Reunionnan Ta Incitá na Obranan Excelente
1 Dos rasgo esencial di nos adoracion ta asistí na reunionnan di congregacion i participá den sirbishi di veld. E dosnan ei ta bai man na man. Esun ta influenciá e otro. Reunionnan cristian ta incitá na obranan excelente, di cua esun mas excelente ta e trabou di predicá e Reino i haci disipel. (Heb. 10:24) Si nos mester stop di asistí na reunion, a lo mehor pronto nos lo stop di predicá, pasobra nos lo no ta ser incitá pa haci esei.
2 Na reunionnan semanal, nos ta ricibí instruccion spiritual diseñá pa motivá nos pa predicá. E urgencia dje tempu ta ser enfatisá constantemente, impulsando nos pa hiba e Bijbel su mensahe dunador-di-bida na otro hende. Nos ta ser stimulá i fortalecé pa perseverá den e trabou di predicá. (Mat. 24:13, 14) Dor di haci uso di oportunidadnan pa comentá n’e reunionnan, mas nos ta custumbrá na expresá nos fe dilanti otro hende. (Heb. 10:23) Dor di inscribí den e Scol di Ministerio Teocrático, nos ta ricibí entrenamentu pa ta ministernan mas eficas i pa mehorá nos abilidad di siña.—2 Tim. 4:2.
3 Con Reunionnan di Sirbishi Ta Incitá Nos pa Predicá: Nos tur ta ser animá pa repasá di antemano e material den Nos Ministerio di Reino. E ora ei e informacion aki ta ser grabá den nos memoria ora nos asistí n’e Reunion di Sirbishi i ta mira e presentacionnan ser demostrá riba plataforma. Ora nos ta den sirbishi di veld, nos por pensa bek riba Nos Ministerio di Reino, corda e presentacionnan cu a ser demostrá, i asina duna un testimonio mas eficas. Esaki ta loke hopi publicadó a experenciá.
4 Pa pone na práctica loke nan a siña den Reunionnan di Sirbishi, algun ruman ta traha afsprak cu otronan pa participá huntu den e ministerio. E publicadónan tin e puntonan cu ta práctico pa sirbishi di veld frescu den nan memoria i ta ser stimulá pa purba aplicá nan debí cu e reunionnan aki a animá nan pa participá den e trabou di predicá tur siman.
5 No tin ningun substituto pa nos reunionnan cristian, caminda nos ta reuní cu co-adoradónan i ta ser incitá na obranan excelente. Pa nos ministerio tin bon resultado, nos mester asistí regularmente na e reunionnan di congregacion. Laga nos demostrá aprecio pa e percuracion maraviyoso aki di Jehova dor di no “bandoná nos reunimentu huntu.”—Heb. 10:25.