Repaso di Skol di Ministerio Teokrátiko

Lo konsiderá e siguiente preguntanan oralmente den e Skol di Ministerio Teokrátiko durante e siman ku ta kuminsá dia 25 di òktober 2004. E superintendente di skol lo kondusí un repaso di 30 minüt basá riba e fuente di informashon ku a ser tratá den asignashonnan di e simannan di 6 di sèptèmber te ku 25 di òktober 2004. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]

KUALIDAT DI PAPIA

1. Kon nos por mantené un tono positivo ora di duna un diskurso ku ta trata un aspekto di nos aktividat kristian? [be-PA pág. 203 §3-4] Si nos tin konfiansa ku nos rumannan den fe ta stima Yehova i ke agrad’é, nos palabranan lo reflehá e konvikshon ei. (2 Tes. 3:​4, 5; Flm. 21) Asta ora di duna konseho pa korigí un situashon, e tono di e diskurso por keda positivo si pone mas énfasis riba e manera pa evitá mal kondukta, pa vense difikultat i kon e rekisitonan di Yehova ta brinda nos protekshon. (Sal. 119:​9-⁠11)

2. Kiko ta ripitishon, i dikon e ta importante? [be-PA pág. 206 §1-4] Ripitishon ke men ripití mas ku un biaha ideanan ku bo ke pa bo ouditorio keda kòrda. Yehova Dios i Hesukristu a pone un ehèmpel pa nos den uso di ripitishon. (Deu. 6:⁠5; 10:⁠12; 11:⁠13; Mar. 9:​34-⁠37; 10:​35-⁠45) Si nos oyentenan keda kòrda loke nos bisa, nos palabranan por influensiá nan kreensianan i nan manera di biba.

3. Kon nos por enfatisá e tema di nos diskursonan? [be-PA pág. 210 §1-5, kuadro] Ora di prepará un diskurso, skohe e puntonan prinsipal i datonan sekundario ku realmente lo yuda bo desaroyá e tema. Durante bo presentashon, ripití de bes en kuando sinónimonan di palabra- òf ideanan klave konektá ku e tema.

4. Kon nos por determiná kua ta e puntonan prinsipal pa usa den un diskurso ku nos tin ku duna? [be-PA pág. 212 §1-4] Na promé lugá, nos por determiná kua ta e puntonan prinsipal pa usa dor di pensa ta kiko nos oyentenan sa kaba tokante e tópiko. Na di dos lugá, nos mester tin bon kla na mente e meta ku nos ke logra ora nos ta papia ku e ouditorio. Dor di usa e dos puntonan aki komo guia, nos por evaluá e informashon i keda ku solamente loke ta al kaso.

5. Dikon nos mester perkurá pa no tin demasiado punto prinsipal? [be-PA pág. 213 §3-5] Ta importante pa duna e ouditorio sufisiente tempu pa analisá kada punto prinsipal ya asina nan por graba nan den nan mente. Si nos pensamentunan ta klaramente agrupá bou di djis un par di enkabesamentu prinsipal, i nos desaroyá nan un pa un, e diskurso lo ta fásil pa sigui i fásil pa kòrda.

PARTI NUM. 1

6. Ki desaroyonan promé ku e Diluvio por a pone ku tabata difísil pa hende kere ku tur kos rònt di nan tabata bai kaba? [w02-PA 1/3 pág. 5-6] E sivilisashon promé ku Diluvio tabata papia ún idioma. (Gén. 11:⁠1) Dor ku e tempu ei hende tabata biba pa sentenáres di aña nan por a keda akumulá konosementu i abilidat pa siglonan largu. Kain a traha un stat. (Gén. 4:⁠17) Tambe tabatin logronan riba tereno di arte. (Gén. 4:⁠21) Hende a desaroyá teknologianan, ku a duna inisio na vários tipo di fishi. (Gén. 4:22) Tantu e desaroyonan aki komo hende su estilo di bida a pone ku tabata difísil pa nan presta atenshon na Noe su predikashon te “ku e diluvio a bin i a bai ku nan tur.” (Mat. 24:​38, 39, NW; 2 Ped. 2:⁠5)

7. Dikon ta interesante pa nota ku e hendenan ku a biba den tempu di Hesus no a yam’é “Kurandero” sino “Maestro”? (Luk. 3:12; 7:40) [w02-PA 1/5 pág. 4 §3; pág. 6 §6] Hesus a kura hende ku tur tipo di malesa i desabilidat, i esei a proba ku e tabata e Mesias. Tambe esaki a forma un base pa fe den e promesanan di kurashon den futuro. (Isa. 33:⁠24) Sin embargo, e trabou prinsipal di Hesus tabata pa siña hende kiko lo ta e solushon permanente den futuro pa problemanan di humanidat: e Reino di Dios. (Luk. 4:⁠43)

8. Kon Proverbionan 11:24 i 25 ta enfatisá e balor di partisipá plenamente den sirbishi di vèlt? [w02-PA 15/7 pág. 30 §2-4] Esnan ku ta “repartí” òf kompartí e Palabra di Dios dor di prediká i siña otro hende, ta haña mas komprondementu di e Palabra di Dios i mas apresio p’e. Sin embargo, esun ku no ta usa su konosementu ta kore peliger di pèrdè loke e tin. Pues dor di prediká i siña hende generosamente, nos ta benefisiá i otro hende tambe.

9. Kua kuestion moral e rebelion den Edén a lanta, i kiko tabata e resultado di e rebelion ei? (Gén. 3:1-6) [w02-PA 1/10 pág. 6 §1, 3-4] E kuestion ku a lanta ta ku si Yehova a goberná su kriaturanan korektamente. E Kreadó tabatin derecho di eksigí pa hende obedes’é den tur kos? Hende lo por biba mihó si nan aktua independiente? Rebelion kontra Yehova su soberania a resultá den kondenashon di piká i morto, ku ta ser manifestá den guera, inhustisia i sufrimentu ku a karakterisá historia humano.

10. Kon por determiná e fecha ku adorashon berdadero a keda restorá den Yerusalèm? [si-S pág. 285 §5; km-PA 9/04 3 §5] E reinado di Siro a kuminsá despues ku el a derotá Babilonia na 539 promé ku nos era. Durante e promé aña di su reinado (ku a dura di nisan 538 te na nisan 537), Siro a saka un dekreto pa liberashon di e hudiunan. (Esd. 1:​1-⁠3) Pa “e di shete luna” e hudiunan tabata bèk den nan statnan. (Esd. 3:⁠1) Esei ta kuadra ku e echo ku e hudiunan lo tabatin mester di bastante tempu pa prepará nan mes i pa hasi e biahe. P’esei, e hèrfst di 537 ta wòrdu konsiderá komo e fecha ku adorashon berdadero a keda restorá na Yerusalèm.

LESAMENTU SEMANAL DI BEIBEL

11. Dikon Yehova a rabia ku Balaam, siendo ku ta e mes a mand’é bai ku e hòmbernan di Balak? (Num. 22:20-22) Yehova a bisa Ba­laam ku e no tabatin mag di maldishoná e israelitanan, pero e profeta golos a bai ku e intenshon di hasi nèt esei pa asina e rei moabita Balak rekompens’é. (2 Ped. 2:⁠15; Hudas 11) P’esei, Dios a rabia ku Balaam. Meskos ku Kain, Balaam di un manera kabesura a keda sin hasi kaso di e boluntat di Dios. (Gén. 4:​6-⁠8) [1, w84-S 15/4 pág. 30 §2; w04-PA 1/8 pág. 27 §2]

12. Un esposo por anulá e voto- òf promesanan di su esposa kristian? (Num. 30:6-8) Nò, pasobra Hesus su siguidónan no ta bou di Lei. Pa loke ta trata promesa, awor Yehova ta trata ku hende riba un base individual, i un esposo kristian no tin e outoridat pa anulá òf prohibí esakinan. Klaru ku un esposa kristian no mester hasi un voto ku ta na konflikto ku e Palabra di Dios òf ku e obligashonnan bíbliko ku e tin pa ku su esposo. (Ekl. 5:​2-⁠6) [3, w84-S 15/4 pág. 30 §4; w04-PA 1/8 pág. 27 §3]

13. Kiko e “statnan di refugio” ta simbolisá awe? (Num. 35:6) [w95-PA 15/11 pág. 17 §8] Nan no ta simbolisá sierto sitio geográfiko riba tera. Mas bien, nan ta simbolisá e provishon di Dios pa protehá nos for di morto komo konsekuensia di violashon di su mandamentu tokante e santidat di sanger. (Gén. 9:⁠6)

14. Mester tuma e mandamentu na Deuteronomio 6:6-9 pa ‘mara e lei di Dios komo un señal na bo man i komo un banchi na bo frenta’ komo algu literal? Nò, e palabranan ta indiká ku ta trata aki di un aplikashon simbóliko. (Eks. 13:⁠9; Pro. 7:​2, 3) Tur ora bai e israelitanan mester a tene e mandamentunan di Dios na mente. Nan mester a keda ku e Lei di Dios den nan kurason, siñ’é na nan yunan, i demostrá pa medio di nan akshon (simbolisá pa nan mannan) ku nan tabata warda nan. E pueblo mester a identifiká su mes públikamente komo apoyadó di e Lei di Yehova, komo si fuera e tabata skirbí riba nan frenta pa tur hende mira. [6, w84-S 15/7 pág. 29 §2; w04-PA 15/9 pág. 26 §5]

15. E ekspreshon “bo paña no a gasta” ta nifiká solamente ku e kantidat di paña ku e israelitanan tabatin a wòrdu remplasá pa otro paña? (Deu. 8:4) Nò. E provishon di mana tabata un milager kontinuo. E mesun kos ta konta pa e pañanan ku no a gasta i nan pianan ku no a hincha durante e 40 añanan den desierto. Si ta djis e kantidat di paña a wòrdu remplasá, anto nos no por papia di un milager. [7, w84-S 15/7 pág. 29 §3; w04-PA 15/9 pág. 26 §1]