Siña Boso Yunan Alabá Yehova
1 Salmo 148:12 i 13 ta animá mucha hòmber i muhé pa ‘alabá e nòmber di Yehova.’ E Skritura ta kontené vários ehèmpel di mucha ku a hasi esei. Por ehèmpel, Samuel “tabata sirbi dilanti di SEÑOR [komo] un mucha.” (1 Sam. 2:18) Ta “un mucha muhé chikitu” a bisa Naaman su esposa ku e profeta di Yehova na Israel por a kura Naaman su lepra. (2 Rei. 5:1-3) Ora Hesus a drenta den e tèmpel i a hasi obranan poderoso, ta “mucha hòmbernan” a grita: “Salba, nos ta roga, Yu di David!” (Mat. 21:15, NW) Kon mayornan por siña nan yunan alabá Yehova?
2 Ehèmpel: Promé ku mayornan israelita a inkulká e bèrdat den kurason di nan yunan, segun e lei, nan mes mester a stima Yehova i warda su mandamentunan den nan mes kurason. (Deu. 6:5-9) Si boso ta papia positivamente tokante e ministerio i ta inkluyé den boso programa semanal, boso yunan lo por siña mira e ministerio komo un trabou importante i satisfasiente.
3 Un ruman muhé ku tin grato rekuerdo di su infansia a bisa: “Tempu ku mi a lanta komo mucha, riba e programa di nos famia tabatin sirbishi di vèlt tur fin di siman. Mi por a ripará ku mi mayornan tabata ègt gusta e trabou di prediká. Nos a krese ku e pensamentu ku e ministerio ta algu plasentero.” E ruman muhé aki a bira publikadó no-batisá ku shete aña di edat i awor e tin kasi 33 aña den sirbishi di tempu kompletu.
4 Entrenamentu Progresivo: Laga boso yunan tambe partisipá ora boso ta den sirbishi. Kisas nan por primi bèl na porta, duna e doño di kas un tratado òf lesa un teksto di Beibel. Esaki lo duna nan mas goso i tambe yuda nan haña e konfiansa ku nan ta kapas pa kompartí e mensahe di Reino. Segun ku nan ta bira mas grandi, nan partisipashon den e ministerio mester oumentá. P’esei, yuda nan progresá i pensa riba metanan spiritual.
5 Asina ku boso sinti ku boso yunan ta kualifiká pa bira publikadó no-batisá i nan mes ekspresá e deseo ei, papia ku e ansianonan. Ora nan bira publikadó, nan lo sinti ku nan tin e responsabilidat personal di alabá Yehova. Kòrda ku un mucha no tin nodi di sa mes tantu ku un adulto batisá p’e por kualifiká pa bira publikadó. Bo yu ta komprondé e siñansanan básiko di Beibel? E ta tene su mes na e normanan moral di Beibel? E ta deseá di partisipá den e ministerio i ser identifiká komo un Testigu di Yehova? Si esei ta e kaso, ansianonan lo por determiná si e ta kualifiká pa ta un publikadó no-batisá.—Wak e buki Organisá pa Hasi Yehova Su Boluntat, página 79-82.
6 No ta fásil pa siña yunan alabá Yehova di kurason; esei ta rekerí esfuerso. Sin embargo, ta masha poko kos por duna mayornan mas goso ku mira nan yunan progresá spiritualmente. Mas importante ainda, Yehova ta keda kontentu ora muchanan ta konta otronan di su obranan maravioso.
[Study Questions]
1. Mucha chikitu por alabá Yehova?
2. Dikon ta importante pa mayornan pone un bon ehèmpel pa nan yunan?
3. Ki benefisio un ruman muhé a saka dje ehèmpel di su mayornan?
4. Kon mayornan por entrená nan yunan progresivamente?
5. Kiko ta nesesario pa un mucha por kualifiká komo un publikadó no-batisá?
6. Dikon ta bale la pena pa mayornan entrená nan yunan?