Aseptá Konsuelo i Konsolá Otronan

Algu ku por yuda mashá ta e konsuelo ku nos ta risibí di famia, amigu i rumannan den fe.

Palabranan bondadoso i agradabel di un amigu ta manera ungwento suavisante i refreskante. (Pro. 16:24; 18:24; 25:11) Pero kristiannan berdadero no ta pensa solamente riba nan nesesidat pa konsuelo. Nan ta hasi esfuerso pa “konsolá otro hende ku ta den kualke tipo di tribulashon ku e konsuelo ku [nan mes] a risibí di Dios.” (2 Kor. 1:4; Luk. 6:31) Antonio, un superintendente di distrito na México, a eksperensiá esaki personalmente.

Ora Antonio a haña sa ku e tin linfoma, un tipo di kanser di sanger, el a bira masha tristu. Apesar di esei, el a hasi hopi esfuerso pa no desesperá. Kiko e tabata hasi? Entre otro, purba di siña e kantikanan di Reino for di kabes, kanta nan na bos haltu i meditá riba e letranan. Orashon na bos haltu i lesamentu di Beibel tambe a resultá di ta un gran konsuelo p’e.

Pero segun Antonio, ún di e kosnan ku mas a yud’é ta e sosten ku el a risibí di su rumannan den fe. El a bisa: “Ora ami ku mi kasá tabata sinti nos aplastá, nos tabata pidi un famia di nos, ku ta un ansiano den kongregashon, pa bin hasi orashon ku nos. Esaki tabata konsolá i trankilisá nos.” Antonio a sigui bisa: “Bon mira, ta danki na e sosten di nos famianan i nos rumannan den fe ku nos por a surpasá e situashon difísil akí bastante lihé.” El a keda masha gradisidu na su amigunan atento i kompasivo.

Un otro kos ku por yuda nos den tempu difísil ta spiritu santu, esta, e forsa i poder ku Yehova a primintí di duna su sirbidónan. I apòstel Pedro a bisa ku Dios ta duna spiritu santu “libremente.” (Echo. 2:38) Un prueba di esaki ta e echo ku Dios a drama su spiritu santu riba hopi hende na Pentekòste di aña 33 di nos era. Aunke Pedro tabata referí na rumannan ungí, ta nos tur por risibí Dios su spiritu santu. Siendo ku Dios ta duna su spiritu santu na abundansia, pakiko no pidié duna nos esaki abundantemente?—Isa. 40:28-31.

MUSTRA INTERES DEN HENDE KU TA SUFRI

Apòstel Pablo a pasa den hopi tribulashon; tabatin biaha, ku el a asta hera di muri. (2 Kor. 1:8-10) No opstante, e no tabatin un miedu insaludabel di pèrdè su bida. Loke a konsol’é tabata e echo ku e tabata sa ku e por a konta ku Yehova su yudansa. El a skirbi: “Alabá sea e Dios i Tata di nos Señor Hesukristu, e Tata di tierno miserikòrdia i Dios di tur konsuelo, kende ta konsolá nos den tur nos tribulashonnan.” (2 Kor. 1:3, 4) Pablo no a laga e tribulashonnan hasié deprimí. Al kontrario, e pruebanan akí a hasié un persona mas komprensivo, di manera ku e tabata mihó prepará pa yuda otronan den difikultat.

Despues ku Antonio a rekuperá, e por a sigui traha komo superintendente biahero. Semper el a mustra interes den su rumannan den fe, pero awor e ku su kasá tabata hasi esfuerso èkstra pa bishitá rumannan ku ta malu. Por ehèmpel, ora Antonio a bishitá un ruman ku tabata lucha ku un malesa grave, el a haña sa ku e ruman no tabata ke bai reunion mas. Antonio a splika: “No ku e ruman no tabata stima Yehova òf su rumannan den fe mas, pero e malesa a afekt’é asina tantu ku e tabata sintié inútil.”

Pa animá e ruman hòmber akí, Antonio a pidié hasi orashon na un get-together ku nan tabatin resientemente. Maske e ruman a sintié inkómodo, el a aseptá pa hasi orashon. Antonio a bisa: “Su orashon tabata masha bunita, i despues di esei tabata komo di fuera el a bira un otro persona. El a sintié útil atrobe.”

Sí, nos tur a yega di trata ku un òf otro sufrimentu. Pero manera Pablo a bisa, esaki por prepará nos pa konsolá otronan ku ta den un situashon difísil. P’esei, laga nos ta atento pa ora nos rumannan ta sufri, nos por imitá nos Dios, Yehova, i konsolá nan.