Kiko Hende Ta Siña Ora Nan Opservá Bo?

¹ Hesus a bisa: “Tuma mi yugo riba boso, i siña di mi.” (Mat. 11:⁠29) Sin duda, el a siña hende no solamente mediante su palabranan, sino tambe mediante su bon ehèmpel. Pensa un ratu kiko ta e kosnan ku e disipelnan a siña ora nan a opservá Hesus. E tabata suave, bondadoso i amoroso. (Mat. 8:​1-⁠3; Mar. 6:​30-⁠34) E tabata humilde di kurason. (Juan 13:​2-⁠5) Segun ku e disipelnan tabata kompañá Hesus den e ministerio, nan a mira ku e tabata un trahadó inkansabel ku a siña hende e bèrdat na un manera efisiente. (Luk. 8:⁠1; 21:​37, 38) Ki efekto nos tin riba hende ku ta opservá nos den ministerio?

² Doñonan di Kas: Nos moda di bisti modesto, nos bon manera i nos interes personal sinsero por tin un efekto grandi riba doñonan di kas. (2 Kor. 6:⁠3; Fil. 1:⁠27) Nan ta ripará ku frekuentemente nos ta usa Beibel. Otronan ta keda impreshoná ku nos ta skucha ku rèspèt ora nan ta papia. Nunka no balotá e efekto ku un bon ehèmpel den e aspektonan akí por tin. Esaki lo por atraé hende na e mensahe di Reino.

³ Nos Rumannan: Pensa tambe riba e efekto positivo ku nos por tin riba nos rumannan. Nos entusiasmo pa sirbishi ta kontagioso. Meskos ku heru ta mula heru, nos presentashon bon prepará por animá otronan pa mehorá den nan abilidat di prediká. (Pro. 27:⁠17) Nos esfuerso pa mantené un registro eksakto di hende ku a mustra interes i pa rebishitá nan mas pronto posibel por motivá otronan pa hasi meskos. Ora nos kumpli ku nos ministerio plenamente, nos lo tin un bon influensia riba nos rumannan.​—⁠2 Tim. 4:⁠5.

⁴ Pakiko no analisá tempu tempu loke bo ta bisa i hasi, i e efekto ku bo ehèmpel tin riba otro hende? Nos bon ehèmpel lo agradá Yehova i yuda nos sinti loke apòstel Pablo a sinti ora el a bisa: “Sea imitadónan di mi, meskos ku ami tambe ta di Kristu.”​—⁠1 Kor. 11:⁠1.

[Preguntanan di Estudio]

1. Kiko Hesus su disipelnan a siña ora nan a opserv’é?

2. Kon nos moda di bisti i bon kondukta den e ministerio por laga un bon impreshon serka doñonan di kas?

3. Ki efekto positivo nos por tin riba nos rumannan?

4. Dikon tempu tempu nos mester analisá nos ehèmpel?