Kampaña Spesial pa Distribuí e Foyeto Nobo
1 Ounke hopi hende awe ta preokupá ku e kondishon ku mundu ta den, ta poko di nan ta komprondé dikon kosnan ta bayendo asina, kiko tin den futuro i kiko nan tin ku hasi pa sobrebibí e binidero huisio. (Eze. 9:4) Pa yuda nan bira konsiente di e nifikashon di nos tempu, lo tin un kampaña spesial for di djaluna 18 di òktober te ku djadumingu 14 di novèmber pa distribuí e foyeto nobo Keda Vigilá!
2 Por ofresé e foyeto den sirbishi di kas pa kas, ora di hasi rebishita, ora di duna testimonio informal òf riba kaya i den teritorio di negoshi. Sin embargo, e intenshon no ta pa repartí e foyeto Keda Vigilá! pa loko. Mas bien, nos lo laga e foyeto solamente ku hendenan ku ta mustra interes den loke Beibel ta bisa tokante susesonan mundial. Hende ku no mustra muchu interes nos por ofresé un tratado en bes di e foyeto.
3 Lo bo por lanta un persona su interes dor di bisa:
◼ “Hopi hende ta preokupá ku e problemanan serio i susesonan spantoso ku ta masha komun awe. [Menshoná un ehèmpel konosí lokalmente.] Bo tabata sa ku Beibel a profetisá di e kosnan aki? [Permití e persona kontestá. Kaba, lesa un teksto di Beibel ku ta pas ku e ehèmpel ku bo a menshoná, manera Mateo 24:3, 7, 8; Lukas 21:7, 10, 11; òf 2 Timoteo 3:1-5.] Beibel ta papia tokante e nifikashon di nos tempu i tambe loke ta spera humanidat den futuro. Lo bo ke sa mas di esei? [Permití e persona kontestá. Anto ofresé e foyeto si e persona a mustra interes sinsero.] Nos no ta kobra pa e foyeto. Si bo ta deseá di hasi un donashon chikitu pa nos obra mundial, nos lo asept’é gustosamente.”
4 Òf kisas bo ta haña e introdukshon aki efektivo:
◼ “Susesonan spantoso i tragedianan personal tin hopi hende tristu awe. Algun ta puntra nan mes dikon Dios no ta intervení pa prevení e kosnan ei. Beibel ta sigurá nos ku pronto Dios lo aktua pa aliviá humanidat su sufrimentu. Wak ki benefisionan Dios lo trese pa humanidat. [Lesa Salmo 37:10 i 11.] Lo bo tin gana di sa mas?” Konkluí manera ta ser deskribí den e promé presentashon.
5 Purba haña nòmber i adrès di tur persona ku aseptá un ehemplar di e foyeto, i hasi areglo pa bolbe bèk pa kultivá e interes. Nos Ministerio di Reino di novèmber 2004 lo presentá sugerensianan kon pa hasi esaki. Si un persona mustra hopi interes na e promé bishita, kisas bo por kuminsá un studio mesora, usando sea e foyeto Keda Vigilá! òf un otro publikashon, tal bes e foyeto Rekerí.
6 Na final di e Reunion di Sirbishi durante kua lo trata e artíkulo aki lo bo por haña un kantidat di e foyeto nobo. Nos ta sugerí pa publikadónan i pioneronan tuma na promé instante solamente loke nan ta bai tin mester p’e promé dianan di e kampaña. Nos ta spera ku Yehova lo bendishoná e aktividat spesial aki p’e sirbi pa su alabansa i na benefisio di hende di kurason onrado na tur parti mundu.—Salmo 90:17.