Un Invitashon Spesial
1. Na ki momento nos lo kuminsá parti invitashon pa e kongresonan di 2014?
1 Ora bo hasi hopi esfuerso i gastu pa prepará un kuminda spesial pa bo amigu- i famianan, no tin duda ku lo bo invitá nan ku entusiasmo. Asina tambe hopi trabou a bai den preparashon di e bankete spiritual ku nos lo haña na nos kongreso di distrito i internashonal di 2014. Tres siman promé ku nos kongreso kuminsá, nos tin e privilegio di invitá hende pa asistí. Kiko por yuda nos hasi esaki ku entusiasmo?
2. Kiko lo motivá nos pa partisipá tur ku tin den e kampaña?
2 Si nos para pensa kuantu nos mes ta benefisiá di e bankete spiritual ku Yehova ta perkurá na nos kongresonan, esaki lo motivá nos pa partisipá tur ku tin den e kampaña. (Isa. 65:13, 14) Tambe nos mester kòrda ku tur aña e kampaña akí ta duna bon resultado, ya ku algun di e hendenan ku nos invitá ta asistí na e kongreso ku nos. Pero, sin importá kuantu hende reakshoná, nos esfuersonan durante e kampaña ta trese alabansa na Yehova i ta mustra kon generoso e ta.—Sal. 145:3, 7; Rev. 22:17.
3. Kon nos lo parti e invitashonnan?
3 Kada kuerpo di ansiano mester determiná kon e kongregashon lo parti e invitashonnan, si entre otro lo laga nan ora no haña hende na kas òf si lo ofresé nan ora ta prediká na lugánan públiko. Den wikènt, si ta apropiá, nos lo ofresé e revistanan huntu ku e invitashon. Si e promé djasabra di luna ta kai den e periodo di e kampaña, nos lo konsentrá riba parti invitashon en bes di kuminsá estudio di Beibel. Despues di e kampaña, nos lo por ta kontentu ku nos a partisipá ku entusiasmo i ku nos a invitá mas tantu hende posibel pa ta huntu ku nos na e bankete spiritual ku Yehova a perkurá.