Nos Lo Parti Notisia di Reino Num. 38 den Desèmber!
1. Ki preguntanan hende sa hasi tokante morto i kon nos lo kontestá e preguntanan akí den desèmber?
1 Morto ta e enemigu di tur hende, sin importá nan religion òf kreensia. (1 Kor. 15:26) Hopi hende ta puntra nan mes na unda e mortonan ta i si un dia por bolbe mira nan atrobe. P’esei, pa un luna largu kongregashonnan rònt mundu lo bai partisipá den un kampaña spesial pa parti e Notisia di Reino Num. 38, titulá “E Mortonan Por Bolbe Biba?” E kampaña akí lo kuminsá, na e islanan ABC, dia 1 di desèmber. Despues di e luna spesial akí nos lo usa e Notisia di Reino Num. 38 komo un tratado den sirbishi.
2. Kon a diseñá e Notisia di Reino Num. 38?
2 Su Diseño: A diseñá e Notisia di Reino Num. 38 di tal manera ku ora dobl’é den su largura, e portada ta mustra e tema huntu ku e frase “Kiko bo ta pensa? Sí? Nò? Kisas?” Ora e lektor habri e Notisia di Reino, e ta mira loke Beibel ta bisa komo kontesta pa e pregunta ku e tema ta hasi i kiko e promesa akí por nifiká p’e. Pero tambe e ta mira e motibunan dikon e por kere loke Beibel ta bisa. Parti patras di e Notisia di Reino tin un pregunta interesante p’e lektor pensa ariba i ta anim’é pa buska mas informashon.
3. Kon nos lo parti e Notisia di Reino Num. 38?
3 Kon Nos Lo Bai Partié? E kampaña akí lo ta meskos ku e kampañanan pa parti invitashon pa Memorial òf kongreso di distrito. Ansianonan lo informá e kongregashon kon lo kubri e teritorio, di akuerdo ku e karta di 1 di aprel 2013 ku nan a haña. Kongregashonnan ku no tin hopi teritorio por opta pa yuda kongregashonnan den bisindario ku sí tin hopi. Publikadónan tin ku tuma solamente e kantidat di Notisia di Reino ku nan lo usa e siman ei. Kongregashonnan ku kubri tur e kasnan den nan teritorio por laga e Notisia di Reino ku a sobra den áreanan públiko. Si logra parti tur promé ku fin di desèmber, mester ofresé e oferta di luna. Riba e promé djasabra di desèmber nos lo konsentrá riba e kampaña spesial akí en bes di purba kuminsá estudio di Beibel. Den wikènt nos por ofresé revista, kaminda e oportunidat presentá. Abo ta plania pa partisipá plenamente den e kampaña spesial akí?