Caha Di Pregunta

◼ Pakico ta probechoso pa e auditorio busca e textonan ora un orador invitá nan pa haci esei durante su discurso?

Loke ta determiná cuantu texto e orador kisas lo pidi e auditorio busca, ta e tema cu ta ser tratá i si su discurso ta incluí un consideracion versículo pa versículo di un parti dje Palabra di Dios.

Ta importante pa tene na mente cu un motibu pa lesa texto ta pa confirmá cu loke ta ser bisá ta for di Bijbel. (Echo. 17:11) Un otro obhetivo ta pa examiná evidencia bíblico como apoyo pa loke ta ser considerá pa asina fortificá fe di tur presente. Mirando kico en realidad Bijbel ta bisa ora lesa un texto clave, lo haci dòbel impresion riba e mente. Ademas di busca texto, ta probechoso pa tuma nota i keda pareu cu e fluho di ideanan cu ta ser expresá.

Aunke e boskeho di Sociedad kisas ta mencioná hopi texto bíblico pa desaroyá un tema, nan ta poné p’e beneficio dje orador, pa yud’é ora e ta prepará su discurso. E textonan por dun’é informacion rondó dje situacion of yud’é haña un bista cla di principionan bíblico básico i pa comprendé e desaroyo dje tema. E orador ta determiná cua textonan ta vital pa desaroyo dje discurso i ta invitá e auditorio pa siguié den nan Bijbel segun cu e ta lesa i splica e textonan ei. Pa loke ta otro textonan cu ta apoyá e informacion, e orador por djis mencioná nan of expresá den su mes palabra kico nan ta bisa, pero den casonan asina no ta necesario pa e auditorio busca e textonan.

Ora e orador ta lesa texto selectá, e tin cu lesa nan direct for di Bijbel i no for di un blachi caminda a print nan for di computer (esaki ta den caso cu e Traduccion di Mundu Nobo ta disponibel den e idioma dje discursante). Ora e orador invitá e auditorio pa lesa e texto huntu cuné, e ta mencioná bon cla e buki bíblico, e capítulo i e versículo(nan). Dor di pausa pa haci un pregunta of comentá brevemente pakico ta lesa e texto, e ta duna e auditorio tempu pa haña e texto. Tambe dor di ripití e texto, e orador lo yuda e auditorio corda e referencia. Sin embargo, no ta recomendabel pa mencioná e number di página dje texto, ya cu esaki ta dependé dje edicion di Bijbel en particular cu personanan den auditorio ta usando. Busca texto ora e orador invitá pa haci esei ta yuda e auditorio beneficiá dje poder dje Palabra di Dios segun cu e ta ser splicá durante e discurso.—Heb. 4:12.