Kon pa Mehorá Nos Sirbishi: Demostrá Kon pa Dirigí Estudio di Beibel for di e Buki Beibel Ta Siña

Dikon E Ta Importante: Hopi hende kisas no ta komprondé kiko nos ke men ora nos ofresé nan un kurso di Beibel grátis. Kisas nan ta pensa ku nan tin ku partisipá den un grupo di estudio. Òf, e ta laga nan kòrda riba skol: lesa, siña for di kabes, traha hùiswèrk i prufwèrk. P’esei en bes di djis ofresé nan un kurso, dikon no demostrá nan kon e ta bai? Den un par di minüt nos por mustra e persona, asta pará na porta, kon fásil un estudio di Beibel ta bai i kon e por benefisiá di esaki.

Kon pa Hasié:

Despues di introdusí bo mes, puntra e persona si e ta preokupá tokante futuro.
Bis’é ku esei ta algu ku ta preokupá hopi hende. Despues, mustr’é e página di kontenido den e buki Beibel Ta Siña. Splik’é ku e buki ta fásil pa komprondé i ta mustra kiko Beibel ta bisa tokante futuro i otro tópikonan. Puntr’é kua di e kapítulonan e ta haña mas interesante.
Dun’é un ehemplar di e buki i bai na e kapítulo ku el a skohe. Splik’é ku e preguntanan na komienso di e kapítulo lo ser kontestá den e paragrafnan ku ta sigui.
Puntr’é si e ta deseá di lesa e promé paragraf. Lesa e pregunta di e paragraf i buska e kontesta. Buska e tekstonan di Beibel ku ta apoyá e kontesta i analisá nan. Mustr’é kon abo a marka e kontesta den bo buki.
Bai na e siguiente paragraf. Pero e biaha akí pidié pa purba di kontestá ku su mes palabranan.
Elogi’é pa su kontesta i traha un afsprak pa sigui analisá e siguiente paragrafnan.
Si ta apropiá, mustr’é e vidio Kon un Kurso di Beibel Ta Bai? riba e site jw.org.

Purba di Hasi Esaki Durante e Luna Akí:

Pidi Yehova pa bendishoná bo esfuersonan pa kuminsá un estudio di Beibel.—Flp. 2:13.
Den sirbishi, purba di demostrá maske ta un biaha kon nos ta dirigí un estudio di Beibel for di e buki Beibel Ta Siña òf mustra e vidio Kon un Kurso di Beibel Ta Bai?