Dios Ta Contestá Oracion
Cornelio tabata un homber cu a busca Dios su aprobacion pa medio di oracion frecuente i sincero. Ademas, el a haci bon uso di su posicion como oficial di ehército. Segun Bijbel, “e tabata duna hopi regalo di misericordia” na hende den necesidad.—Echonan 10:1, 2.
E TEMPU ei, e congregacion cristian a consistí di creyente hudiu, prosélito i samaritano. Cornelio tabata un gentil incircuncidá cu no a forma parti di e congregacion cristian. Esei kier men cu su oracionnan tabata en bano? No. Jehova Dios a tuma nota di Cornelio i su obranan compañá pa oracion.—Echonan 10:4.
Mediante guia di angel, Cornelio a bini den contacto cu e congregacion cristian. (Echonan 10:30-33) Como resultado, e cu su hendenan di cas tabatin e privilegio pa bira e promé gentilnan incircuncidá cu a ser aceptá den e congregacion cristian. Jehova Dios a haña cu Cornelio su experencia personal a merecé di ser incluí den e registro bíblico. Sin duda el a haci hopi cambio pa pone su bida na armonia completo cu Dios su normanan. (Isaías 2:2-4; Juan 17:16) E experencia di Cornelio mester ta un animacion masha grandi pa hende di tur nacion cu ta busca Dios su aprobacion awe. Considerá algun ehempel.
Ehempelnan di Nos Tempu
Un señora hóben na India tabatin un gran necesidad di consuelo. El a casa cu 21 aña i e tabatin 2 yu. Pero poco despues cu nan di dos yu a nace, su casá a muri. Di ripiente, cu 24 aña di edad, e tabata un biuda cu un yu muher di 2 luna i un yu homber di 22 luna. Ta claro cu e tabatin mester di consuelo! Na ken e por a acudí? Un anochi, den angustia profundo, el a haci oracion bisando: “Tata celestial, por fabor, consolá mi pa medio di bo Palabra.”
Siguiente mainta e tabatin bishita. Tabata un Testigo di Jehova. E dia ei su sirbishi di cas pa cas tabata difícil, pasobra no tabatin hopi hende cu a habri porta p’e. Cansá i un poco descurashá, e tabata cla pa bai cas, pero algu a motiv’é pa bishitá djis un cas so mas. Ta ei el a topa cu e hóben biuda. E señora a invit’é pa drenta, i a aceptá un publicacion cu ta splica Bijbel. E señora a haña masha consuelo dor di lesa e publicacion ei, i for dje combersacionnan cu e tabatin cu e Testigo. El a siña tocante Dios su promesa di lanta mortonan, i tocante e Reino di Dios cu pronto lo haci tera un paradijs. Mas importante cu tur, el a bin conocé i stima e único Dios berdadero, Jehova, esun cu a contestá su oracion.
Nora, cu ta biba na George, un stad na Sur Africa, a apartá un luna p’e participá den e trabou di evangelisá di tempu completo. Promé cu el a cuminsá, el a suplicá Jehova mashá pa yud’é haña un hende realmente interesá pa studia Bijbel. Den e teritorio cu nan a asign’é pa traha tabatin un cas di un hende cu a trata Nora cu masha mal manera e biahanan cu el a bishit’é. Cu curashi, Nora a bolbe yama n’e cas. Pa su sorpresa, el a descubrí cu un otro hende a bin biba den e cas, Noleen. Pero ademas, Noleen cu su mama tabata haci oracion pa Dios yuda nan comprendé Bijbel. “Ora mi a ofrecé nan un studio di Bijbel,” segun Nora, “nan a keda encantá.” Noleen cu su mama a progresá lihé. Despues, tur dos a cuminsá participá cu Nora den e trabou di curacion spiritual.
Un otro ehempel di e poder di oracion ta esun di un pareha cu ta biba n’e stad surafricano, Johannesburg. Riba un diasabra anochi na 1996, e matrimonio di Dennis cu Carol tabata na punto di kibra. Como último recurso, nan a dicidí di resa pidi yudansa, i nan a sigui resa te anochi lat. Siguiente mainta 11 or, dos Testigo di Jehova a bati na nan porta. Dennis a habri porta anto bisa nan warda pa e yama su casá. Anto Dennis a avisá su casá cu si e laga e Testigonan drenta, por bira difícil pa deshací di nan. Carol a corda Dennis cu nan a resa pidi pa yudansa, i cu kisas ta esaki ta Dios su contesta na nan oracionnan. Pues, nan a invitá e Testigonan drenta, i nan a cuminsá un studio di Bijbel den e buki Conocimentu cu Ta Hiba na Bida Eterno. Dennis cu Carol a keda encantá cu loke nan a siña. E mésun atardi nan a bai nan promé reunion n’e Salon di Reino local di Testigonan di Jehova. Dor di aplicá e conocimentu cu nan a siña for di Bijbel, Dennis cu Carol a haña solucion pa nan problemanan matrimonial. Awor nan ta alabadónan felis i bautisá di Jehova, i nan ta compartí nan creencianan basá riba Bijbel regularmente cu nan próhimo.
Kico si Bo Ta Sinti cu Bo No Ta Digno di Haci Oracion?
Algun hende sincero lo por sinti cu nan no ta digno di haci oracion pa motibu di e mal bida cu nan ta hiba. Jesucristo a conta di un homber asina, un cobradó di belasting despreciá. Drentando e patio di tempel, e homber aki a sinti cu e no tabata digno di bai na e lugá di custumber pa haci oracion. “Pará na un distancia . . . [el] a sigui bati su pechu, bisando: ‘O Dios, sea bondadoso cu mi, un pecadó.’” (Lucas 18:13) Segun Jesus, Dios a scucha e homber aki faborablemente. Esaki ta proba cu Jehova Dios ta misericordioso di berdad, i cu e tin deseo di yuda pecadónan cu repentí cu sinceridad.
Considerá e caso di un hóben surafricano cu yama Paul. Como mucha, Paul a asistí na reunionnan cristian huntu cu su mama. Pero durante su añanan di adolesencia el a cuminsá anda cu hóbennan cu no tabata cana den Dios su caminda. Ora el a caba scol el a bai sirbi den ehército dje régimen di apartheid cu tabatin na Sur Africa. Anto, di ripiente su mucha muher a kibra cuné. E estilo di bida insatisfactorio aki a laga Paul hopi deprimí. E ta conta: “Un anochi, mi a resa na Jehova i a pidi su yudansa, apesar cu mi tabatin hopi aña sin acercá Dios cu sinceridad.”
Poco despues dje oracion aki, Paul su mama a invit’é pa asistí na e conmemoracion anual dje morto di Cristo. (Lucas 22:19) Paul a haña straño cu su mama a invit’é, pasobra e tabata rebelde i a mustra masha tiki interes den Bijbel. “Mi a considerá e invitacion aki como Jehova su contesta na mi oracion, i mi a sinti cu mi mester a haci algu bek.” Djei padilanti, Paul a cuminsá asistí na tur reunion cristian. Despues di studia Bijbel cuater luna el a cualificá pa bautismo. Mas ainda, el a stop cu su studio di ingenieria i a scoge e carera di participá den e trabou di evangelisá di tempu completo. Awe Paul ta un homber felis. E no ta deprimí mas dor di su bida di ántes. Pa e último 11 añanan e ta sirbi na e sucursal di Sociedad Watch Tower na Sur Africa.
Sí, Jehova Dios ta contestá oracion bondadosamente, i e ta bira “e recompensador di esnan cu ta busk’é cu empeño.” (Hebreonan 11:6) Pronto e gran dia di Jehova lo yega i trece fin na tur maldad. Miéntras tantu, Jehova ta contestá e oracionnan cu su pueblo ta haci na dje pa forsa i guia, segun cu nan ta participá cu celo den e trabou vital di duna testimonio. Asina, miyones di persona di tur nacion ta bini den contacto cu e congregacion cristian, i nan ta ser bendicioná cu conocimentu bíblico cu ta hiba na bida eterno.—Juan 17:3.
[Plachi na página 5]
Cornelio su oracion sincero a pone cu apostel Pedro a bishit’é
[Plachinan na página 6]
Oracion a yuda hopi hende pasa dor di tempu di angustia
[Plachinan na página 7]
Ta bon pa resa pidi Dios p’e yuda nos comprendé Bijbel
Parehanan casá por resa pa yudansa pa fortalecé nan matrimonio