Yehova Ta Entrená Nos pa Hasi e Trabou Akí

1. Ora Yehova duna hende un asignashon, kiko e ta hasi tambe?

¹ Ora Yehova duna hende un asignashon, e ta perkurá tambe tur loke ta nesesario pa nan por kumpli kuné. Por ehèmpel, ora Yehova a bisa Noe pa traha un arka, un trabou ku nunka el a yega di hasi, El a splik’é tambe kon e mester a hasié. (Gén. 6:​14-⁠16) I ora Yehova a asigná Moises, kende tabata un wardadó di karné humilde, pa bai serka e hòmbernan di edat di Israel i serka Fárao, El a sigur’é: “Ami, sí ami, lo ta ku bo boka i lo siña bo kiko bo mester bisa.” (Éks. 4:⁠12) Di mes manera, Yehova no solamente a asigná nos pa prediká e bon notisia sino tambe ta instruí nos kon pa hasi esei. P’esei, Yehova ta usa e Skol di Ministerio Teokrátiko i e Reunion di Sirbishi pa entrená nos pa por kumpli ku e trabou ei. Awor kon nos por benefisiá di e entrenamentu akí?

2. Kon nos por benefisiá di e Skol di Ministerio Teokrátiko?

² E Skol di Ministerio Teokrátiko: Hasi un bon preparashon di antemano di e informashon ku lo ser konsiderá den e skol. Despues, opservá kon e studiantenan den e skol ta usa e informashon akí den nan parti. Esei lo yuda bo komprondé mihó kon bo mes por usa e informashon pa instruí otro hende. (Pro. 27:⁠17) Ta bon pa bai reunion ku bo buki Skol di Ministerio i us’é komo un buki di tarea. Despues di kada parti, ora e superintendente di skol ta referí na e buki, marka e puntonan klave ku bo ke apliká. Tambe por usa e márgennan pa hasi anotashon. Pero, e mihó manera pa benefisiá di e skol akí ta ora bo ta partisipá den dje. Bo a pidi pa skirbi bo nòmber kaba? Ora bo haña un parti, prepará bon i apliká e konseho ku bo risibí. I ora bo ta den sirbishi, usa loke bo a siña.

3. Kiko por yuda nos pa benefisiá di e Reunion di Sirbishi?

³ E Reunion di Sirbishi: Nos lo keda kòrda e sugerensianan ku nos haña durante e reunion akí mihó ora nos lesa e informashon di antemano i prepará pa por duna komentario. Ora nos duna komentario breve, otronan tambe lo haña chèns pa partisipá. Anto ora nos presta bon atenshon na e demostrashonnan, nos lo por usa e sugerensianan ku por yuda nos bira mas efikas den nos ministerio. Ta bon tambe pa warda artíkulo di Nos Ministerio di Reino ku tin sugerensianan ku lo bo ke usa den bo sirbishi.

4. Dikon nos tin ku hasi bon uso di e entrenamentu teokrátiko ku nos risibí?

⁴ Meskos ku tabata den e kaso di Noe i Moises, nos enkargo pa prediká e bon notisia den henter e tera habitá ta un desafio. (Mat. 24:⁠14) Nos lo tin éksito den esei basta nos dependé riba Yehova, nos magnífiko Siñador, i hasi bon uso di e entrenamentu ku e ta duna nos.​—⁠Isa. 30:⁠20.