Sea Konsiente pa Kuminsá Estudio di Beibel

1. Kiko e mandato ku Hesus a duna na Mateo 28:​19 i 20 ta enserá?

¹ Hesus a manda nos ‘hasi disipel i siña nan.’ (Mat. 28:​19, 20) P’esei, nos ke ta konsiente pa kuminsá estudio di Beibel tur ora bai, no solamente riba e dia spesial den wikènt pa ofresé estudio di Beibel. E siguiente sugerensianan kisas por ta práktiko.

2. Na ken nos por ofresé un estudio di Beibel?

² Ofresé Estudio: Mas tantu estudio di Beibel nos ofresé, mas chèns nos tin di haña ún estudio. (Ekl. 11:⁠6) Bo a purba e método direkto? Un kongregashon na Merka a purba hasi esaki durante henter un luna. Esta kontentu nan tabata ku nan por a kuminsá 42 estudio di Beibel nobo! No asumí ku hende interesá sa ku bo ta dispuesto pa duna nan lès di Beibel. Ora bo bolbe e siguiente biaha, pakiko no ofresé un estudio? No ta problema si nan no aseptá e oferta e biaha akí. Bo por sigui kultivá e interes. Bo a puntra bo bisiñanan, famianan, koleganan di trabou i kompañeronan di skol si nan lo ke studia Beibel ku bo? Bo a pensa riba e posibilidat di puntra bo studiantenan di Beibel si nan tin amigu- i famianan ku lo ke un estudio di Beibel?

3. Kua yudansa balioso nos tin pa kuminsá estudionan di Beibel, i kon nos por us’é?

³ Yudansa Balioso: Un yudansa balioso pa kuminsá estudionan di Beibel ta e tratado Bo Ke Haña Sa e Bèrdat? Nos por lag’é serka e doño di kas sea ku el a aseptá literatura òf nò. Tambe nos por us’é ora nos ta traha den teritorionan di negoshi, duna testimonio riba kaya òf via karta i ora nos ta hasi rebishita. Ademas nos por lag’é tambe kaminda no tin hende na kas. Dikon no bai ku un par ora bo ta usa transporte públiko, ora bo ta bai hasi kómpras òf ta bai trabou? E parti patras di e tratado ta splika brevemente tokante nos programa di estudio di Beibel i ta introdusí e buki Beibel Ta Siña.

4. Kon nos por usa e tratado Bo Ke Haña Sa e Bèrdat? pa kuminsá un estudio di Beibel?

⁴ Despues di duna e persona e tratado, bo por hala atenshon na e preguntanan riba e portada anto puntr’é: “Kua di e preguntanan akí ta interesá bo mas?” E ora ei konsiderá kuné e kontesta for di e tratado anto lesa òf menshoná nos programa di estudio di Beibel ku ta aparesé parti patras di e tratado. Ofres’é e buki Beibel ta Siña, mustr’é na unda den e buki tin mas informashon tokante e tópiko i traha afsprak pa sigui ku e kòmbersashon na e siguiente bishita.

5. Dikon nos mester ta konsiente tur ora bai pa kuminsá estudio di Beibel?

⁵ Den nos teritorionan ainda tin hende ku ta anhelá pa sa kiko realmente Beibel ta siña. Si nos ta konsiente tur ora bai pa kuminsá estudio di Beibel, nos lo tin hopi oportunidat pa eksperensiá e goso ku ta bini di yuda otro hende subi riba e kaminda ku ta hiba na bida.​—⁠Mat. 7:​13, 14.