Kaha di Pregunta

◼ Testigunan di Yehova por distribuí grabashon di diskurso òf kopia di e diskursonan akí?

Diskursonan bíbliko ta fortalesé i animá nos. (Echo. 15:⁠32) P’esei, ta normal ku nos ke kompartí informashon animante ku esnan ku no tabata presente na reunion. Debí ku awendia tin hopi tipo di aparato di grabashon disponibel, ta posibel pa graba i distribuí un diskurso fásilmente. Algun ruman tin kolekshon di diskurso grabá, inkluso diskurso di hopi tempu pasá, i ku bon intenshon nan ta fia òf kopia nan pa nan amigunan. Otronan a pone diskurso riba website ku nan a krea pa asina tur hende por download.

Ta klaru ku no tin nada malu si un ruman graba diskurso pa uso personal òf pa su famia. Ademas, ansianonan por laga graba diskurso pa miembronan di kongregashon ku ta malu i ku no por asistí na reunion. Sinembargo, tin motibunan válido pa no distribuí grabashon ni kopia di diskurso.

Hopi bes ta duna un diskurso ku nesesidat di e kongregashon na mente. P’esei, fásilmente nos lo por mal interpretá puntonan di un grabashon ku ta sirkulá pasobra nos no tin tur detaye. I ta difísil tambe pa saka afó ta ken a duna e diskurso ei i ki tempu, di manera ku nos no por ta sigur ku e informashon ta al dia i eksakto. (Luk. 1:​1-⁠4) Ademas, ora ku distribuí grabashon òf kopia di un diskurso, esei por pone algun sinti nan tentá pa duna òf aseptá indebido atenshon i onor.​—⁠1 Kor. 3:​5-⁠7.

E esklabo fiel i prudente ta traha duru pa proveé sufisiente kuminda spiritual na “su debido tempu.” (Luk. 12:⁠42) Esaki ta inkluí e diskursonan ku nos ta tende na Salòn di Reino i e grabashonnan ku nos por download for di e website ofisial www.jw.org. Nos por tin konfiansa ku e esklabo fiel i prudente i su Kuerpo Gobernante lo proveé loke nos tin mester pa nos por keda spiritualmente fuerte.​—⁠Echo. 16:​4, 5.