Nos Revistanan Ta Prepará pa Atraé Tur Tipo di Hende
1. Kon e esklabo fiel i prudente ta imitá apòstel Pablo?
1 Apòstel Pablo a adaptá su manera di prediká e bon notisia pa e por a gana “tur hende.” Awe e esklabo fiel i prudente tambe ta usa e revistanan pa alkansá hende di diferente background i kreensia. (1 Kor. 9:22, 23) Pa nos por hasi bon uso di E Toren di Vigilansia i ¡Despertad! ta bon pa nos komprondé i kòrda e lektornan pa ken e revistanan a ser prepará.
2. Pa ken e revista ¡Despertad! a ser prepará spesialmente?
2 ¡Despertad!: E meta di e revista akí ta pa alkansá e tipo di hendenan ku ta paresido na esnan ku apòstel Pablo a papia kuné i a yama “hòmbernan di Atenas.” (Echo. 17:22) E hòmbernan ei no tabatin background kristian i nan tabatin masha tiki komprondementu di e Skritura. Awe e revista ¡Despertad! ta ser prepará pa hende ku tin masha tiki òf niun komprondementu di Beibel. Kisas nan no sa nada di e siñansanan kristian i no tin masha konfiansa den religion, òf kisas no ta na haltura di e balor práktiko ku Beibel tin. E meta prinsipal di e revista ¡Despertad! ta pa konvensé hende di e echo ku tin un Dios berdadero. Ademas, e revista akí ta yuda hende haña fe den Beibel i ta yuda e lektor komprondé ku Testigunan di Yehova ta diferente for di otro gruponan religioso.
3. Pa ken spesialmente kada edishon di E Toren di Vigilansia a ser prepará?
3 E Toren di Vigilansia: A prepará e revista akí pa alkansá e personanan ku tin un sierto rèspèt pa Dios i pa e Skritura. Nan tin un poko konosementu di Beibel, pero nan no sa presis kiko e ta siña. Nan por ser kompará ku esnan ku Pablo a yama hende ku ta “teme Dios.” E artíkulonan di estudio den e revista ta prinsipalmente pa Testigunan di Yehova. Pablo a asumí ku esnan ku a lesa su kartanan tabata konosí ku e Skritura i tabatin un konosementu eksakto di e bèrdat. (1 Kor. 1:1, 2) Meskos tambe e artíkulonan di estudio ta skirbí pa esnan ku ya ta asistí na nos reunionnan kaba i ku konosé e palabra- i konseptonan ku e Testigunan ta usa.
4. Dikon nos mester familiarisá nos mes ku kada edishon di e revistanan ku nos ta usa den sirbishi?
4 I maske ku nos tin e kustumber di ofresé nos revistanan dos dos, normalmente den nos presentashon nos ta hala atenshon na un di nan so. P’esei, pone e meta pa familiarisá bo mes ku kada edishon di e revistanan. E ora ei bo por sa mihó kua revista lo atraé e persona ku bo topa.