‘Sea Generoso, Cla pa Compartí’
1 Siglonan pasá apostel Pablo a instruí Timoteo pa animá compañeronan creyente “pa obra loke ta bon, pa ta ricu den obranan excelente, pa ta generoso, cla pa compartí.” (1 Tim. 6:18) Tambe Pablo a recordá e cristiannan hebreo pa no lubidá “di haci bon i di compartí cos cu otronan.” (Heb. 13:16) Pakico el a skirbi e instruccionnan aki? Pasobra e tabata sa cu lo tin “gloria i onor i pas pa tur hende cu ta obra loke ta bon.”—Rom. 2:10.
2 Como cu Jehova Dios ta e Creador, e ta Doño di tur cos. (Rev. 4:11) Nos sigur ta apreciá loke e ta haciendo cu su pertenencianan na nos fabor. Apesar dje actitud malagradecidu di hopi hende, e Haltísimo ta sigui permití tur hende beneficiá di su percuracionnan generoso pa sostené bida. (Mat. 5:45) El a duna asta su Yu mas stimá como sacrificio pa asina nos por tin bida eterno. E amor aki mustrá na nos no mester impulsá nos pa duna prueba cu nos ta gradicidu dor di ta generoso cu otro hende?—2 Cor. 5:14, 15.
3 Kico Nos Por Compartí? Ta na su lugá pa nos usa cualkier posesion cu nos tin den un manera cu ta agradabel den bista di Dios. Sigur nos kier apoyá e obra mundial di Reino tantu materialmente como spiritualmente. Claro cu e bon nobo ta e tesoro mas balioso cu un hende por tin, pasobra e ta “e poder di Dios pa salbacion.” (Rom. 1:16) Dor di usa nos tempu i recursonan generosamente tur luna pa participá den e trabou di predicá i instruí, nos lo por compartí e tesoro spiritual aki cu otro hende, i asina pone nan riba caminda pa gana bida eterno.
4 Jehova ta keda masha contentu ora nos yuda esnan cu tin tiki cos material. E ta primintí bendicion i tambe e ta recordá nos: “Cosnan balioso lo no ser di ningun beneficio riba e dia di furia, pero husticia mes por libra bo di morto.” (Pro. 11:4; 19:17) Sostené e obra di Reino materialmente i participá plenamente den e predicacion dje bon nobo ta maneranan maraviyoso cu nos por mustra cu nos realmente ta generoso, cla pa compartí.