Caha Di Pregunta

◼ Kico mester haci ora un desaster tuma lugá cu ta afectá nos rumannan directamente?

Si un Desaster Tuma Lugá den Bo Area: No drenta den pánico. Keda calmu, i concentrá riba loke ta berdaderamente balioso—bida, no posesionnan material. Percurá pa e necesidadnan físico inmediato di bo famia. Despues notificá e ancianonan tocante bo circunstancia i na unda bo ta e momento ei.

E ancianonan i sirbidornan ministerial ta hunga un papel crucial den percurá yudansa di auxilio. Si spiertamentu di antemano a ser duná di un desaster, manera den caso di algun orkan grandi, e rumannan aki mester haci sigur cu tur hende ta den un sitio sigur, i si tempu permití, mester obtené i distribuí artículonan di uso cu lo por ta necesario.

Despues dje desaster, conductornan di studio di buki mester localisá cada famia i informá pa nan bienestar. Mester notificá e superintendente presidente of un otro anciano dje situacion di cada famia, asta si tur cos ta bon. Si un persona a ser heridá, e ancianonan lo purba haci areglo p’e haña tratamentu médico. Tambe nan lo percurá cualkier cos material manera cuminda, paña, refugio of artículonan di cas cu tin mester di dje. (Juan 13:35; Gal. 6:10) E ancianonan local lo duna sosten spiritual i emocional n’e congregacion i lo haci areglo mas rápidamente cu ta posibel pa reanudá reunionnan di congregacion. Despues di a haci un evaluacion cabal, un anciano mester tuma contacto cu e superintendente di circuito na nomber dje cuerpo di anciano pa pon’é na haltura di rumannan heridá, daño na e Salon di Reino, of daño na cas dje rumannan, i tambe di cualkier otro necesidad special. E superintendente di circuito e ora ei lo bel e oficina di sucursal cu un informe dje situacion. E oficina di sucursal lo coordiná medidanan di auxilio na gran escala cu ta necesario.

Si un Desaster Tuma Lugá un Otro Caminda: Pidi p’e rumannan dje lugá ei den bo oracionnan. (2 Cor. 1:8-11) Si bo ta deseá di duna yudansa financiero, bo por manda bo donacionnan na Sociedad, caminda tin un fondo di auxilio reservá pa e propósito aki. E adres ta: Watchtower, P.O. Box 4708, Curaçao. (Echo. 2:44, 45; 1 Cor. 16:1-3; 2 Cor. 9:5-7; mira La Atalaya di 1 di december, 1985, página 20-2.) No manda material of artículonan di uso n’e área di desaster aménos cu e rumannan encargá pidi esei specíficamente. Esaki lo sigurá un accion di auxilio ordená i e distribucion corecto di provisionnan. (1 Cor. 14:40) Por fabor, no bel Sociedad innecesariamente, como cu esaki por ocupá e liñanan di telefon cu ta necesario pa ricibí yamadanan cu ta drenta for dje área di desaster.

Despues di a haci un evaluacion apropiado, Sociedad lo determiná si mester forma un comité di auxilio. Lo notificá e ruman hombernan responsabel. Tur ruman mester cooperá cu e ancianonan cu ta hibando e delantera di manera cu e necesidadnan urgente di tur e rumannan ta ser atendé adecuadamente.—Mira Los testigos de Jehová, proclamadores del Reino de Dios, página 310-15.