Nos Ta “Predicá e Palabra”
1 Exactamente manera Bijbel a describí “e último dianan,” mayoria hende awe tin solamente “un forma di debocion piadoso.” (2 Tim. 3:1, 5) Esaki ta pasobra lidernan religioso no a duna berdadero guia spiritual na nan tou. Clero di cristiandad no ta boga p’e Bijbel. Nan ta preferá di ripití manera lora e siñansanan bano di filósofo i teólogonan of pa plantea cuestionnan social i político mas bien cu predicá e Palabra di Dios. Hopi lider religioso no ta kere den Bijbel. Nan ta sinti cu e ta anticuá i p’esei tercamente ta promové e teoria di evolucion en bes di e Bijbel su siñansa tocante un Magnífico Creador. Mayoria miembro di clero ni sikiera ta usa e nomber personal di Dios i nan no ta lanta ningun obhecion p’e echo cu e ta ser eliminá for di traduccionnan moderno di Bijbel.
2 Manera tabata cierto dje lidernan religioso den tempu di Jesus, clero djawendia ta predicá en bano. (Mat. 15:8, 9) Ta net manera profeta Amos a profetisá. Ta existí “un hamber, no pa pan, i un sed, no di awa, sino pa tende e palabranan di Jehova.” (Amos 8:11) Mas cu cualkier otro cos, hende tin mester dje cuminda spiritual den e Palabra di Dios.
3 Con pa Satisfacé Hende Su Necesidad Spiritual: Pablo a exhortá Timoteo pa pega na “e scrituranan santu, cu por haci [un hende] sabí pa salbacion,” i p’esei Pablo a encargu’é solemnemente pa “predicá e palabra” na otronan. (2 Tim. 3:14, 15; 4:2) Como Testigonan di Jehova, nos mester pega na loke Bijbel ta siña ora nos ta predicá, imitando asina nos Ehempel, Jesus, kende a bisa: “Loke mi ta siña no ta di mi, sino ta pertenecé na esun cu a mandá mi.” (Juan 7:16) Nos ta usa e Palabra di Dios como e base pa nos siñamentu pasobra nos ta reconocé cu e ta contené sabiduria divino, i nos kier pa hende sa cua ta e fuente dje informacion cu nos ta compartiendo cu nan.—1 Cor. 2:4-7.
4 Hende mester tende promé e berdad for dje Bijbel afin di siña tocante Jehova i pone fe den dje. Pablo razonando cu lógica a skirbi: “Con, na nan turno, nan lo pone fe den esun di ken nan no a tende? Con, na nan turno, nan lo tende sin un hende pa predicá?” (Rom. 10:14) Dor di predicá e Palabra di Dios, nos ta yuda otronan adkerí fe mediante conocimentu exacto. Tal conocimentu por i ta cambia bida di hende pa bon. E autor ingles Charles Dickens a skirbi relacioná cu Bijbel: “E ta e mihó buki cu hamas tabatin of cu lo tin na mundu, pasobra e ta siñá bo e mihó lesnan mediante cua cualkier criatura humano cu ta trata di ta verídico i fiel posiblemente por ser guiá.”
5 Esnan cu tin hamber pa berdad spiritual ta yega na reconocé cu e ta ser apoyá dor dje autoridad dje Palabra di Dios. Aya na 1913, nan a duna Frederick W. Franz, como un alumno hóben di universidad, un foyeto chikitu titulá Where Are the Dead? (Unda e Mortonan Ta?) Despues di lesa cu gran interes e contesta bíblico na e pregunta aki, el a declará: “Esaki ta e berdad.” Miyones di buscador dje berdad a yega na sinti mescos. Laga nos sigui predicá e Palabra diligentemente i celosamente, i dje manera ei tene parti den e goso di tende otronan bisa: “Esaki ta e berdad.”