Jehova Ta Duna Poder Mas Ayá di Loke Ta Normal
1 Un privilegio precioso di sirbishi sagrado—e ministerio cristian—a ser confiá na tur disipel di Jesus. (Mat. 24:14; 28:19, 20) Pero tin biaha imperfeccion humano i e presionnan dje sistema di cosnan aki por pone nos mira nos mes como basta inadecuá.
2 Ora esaki sosodé, nos por haña consuelo for dje carta cu Pablo a manda n’e cristiannan ungí na Corinto. El a skirbi: “Nos tin e tesoro aki den weanan di klei.” (2 Cor. 4:7) Pablo tabata positivo: “Ya cu nos tin e ministerio aki . . . , nos no ta entregá.” (2 Cor. 4:1) Ta cierto cu ta un desafio pa cada un di nos, sea ungí of dje “otro carnénan,” pa sigui declará e bon nobo i ‘no entregá.’ Nos tin mester di fortalesa for di Dios, kende ta suministrá “e poder mas ayá di loke ta normal.”—Juan 10:16; 2 Cor. 4:7b.
3 Ta un animacion cu hopi Testigo ta evangelisadónan celoso apesar di tin cu lucha cu oposicion intenso, problemanan serio di salú of poco recurso financiero. Nos tur mester realisá cu nos asignacion di predicá tin e apoyo di Jehova. En bes di laga desanimacion of temor debilitá nos determinacion pa predicá, laga nos “sigui adkerí poder den Señor i den e potencia di su fortalesa.”—Efe. 6:10; Pro. 24:10.
4 Con pa Adkerí Dios Su Poder: Perseverá den oracion, pidiendo Dios pa su yudansa i fortalesa. (Rom. 12:12; Fil. 4:6, 7) Anto, cu tur bo curason, confia cu Jehova lo percurá poder mas ayá di loke ta normal. (Pro. 3:5) Lesa e biografianan di tempu actual den nos revistanan, pasobra nan ta duna evidencia cu Jehova ta yudando su sirbidónan awe wanta prueba. Mantené un asociacion estrecho cu e rumannan den congregacion, i no laga di bai e reunionnan di congregacion.—Rom. 1:11, 12; Heb. 10:24, 25.
5 Laga nos haci tur loke nos por pa ta den e posicion di ricibí e poder di Jehova—un poder cu ta mas ayá di loke ta normal i cu lo yuda nos pa no entregá di haci e trabou importantísimo di predicá e Reino.