TÓPIKO PRINSIPAL | TIN SPERANSA PA HENDE KU A MURI?
Kiko Ta Sosodé ora un Hende Muri?
“Mi tabata pensa ku tin tres kaminda ku un hende por bai ora e muri: shelu, fièrnu òf purgatorio. Mi tabata sa ku mi no ta sufisiente bon pa bai shelu ni dje mal hende ei pa bai fièrnu. Mi no tabata sa sigur kiko ta purgatorio pasobra nunka mi no a lesa nada di esei den Beibel. E úniko kos ku mi tabata sa ta loke hende ta bisa di dje.”—Lionel.
“Nan a siña mi ku tur hende ta bai shelu ora nan muri, pero mi no tabata konvensí di esei. Mi tabata pensa ku morto ta fin di tur kos i ku no tin ningun speransa pa e mortonan.”—Fernando.
Kisas bo a yega di hasi bo mes e siguiente preguntanan: ‘Kiko realmente ta sosodé ora un hende muri? Nos sernan kerí ku a muri ta sufri? Nos lo bolbe mira nan un dia? Kon nos por tin sigur ku lo tin un resurekshon?’ Laga nos wak kiko Beibel ta siña realmente tokante e kondishon di e mortonan i e speransa ku Beibel ta duna.
Den ki kondishon e mortonan ta?
LOKE BEIBEL TA BISA: “E bibunan sa ku nan lo muri, ma e mortonan no sa nada, ni nan no tin rekompensa mas, pasobra ningun hende no ta kòrda mas riba nan. Tur loke bo man haña pa hasi, hasié ku tur bo forsa; pasobra no tin ni aktividat ni planifikashon ni sabiduria den Sheol, kaminda bo ta bai.”a—Eklesiástes 9:5, 10.
Simplemente bisá, Sheol ta referí na e Graf kaminda hende ta bai ora nan muri. Esaki ta un lugá simbóliko òf kondishon den kua hende no ta konsiente ni no por hasi nada mas. Kiko Yòb tabata pensa ku e Graf ta? Den ún dia el a pèrdè tur su kosnan material, tur su yunan i despues el a haña blufein rònt su kurpa ku tabata hasi hopi doló. El a supliká Dios: “O ku lo bo a skonde mi den Sheol [den “fièrnu,” Catholic Douay Version].” (Yòb 1:13-19; 2:7; 14:13) Pues ta klaru ku Yòb no a pensa ku e Graf ta un fièrnu di kandela kaminda lo e sufri mas ainda. Mas bien, el a pensa ku lo e haña alivio einan.
Un otro manera ku nos por haña sa den ki kondishon e mortonan ta, ta ora nos lesa tokante e ocho resurekshonnan ku nos ta haña den Beibel.—Wak e kuadro “Ocho Resurekshon Ku A Tuma Lugá den Tempu Bíbliko.”
Ora e personanan ei a resusitá, ningun di nan no a bisa ku nan a bai shelu ni un lugá di tormento. Si esei tabata e kaso, bo no ta kere ku nan lo a konta hende loke nan a eksperensiá? I bo no ta kere ku e relatonan ei lo ta skirbí den Beibel pa tur hende lesa? Pues, e echo ku Beibel no ta menshoná nada di esei ta mustra ku e ocho personanan ei no tabatin nada di konta ora nan a resusitá. Dikon nò? Pasobra nan tabata inkonsiente, komo si fuera nan tabata den un soño profundo. Sí, tin biaha Beibel ta kompará morto ku soño pa yuda nos komprondé den ki kondishon e mortonan ta. Por ehèmpel, Beibel ta bisa ku tantu David komo Esteban, ku tabata sirbidónan fiel di Dios, “a bai sosegá.”—Echonan 7:60; 13:36.
Pues ki speransa tin pa e mortonan? Nan por lanta for di e soño ei?
a E palabra hebreo “Sheol” i e palabra griego pa “Hades” ta referí na “Graf.” Algun vershon di Beibel ta usa e palabra “fièrnu,” pero e idea ku fièrnu ta un lugá di tormento no ta bíbliko.