Hañando Berdadero Pas den un Pais Turbulento

“E monster di violencia entre miembro di religionnan ta completamente for di su kouchi,” segun un informe aya na 1969. Esei tabata tempu e Turbulencianan, e periodo actual di disturbio na Nort Irlanda, a cuminsá escalá.

VIOLENCIA i matamentu entre miembro di religionnan a bira algu comun segun cu matadónan protestant i católico, “e hombernan salbahe na tur dos banda” dje disputa político i religioso, a intensificá e lucha pa dominacion na Irlanda. Dje tempu ei padilanti “nan a mata mas cu 3.600 hende i a manca miles den casi 30 aña di violencia,” segun The Irish Times.

Claro cu esaki no ta un lucha nobo. E ta un lucha cu a plaga Irlanda pa siglonan. Den añanan recien, Nort Irlanda a sinti su efectonan mas mortífero, pero e amargura i discordia cu el a crea a ruina bida di hende na tur parti di Irlanda.

Den e senario ei, pa mas cu shen aña caba, Testigonan di Jehova a bin ta señalá n’e berdadero solucion p’e problemanan cu a plaga e tera turbulento aki. E solucion ei ta e Reino di Dios den man di Jesucristo. (Mateo 6:9, 10) Na cuminsamentu dje Turbulencianan na 1969, tabatin 876 Testigo di Jehova na Irlanda. Awor tin mas cu 4.500, den mas cu 100 congregacion. Ata un par di experencia for di algun persona cu a bira lomba pa actividadnan político i paramilitar.

“Dia Mi Bira Grandi, Mi Ta Djoin IRA!”

Michaela a lanta como católico na República di Irlanda. Na scol el a siña algu dje historia di Irlanda i su conflicto di hopi siglo cu Gran Bretania. Como mucha, el a desaroyá un odio profundo contra inglesnan. El a mira nan como “opresor dje pueblo irlandes.” Ora e tabatin dies aña, el a bisa su wela: “Dia mi bira grandi, mi ta djoin IRA!” (Ehército Republicano Irlandes) “Mi a haña un wanta riba mi cara cu mi a keda corda te dia djawe,” e ta bisa. Mas despues el a haña sa cu su tawela tabata den e ehército británico durante Guera Mundial I. Un biaha su wela tabatin cu para dilanti su tawela pa evitá cu e miembronan di IRA a tir’é mata.

Sin embargo, ora Michael a bira mas grandi, e kier a haci algu pa yuda su compañeronan católico na Nort Irlanda. “A parce mi n’e tempu ei,” segun e, “cu e único hendenan cu tabata haci algu pa yuda e pueblo católico di Nort Irlanda tabata IRA.” Inspirá pa loke é a mira como un causa hustu, el a bira miembro di IRA i a ricibí entrenamentu den uso di arma. Paramilitarnan protestant na Nort Irlanda a tira tres amigu di dje mata.

Cu tempu Michael a keda desilusioná cu e lucha paramilitar. Por ehempel, e peleanan amargo cu diferente gruponan paramilitar tabata bringa contra otro, a molesti’é. Tempu e tabata den prizon pa delitunan cometé en coneccion cu actividad di IRA, el a resa na Dios p’e yud’é haña e caminda real pa pas i husticia duradero. Un poco tempu despues Testigonan di Jehova a yama na su cas. Pero prehuicio di pasado a forma un barera. E Testigonan tabata ingles. Su odio profundo a pone cu tabata difícil p’e scucha. “No ta semper mi a mustra cu mi tabata contentu di mira nan,” e ta bisa, “pero nan a perseverá den bishitá mi i papia cu mi, i mi a cuminsá mira cu e Reino di Dios lo pone fin na tur e inhusticia político i social cu mi tabata lucha pa caba cuné.”—Salmo 37:10, 11; 72:12-14.

E ora di berdad a yega un anochi ora Michael a topa su comandante di IRA, cu a bis’é: “Nos tin un trabou pa bo haci.” “Mi a sinti cu mi tabatin cu tuma un decision e momento ei mes,” Michael ta bisa, “di manera cu mi a hala un rosea profundo i bisa: ‘Awor mi ta un Testigo di Jehova,’ aunke e tempu ei ainda mi no tabata bautisá. Mi tabata sa sí cu mi kier tabata un sirbidó di Jehova.” “Bo merecé pa pon’é bo contra muraya i tira bo mata,” tabata contesta dje comandante. Apesar dje menasa, Michael a sali for di IRA. El a haña curashi pa haci esaki dor di laga Jehova su palabranan toca su mente i curason. “Cu tempu, mi casá i algun di mi yunan tambe a dedicá nan bida na Jehova. Awor nos tin berdadero pas den nos curason. I semper nos lo ta gradicidu na Jehova cu el a permití nos siña e berdad i participá den plama un mensahe pacífico den un tera turbulento.”—Salmo 34:14; 119:165.

Ser Neutral Ta un Berdadero Proteccion

“Mi a lanta den cunucu na County Derry, Nort Irlanda,” segun Patrick. “Como mucha, mi no a conocé nada otro cu no ta e Turbulencianan. Tabata bisto cu e ambiente ei a afectá mi punto di bista i mi manera di pensa.” Patrick a desaroyá puntonan di bista extremo influenciá pa nacionalismo malicioso i prehuicio anti-británico profundo. El a mira hende religioso na ámbos banda dje lucha político violá principionan cristian fundamental i tambe principionan di decencia humano básico. Como resultado, el a alehá for di religion, i cu tempu a bira un ateista i un marxista del alma.—Compará cu Mateo 15:7-9; 23:27, 28.

“Mi promé recuerdonan ta e welganan di hamber dje prezunan republicano den Nort,” Patrick ta bisa. “Nan a afectá mi profundamente. Mi ta corda con mi tabata pone bandera irlandes i skirbi lemanan anti-británico riba muraya tur caminda cu mi tabata por. Cu solamente 15 aña di edad, ta ami tabata un guardia n’e entiero di un dje welguistanan cu a muri di hamber den prizon.” Mescos cu hopi otro hende cu a haña nan den gara dje desordu i confusion di nos tempu, Patrick a tuma parti den disturbionan i marchanan di protesta en busca di loke el a mira como husticia i igualdad social. El a bira amigu cerá di bastante nacionalista extremo, di cua hopi a ser encarcelá pa autoridadnan británico.

“Anto,” Patrick ta bisa, “mi a bin haña mi na Inglatera pa un tempu, pa motibunan económico. Tempu mi tabata ei, polis británico a arestá un di mi amigunan cu tabata riba un mision di pone bom.” Maske Patrick a simpatisá hopi cu e causa nacionalista, su actitud a cuminsá cambia. El a cuminsá mira cu su prehuicionan contra tur ingles tabata básicamente infundá. “Tambe mi a cuminsá realisá,” e ta bisa, “cu actividad paramilitar hamas lo a realmente resolvé e problemanan i eliminá e inhusticianan cu tabata molestiá mi. Tabatin demasiado corupcion i otro imperfeccionnan entre esnan cu ta controlá e organisacionnan paramilitar.”—Eclesiástes 4:1; Jeremías 10:23.

Cu tempu Patrick a regresá Nort Irlanda. “Ora mi a bai bek, un amigu a introducí mi na Testigonan di Jehova.” For di su studio di Bijbel cu e Testigonan, Patrick a cuminsá mira e berdadero solucion pa conflicto i desacuerdo humano. El a progresá lihé spiritualmente segun cu e principionan di Bijbel a yega na su mente i curason. (Efesionan 4:20-24) “Awor,” e ta bisa, “en bes di conspirá pa tumba e órden establecí, mi ta haña mi mes ta predicá e mensahe di pas di Bijbel, asta den áreanan lealista (áreanan habitá pa defensornan dje causa nortirlandes) caminda hamas lo mi a risca bai anteriormente. De facto, n’e tempu cu católico i protestant tabata mata otro pa loco na Belfast, e único personanan cu por a move libremente entre e áreanan lealista i nacionalista sin auto blindá tabata e Testigonan di Jehova.” Mescos cu otro Testigonan na Nort Irlanda durante e tempu aki, el a descubrí cu ora bo ta neutral, mescos cu e cristiannan di promé tabata, esei ta un berdadero proteccion. (Juan 17:16; 18:36) E ta concluí: “Bo ta haña un sintimentu di alivio ora bo mira cu mediante Jesucristo, Jehova lo percurá pa berdadero husticia i liberacion for di opresion pa henter humanidad.”—Isaías 32:1, 16-18.

“Mi Skopetnan Tabata Mi Unico Proteccion”

“Mi a lanta n’e otro banda dje muraya político i religioso,” segun William. “Mi tabata absorbá den prehuicio protestant i tabatin un odio intenso contra tur loke ta católico. Si tabata posibel, lo mi no a ni drenta un pacus católico, i mi a bai República di Irlanda un biaha so. Mi a haña mi den vários grupo i institucion protestant, manera e Orden di Orange—un organisacion cu ta dedicá na conserbacion di religion protestant i nan estilo di biba.” Ora William tabatin 22 aña, el a djoin e Régimen di Defensa di Ulster, parti dje ehército británico cu a ser reclutá localmente. Mayoria di su miembronan tabata protestant. E tabata cla pa mata mesora pa defendé su herencia. “Mi tabatin vários skopet i lo no a vacilá pa usa nan si tabata necesario. Anochi, mi tabata warda unu bou di mi cusinchi.”

Pero a bini un punto decisivo. “Mi a cuminsá realisá cu Testigonan di Jehova tabatin algu special cu nan tempu mi a traha huntu cu un di nan riba renobacion di un cas bieu. E colega di trabou aki tabatin un efecto profundo riba mi. Segun cu nos tabata traha huntu riba e cas, mi por a hacié hopi pregunta cu tabata molestiá mi tocante e Turbulencianan, religion i Dios. Su contestanan simpel i cla a yuda mi mira Testigonan di Jehova pa loke nan ta, esta, un grupo di hende uní, no-violento i políticamente neutral, marcá pa amor pa Dios i nan próhimo.”—Juan 13:34, 35.

Cuater luna despues cu William a cuminsá un studio di Bijbel, el a renunciá for di tur e institucionnan religioso i político cu e tabata aden. “Esaki tabata un stap grandi pa mi,” e ta corda, “pasobra mi tabatin cu laga basta tradicion cu mi a stima pa hopi tempu.” Pero, su prueba mayor mester a bini ainda. “Pa motibu dje situacion na Nort Irlanda, mi a haña cu mi skopetnan tabata mi único proteccion. E paramilitarnan di IRA a mira mi como un ‘blanco legítimo.’ Pues tabata masha difícil pa mi laga e armanan aki para.” Tog, gradualmente conseho di Bijbel, manera esun na Isaías 2:2-4, a cambia su punto di bista. El a mira cu al fin i al cabo ta Jehova tabata su berdadero proteccion, mescos cu E tabata p’e cristiannan di promé siglo. Anto William a laga su skopetnan.

“Un dje cosnan cu mi ta realmente contentu p’e,” segun William, “ta cu awor mi tin amistad profundo i duradero cu hende cu un tempu mi a mira como enemigu mortal. Tambe, ta un berdadero fuente di goso pa por hiba Bijbel su mensahe di speransa den áreanan cu ántes mi no por a ni pasa aden. Ora mi meditá riba loke e berdad a haci pa mi i pa mi famia, esei ta haci mi eternamente gradicidu na Jehova i su organisacion.”

“Cosnan Simplemente No Tabatin Sentido”

Robert i Teresa tin antecedentenan totalmente diferente. “Ami ta bini di un famia protestant estricto,” Robert ta bisa. “Algun di mi famianan tabata enbolbí den actividadnan paramilitar. Ami mes a djoin e Régimen di Defensa Ulster di ehército británico cu 19 aña di edad. Mi a pasa gran parti dje tempu ei patruyando e área caminda Teresa tabata biba. Un anochi mi superiornan a transferí mi for di mi patruyahe regular i a duna mi otro tarea. E mes anochi ei enemigunan a rementá e Land Rover cu mi tabata core. Dos soldá a muri i dos otro a keda heridá.”

Robert a cuminsá puntra su mes tocante e nificacion di bida. “Semper mi a kere den Dios, pero ora mi a wak rond Nort Irlanda, cosnan simplemente no tabatin sentido pa mi. En realidad mi a cuminsá resa na Dios. Mi a puntra Dios si e realmente ta existí, i si ta asina, p’e mustra mi e manera corecto pa hiba mi bida. Mi ta corda con mi tabata bisa Dios cu un caminda mester tabatin un religion berdadero!” Djis un par di dia despues, un Testigo di Jehova a bishitá Robert i a laga algun literatura. Ora el a yega cas lat for di patruyá e anochi ei, Robert a cuminsá lesa nan i a caba cinc’or di mardugá. “Mesora mi a reconocé e zonido dje berdad,” e ta bisa, “i mi por a mira cu tur cos tabata bini derechitu for di Bijbel.” (2 Timoteo 3:16) El a cuminsá haña un studio di Bijbel, i den corto tempu, el a dedicá su bida na Dios.

“Semper e Testigonan A Dirigí Nos na Bijbel”

Teresa, di otro banda, tabatin un antecedente católico cu sintimentunan nacionalista profundo. “Como hobencita, mi a djoin Sinn Féin.”b Teresa ta admití: “Dor di esaki mi a haña mi mes ta apoyá actividad paramilitar. Mi a yuda busca fondo p’e lucha militar. Mi a tene IRA informá tocante kico tabata pasa den mi área. Tambe mi a haña mi enbolbí den disturbio i atake cu piedra riba polis i patruyanan armá.”

Ora algun di Teresa su famianan a cuminsá studia Bijbel cu Testigonan di Jehova, su curiosidad tambe a lanta. E poder dje Palabra di Dios a influenci’é bastante. “Semper e Testigonan a dirigí nos na Bijbel pa haña contesta riba pregunta,” e ta bisa. “E promesa na Daniel 2:44 sí a habri mi bista. Mi a mira cu e Reino di Dios tabata e berdadero medio pa eliminá tur inhusticia cu mi tabata lucha contra dje.” El a sinti mas i mas repugnancia pa algun dje crueldadnan cu e paramilitarnan tabata cometé. Por ehempel, Teresa no por a comprendé pakico un hende cu sintimentu di compasion i decencia tabata alegrá ora el a tende di un accion terorista cu a mata of manca soldá of otro hende i laga famianan den hopi pena i angustia. E tambe a respondé n’e berdad den Bijbel i a laga e principionan di Dios ahustá su manera di pensa. El a dedicá su bida na Dios i djis despues el a bautisá.—Proverbionan 2:1-5, 10-14.

Teresa a topa cu Robert ora nan tur dos tabata asistí na reunion na un dje congregacionnan di Testigonan di Jehova na Nort Irlanda. E ta comentá: “Ora mi a topa Robert promé bes, pa ami tabata difícil pa kere cu mi tabata papiando asina calmu i trankil cu un hende cu ami, te cu recien, lo a considerá parti dje mashin di guera británico. Sin duda e Palabra di Dios a yuda mi eliminá odio i prehuicio profundo.” E i Robert a haña cu na lugá di laga odio i prehuicio cu ta originá for di nan tradicion i culturanan diferente dividí nan, awor nan tabatin hopi cos en comun. Esun di mas poderoso di esakinan tabata amor pa Jehova Dios. Nan a casa. Awor nan ta traha huntu pa hiba Dios su mensahe di berdadero pas pa hende di tur antecedente i creencia den e tera turbulento aki.

Otro hende na Irlanda tabatin experencianan similar. Dor di scucha i aceptá e siñansanan dje Palabra inspirá di Dios, nan a scapa for di “filosofia i engaño bano” di hende. (Colosensenan 2:8) Awor nan ta pone nan pleno confiansa den Dios su promesanan registrá den Bijbel. Nan ta contentu pa compartí cu ken cu kier scucha nan speransa di un futuro pacífico—unu cu lo ta totalmente liber di odio entre miembronan di diferente religion i otro clase di violencia.—Isaías 11:6-9.

[Nota]

[Plachinan na página 10]

Hende a alabá e lucha paramilitar cu pintura riba muraya rond Nort Irlanda