Mustra Respet pa Jehova Su Lugá di Adoracion
1 Ora nos ta huésped den cas di un hende, nos ta mustra respet p’e persona su propiedad, i no ta haci nada pa dañ’é, ni nos no ta interumpí e rutina ordená dje famia di cas. Nos mester comportá nos mes cu asta mas respet ora nos ta huésped di Jehova! Nos lo mester sa con pa comportá nos den su famia di cas. (Sal. 15:1; 1 Tim. 3:15) Sea cu nos reunionnan cristian ta tuma lugá den Salon di Reino, un cas privá of un facilidad público, e gran mayoria di nos semper ta mustra respet pa nos lugá di adoracion como si fuera e ta e cas di Jehova, kende su “dignidad ta riba tera i shelu.”—Sal. 148:13.
2 Algun ruman ta mustra un falta di respet na reunion dor di haci desordu of actua como si fuera e informacion cu ta ser presentá no ta importante. Algun adulto ta combersá innecesariamente den lobi, den baño of pafó di Salon di Reino miéntras cu e reunion ta den progreso. Ora laga un mucha mas grandi supervisá unu mas chikitu, tin biaha nan dos ta cuminsá hunga cu otro i ta saca poco beneficio dje programa. Despues di reunion, a yega di mira algun hóben pafó di Salon di Reino ta hunga, haciendo demasiado desordu i asta ta tira scop estilo di karate contra otro. Den algun caso nan a molestiá bisiñanan of a stroba tráfico den e lugá di parkeer of riba caya.
3 Con pa Evitá di Mustra Falta di Respet: Si nos ta comprendé e dignidad i caracter sagrado di nos adoracion, indudablemente nos lo no kier distraí otronan dor di fluister, come, kouw bals, haci zonido cu papel, bai baño innecesariamente, of yega semper lat pa reunionnan. Mayornan respetuoso i apreciativo no ta permití nan yunan susha e tapijt, stul of murayanan dje Salon di Reino of cas caminda ta tene studio di buki. I sin duda nos tur ta di acuerdo cu no tin lugá pa ningun clase di conducta bergonsoso, ni papiamentu di disparate, ni chistenan obseno na nos reunionnan.—Efe. 5:4.
4 Si nos semper corda e propósito di nos reunionnan cristian, nos lo haci sigur cu nos i nos yunan ta mustra e debido respet pa Jehova su adoracion den e lugá caminda nos “a scoge pa para.”—Sal. 84:10.