantino a reconocé diadomingo (e dia di Febe i Mítras i tambe e Dia di Señor) . . . lo por a pone e cristiannan di siglo cuater haña cu ta apropiado pa laga e nacementu dje Yu di Dios cai huntu cu esun dje solo físico. E fiesta pagano cu su libertinahe i diberticion tabata asina popular cu e cristiannan tabata contentu cu e excuus pa sigui celebr’é sin cambia su spiritu of estilo mashá.”

Bo ta kere cu un desaroyo asina por a tuma lugá sin ningun oposicion? E mésun enciclopedia ta bisa: “Predicadónan cristian di West i di Medio Oriente a protestá contra e locura inapropiado cu cua a celebrá Cristo su cumpleaño, miéntras cristiannan di Mesopotamia a acusá nan rumannan di West di idolatria i adoracion di solo dor cu nan a adoptá e fiesta pagano aki como unu cristian.” Sin duda, algu a bai robes for di cuminsamentu. “Tog e fiesta a haña aceptacion rápidamente, i na final el a bira asina firmemente establecí cu ni e revolucion protestant di siglo 16 no por a sak’é afó,” segun e enciclopedia.

Sí, e iglesia dominante a introducí un fiesta di e dios-solo, cu no tabata parti di cristianismo berdadero. El a haña un otro nomber—pero su característicanan pagano sí a keda. I el a yuda hinca paganismo den iglesianan cristian pa nomber i contaminá spiritualidad di hende. Historia ta confirmá cu segun cu cristiandad a desaroyá, e actitud original di “stima bo enemigunan” a traha lugá pa degradacion moral i guera violento.

Cu tempu, a bira bisto cu apesar di su nomber falsificá, Pascu a reflehá su orígen pagano cu paranda, bebementu di mas, diberticion, bailamentu, dunamentu di regalo i dornamentu di cas cu mata cu semper ta keda berde. Pa comerciantenan por alcansá nan meta principal, esta, mas benta, nan a probechá di Pascu den tur manera posibel. Medionan di comunicacion ta alab’é; e público ta simplemente entusiasmá. Den centro di Seúl, un pacus cu ta specialisá den paña djabou a bira titular di noticia na television ora el a exhibí den su vitrina un palu di Pascu dorná cu paña djabou so. E ambiente di Pascu tabata notabel, pero no tabatin ningun señal di yama Cristo bon biní.

Punto di Bista Bíblico Bon Cla di Pascu

Kico nos ta siña for dje antecedente histórico i desaroyonan ei? Ora bo botoná un camisa of blusa malu for di cuminsamentu, e único manera pa corigí e situacion ta dor di cuminsá di nobo. No ta berdad? Apesar dje berdad ei, algun hende ta razoná cu apesar di su raisnan pagano den adoracion di solo, cristiandad a aceptá Pascu. Pues, nan ta haña cu a santificá e dia di fiesta como e fecha di nacementu di Cristo, i a dun’é un nificacion nobo.

Nos por siña un les balioso for di un suceso histórico cu a tuma lugá den Huda di antigwedad. Na aña 612 P.E.C., e habitantenan di Hudea a introducí adoracion pagano di solo den e tempel na Jerusalem. E echo cu nan a efectuá e adoracion pagano den e lugá dedicá na adoracion puru di Jehova Dios a santifik’é? E escritor di Bijbel, Ezekiel, a skirbi dje adoracion di solo cu hende a practicá den e tempel na Jerusalem: “Mira! n’e entrada dje tempel di Jehova, entre e veranda i e altar, tabatin rond di binticincu homber cu . . . cara pa oost, i nan tabata buig abou den direccion oost, na solo. I el a bisa mi: ‘Bo a mira esaki, o yu di hende? Ta un cos asina leve pa e cas di Huda haci e cosnan detestabel cu nan a haci aki, pa nan tin cu yena e tera cu violencia i cu nan mester ofendé mi atrobe, i aki nan ta pusha e taki na mi nanishi?’”—Ezekiel 8:16, 17.

Sí, en bes di keda santificá, e forma pagano ei di adoracion a hinca henter e tempel den peliger. E custumbernan ei a plama den Huda i a contribuí n’e violencia i degradacion moral extenso den e pais ei. Den cristiandad ta mescos. Custumbernan cu tin nan base den e adoracion di solo di Saturnalia a bira prominente na Pascu. Ta significativo cu un par di aña despues cu Ezekiel a ricibí e vision ei, Jerusalem a experenciá Dios su huicio—el a haña su destruccion na man dje babilonionan.—2 Crónicanan 36:15-20.

Kisas bo a haña e descripcion cu un erudito koreano a duna di niño Jesus den e artículo anterior, pret. Pero echo ta cu, siendo cu e reaccion ta bini di un persona cu no tin un conocimentu exacto di Cristo, e tin bastante valides. E por haci hende cu ta celebrá Pascu pensa seriamente. Pakico? Pasobra Pascu ta faya pa representá Cristo corectamente. De facto, e ta tapa su berdadero posicion actual. Jesus no ta un baby mas den un pesebre.

Bijbel ta resaltá bes tras bes cu awor Jesus ta e Mesías, e poderoso Rey dje Reino celestial di Dios. (Revelacion 11:15) E ta cla pa pone fin n’e pobresa i miseria cu algun hende no a lubidá durante e temporada di Pascu ora nan ta haci obranan di caridad.

Francamente, Pascu no a beneficiá ni e paisnan di cristiandad ni otro paisnan, incluso esnan den Oriente. Mas bien, el a kita atencion for dje berdadero mensahe cristian tocante e Reino di Dios i e fin dje mal sistema di cosnan actual. (Mateo 24:14) Nos ta invitá bo pa busca pa sa cerca e Testigonan di Jehova con e fin ei lo bini. I bo por siña for di nan tocante e bendicionnan duradero cu lo sigui e ora ei riba tera, bou dje direccion di Dios su Reino i e Rey reinante, Jesucristo.—Revelacion 21:3, 4.

[Nota]

[Komentario na página 6]

Pascu a yuda hinca paganismo den iglesianan cristian pa nomber

[Plachi na página 5]

Hopi mucha a bai misa pa curiosidad i a ricibí regalo di chuculati. E ora ei nan a anhelá p’e siguiente Pascu yega

[Plachi na página 7]

Noche Buena den centro di Seúl, Korea

[Plachi na página 8]

Cristo no ta un baby mas sino e poderoso Rey dje Reino di Dios