Bo A Yega di Traha Pionero Regular?

1. Ki privilegio hopi ruman tabatin, pero kiko a pasa ku algun di nan?

¹ Atraves di añanan míles di ruman a traha pionero regular i a disfrutá di e privilegio di “siña hende i prediká” e bon notisia. (Echo. 5:⁠42) Sinembargo, pa diferente motibu algun di nan no por a sigui traha pionero. Si bo a yega di traha pionero regular, bo a analisá bo sirkunstansia pa wak si bo por traha pionero atrobe?

2. Dikon ta bon pa e rumannan ku a yega di traha pionero bolbe analisá nan sirkunstansia?

² Sirkunstansia Ta Kambia: Kisas loke ku a pone bo stòp di traha pionero ya no t’ei mas. Por ehèmpel, si bo a stòp debí ku bo no por a yega 90 ora pa luna, bo ta mira e posibilidat di bolbe kuminsá awor ku ta 70 ora so lo bo tin ku traha? Ainda bo tin ku traha henter dia? Bo tin ménos responsabilidat di famia awor? Un ruman muhé ku a stòp di traha pionero pa motibu di problema ku salú, a haña oportunidat di kuminsá bèk na edat di 89 aña. El a sinti ku e por a traha pionero atrobe debí ku el a keda mas ku un aña sin drenta hospital.

3. Kon henter e famia por kooperá pa yuda ún miembro traha Pionero?

³ Kisas abo no a yega di traha pionero regular. Pero, tin un miembro di bo famia ku a stòp di traha pionero pa motibu ku e mester a kuida un miembro di famia, kisas un tata òf mama di edat avansá? (1 Tim. 5:​4, 8) Si ta asina, abo òf otro miembronan di famia lo por hasi mas pa yud’é pa e por bolbe traha pionero? Pakiko no sinta huntu i papia tokante e asuntu? (Pro. 15:⁠22) Ora henter e famia ta kooperá pa ún di nan por traha pionero, nan tur ta sinti ku nan a kontribuí.

4. Kiko bo por hasi si ainda bo no por bolbe traha pionero regular?

⁴ No desanimá si te ainda bo sirkunstansia no ta permití bo bolbe traha pionero. Bo deseo so di traha pionero ya ta agradá Yehova kaba. (2 Kor. 8:⁠12) Sigui usa e abilidatnan ku bo a desaroyá komo pionero den bo sirbishi. Hasi orashon na Yehova tokante bo deseo anto keda alerta pa oportunidatnan ku presentá pa ahustá bo sirkunstansia. (1 Juan 5:⁠14) Kisas ku tempu Yehova lo “habri pa [bo] un porta hanchu” ku ta hiba na mas aktividat, i lo bo por bolbe disfrutá di traha pionero regular!​—⁠1 Kor. 16:⁠9.