Alabá Yehova dor di Duna Testimonio Informal
1 Yehova su sirbidónan leal ta buska oportunidat pa alab’é tur dia. (Sal. 96:2, 3; Heb. 13:15) Un manera ku nos por hasi esei ta dor di duna testimonio informalmente. Hopi adoradó di Yehova djawe ta gradisidu ku un hende a duna nan e mensahe di Reino mediante testimonio informal.
2 Hopi bes un testimonio informal ta habri kaminda pa otronan tende e mensahe di Reino. Por ehèmpel, Hesus su kòmbersashon ku un muhé samaritano na e pos di Jakòb a pone ku hopi hende mas a mustra interes den e bon nobo. (Juan 4:6-30; 39-42) Ora ku Pablo ku Silas tabata enkarselá na Filipos, nan a duna testimonio na e wardadó di prezu, i tur e hendenan di su kas a aseptá e bèrdat.—Echo. 16:25-34.
3 Oportunidatnan: Ki oportunidatnan bo tin pa duna testimonio informal? Tin ruman ta hasié ora nan ta hasi kompra, ora nan ta usa transporte públiko òf den sala di espera na dòkter. Tin otronan ku ta logra prediká durante pousa na trabou òf na skol. Djis pone un di nos publikashonnan bíbliko kaminda hende por mir’é, kisas ta motivá algun hende pa hasi pregunta tokante nos kreensianan.—1 Ped. 3:15.
4 Kon pa Kuminsá: Un mucha muhé tímido di shete aña a tende na reunion ku ta masha importante pa tur hende prediká. P’esei ora el a bai hasi kompra ku su mama, el a pone dos foyeto den su tas. Miéntras ku su mama tabata atendé ku e kahera, e mucha muhé a bai ofresé un foyeto na un señora, kende a asept’é kortesmente. Ora a puntra e mucha tímido di unda el a saka e kurashi pa aserká e señora, el a kontestá: “Mi a djis bisa den mi mes: Rèdi, Stèdi, Go! I mi a bai!”
5 Pa duna testimonio informal, nos tur mester tin un aktitut manera e mucha muhé ei. Kiko por yuda nos? Pidi Yehova duna bo kurashi pa papia. (1 Tes. 2:2) Prepará un pregunta òf komentario riba un tópiko interesante ku bo por usa pa start un kòmbersashon. Anto konfia ku Yehova lo bendishoná bo esfuerso.—Luk. 12:11, 12.
6 Dunamentu di testimonio informal na hende ku nos ta topa tur dia ta trese alabansa na Yehova i ta duna nos goso. I kisas e por yuda un persona haña e kaminda ku ta hiba na bida eterno.