Ser un Hacidó Felis
1 Jesus a bisa cu durante su presencia, e gran mayoria lo ‘no haci caso,’ mescos cu den tempu di Noe. (Mat. 24:37-39) Pues anto, nos por verwagt cu hopi hende lo no scucha e bon nobo di Reino. Kico por yuda nos mantené un spiritu gososo segun cu nos ta efectuá nos ministerio?—Sal. 100:2.
2 Promé, nos tin cu tene na mente cu tantu nos mensahe como nos comision di predicá ta bini di Dios. Cualkier falta di reaccion den e ministerio, apesar cu nos ta haci nos best ta, si nos wak bon, un rechaso di Jehova. Si nos corda cu nos fieldad den predicá ta ricibí Jehova su sonrisa di aprobacion, esei lo yuda nos mantené nos goso i felicidad interno como hacidó dje palabra di Dios.—Sant. 1:25.
3 Di dos, ainda tin personanan cu lo aceptá Jehova su medio di salbacion. Aunke mayoria hende kisas ta indiferente, ainda tin esnan semehante di carné cu mester ser recogé, asta awor cu nos ta asina leu den e tempu di fin. Nos tin cu sigui predicá, bayendo “den cualkier stad of pueblo” pa busca te cu nos “haña ken ta merecedor den dje.”—Mat. 10:11-13.
4 Mantené un Actitud Positivo: E registro deplorabel di religion falsu a desilusioná algun hende. Otronan a ser “soyá i plamá” dor dje sistema di cosnan aki. (Mat. 9:36) Hopi hende kisas ta sinti nan mes aplastá dor cu nan no tin empleo, cuido médico i siguridad. Comprendiendo esaki lo yuda nos perseverá den nos obra. Purba cuminsá combersacionnan cu ta trata cu e cuestionnan cu mas ta preocupá e hendenan den nos teritorio. Yuda nan mira cu e Reino di Dios ta e único solucion. Usa e Scritura i puntonan specífico den e publicacionnan pa yega na nan curason cu e bon nobo.—Heb. 4:12.
5 Hacidónan felis dje palabra di Dios ta corda semper cu: “E goso di Jehova ta [nos] fortalesa.” (Neh. 8:10) No ta na nodi pa nos perde nos goso. “Si e cas ta merecedor, laga e pas cu boso ta deseá p’e bini riba dje; pero si e no ta merecedor, laga e pas di boso bolbe riba boso.” (Mat. 10:13) Jehova ta renobá nos goso i fortalesa segun cu nos ta perseverá cu pacenshi den su sirbishi sagrado, i e ta bendicioná nos fieldad.