Tur Clase di Hende Lo Ser Salbá
1 Ta Jehova su boluntad “pa tur clase di hende ser salbá i yega na un conocimentu exacto dje berdad.” (1 Tim. 2:4) Aunke hende ta ser influenciá te na cierto grado dor di herencia, antecedente i ambiente social, nan tin boluntad liber i por scoge individualmente con nan lo usa nan bida. Nan por haci loke ta bon i biba, of nan por haci loke ta malu i muri. (Mat. 7:13, 14) Con e comprendimentu aki ta afectá nos punto di bista dje hendenan cu nos ta acercá cu e bon nobo di Reino?
2 Nos no mester presumí cu un persona su interes den e berdad ta ser dictá dor di factornan manera antecedente nacional of cultural of dor di posicion social. E berdad por atraé esnan cu educacion sea limitá of avansá, esnan enbolbí den actividadnan político i profesionalnan, ateistanan, agnósticonan i asta malechornan notorio. Hende di tur antecedente i nivel social a cambia for di nan curso di conducta anterior i awor ta den fila pa ricibí bida den e mundu nobo di Dios. (Pro. 11:19) P’esei, nos no mester vacilá pa acercá hende di tur antecedente social cu e mensahe di Reino.
3 Considerá e Ehempelnan Aki: Un homber a planea pa mata su padrastro pero no a hacié. Mas despues el a dicidí di cometé suicidio pero no tabata por. Despues cu el a cai cerá pa hortamentu i traficacion di droga, su matrimonio a kibra. Awe e persona aki ta ganando su pan onradamente i ta disfrutando di un matrimonio felis i tambe di un excelente relacion cu su padrastro. Kico a pone e situacion cambia? El a studia Bijbel cu Testigonan di Jehova i a aplicá loke el a siña. Jehova no a considerá cu ya e no por a ser rescatá mas.
4 Un muher hóben su fama como actris di television no a dun’é felicidad. Pero siendo cu el a keda impresioná cu e excelente conducta moral dje Testigonan, el a aceptá un studio di Bijbel i pronto e tabata yudando otronan siña tocante e bon nobo di Reino. Tur caminda cu el a bai den e ministerio di cas-pa-cas hendenan tabata reconoc’é, pero contentu di dje e tabata splica cu e kier ta conocí como un Testigo di Jehova en bes di como un actris.
5 Ora un Testigo a haci areglo pa studia Bijbel cu un abonado di E Toren di Vigilancia, un bisiña a tende tocante esei i a asistí n’e studio. E bisiña mesora a reconocé e berdad cu e tabata buscando! E cu su esposo a cancelá un decreto di divorcio cu a ser duná na nan i a reconciliá cu otro. E señora tabata profundamente enbolbí den astrologia i tabata conectá cu un culto spiritista, pero unbes el a tira afó bukinan caru i tur otro cos cu el a poseé cu tabatin di haber cu demonismo. Pronto el a cuminsá asistí n’e reunionnan i papia cu famia i amigunan tocante su creencia nobo. Awor e ta testificá entusiasmá na otronan.
6 Nos no mester tin prehuicio contra ningun hende. Mas bien, laga nos compartí celosamente e bon nobo cu hende tur caminda. Nos tin tur motibu pa tin confiansa cu Jehova, kende “ta mira loke e curason ta,” lo bira e “Salbador di tur clase di hende.”—1 Sam. 16:7; 1 Tim. 4:10.