Abo Lo Imitá e Zelo di Yehova i di Hesus Durante e Temporada di Konmemorashon?

1. Ki èkstra esfuerso Testigunan di Yehova ta hasi durante e temporada di Konmemorashon?

¹ Yehova tin zelo pa kumpli ku su propósito. Refiriendo na algun di e bendishonnan ku e Reino di Dios lo trese, Isaías 9:7 ta bisa: “E zelo di e SEÑOR di ehérsitonan lo hasi esaki.” E Yu di Dios tambe a demostrá zelo pa adorashon berdadero. (Huan 2:13-17; 4:34) Tur aña durante e temporada di Konmemorashon, miónes di Testigu ta hasi èkstra esfuerso pa ta mas aktivo den sirbishi i asina imitá e zelo di Yehova i di Hesus. Abo lo hasi èkstra esfuerso e aña akí?

2. Kiko zelo lo motivá nos pa hasi for di 7 di mart?

² Kampaña di Konmemorashon: E aña akí, e kampaña pa anunsiá e Konmemorashon lo kuminsá djasabra 7 di mart. P’esei, kuminsá plania for di awor pa partisipá ku zelo den sirbishi. Kongregashonnan lo ta yen di entusiasmo ya ku lo bai hasi esfuerso pa kubri mas tantu teritorio posibel. Laga nos hasi nos bèst pa duna studiante di Beibel, rebishita, kolega di trabou, famia i kompañero di skol un invitashon òf usa jw.org pa invitá nan.

3. Kiko nos por hasi pa ta mas aktivo den sirbishi durante mart i aprel?

³ Pionero Ousiliar: Zelo tambe lo motivá nos pa ta mas aktivo den sirbishi. Sin duda, hopi di nos lo por traha pionero ousiliar durante mart i aprel, mirando ku nos tin e oportunidat di skohe pa traha 30 ora. Durante bo Adorashon Komo Famia òf estudio personal, pensa riba kon lo bo por hasi esaki i pidi Yehova p’e guia bo. (Pro. 15:22) Bo entusiasmo pa e kampaña akí por animá otronan pa ta mas aktivo den sirbishi. Si bo ahustá bo programa pa hasi mas, lo bo ta imitando e zelo di Hesus.—Mar. 6:31-34.

4. Ki bendishon nos lo haña ora nos imitá e zelo di Yehova i di Hesus?

⁴ E echo ku nos ta imitá e zelo di Yehova i di Hesus durante e temporada di Konmemorashon lo trese hopi bendishon. Mas hende den e teritorio lo haña testimonio. Ademas, nos lo tin e satisfakshon di sirbi Yehova i otro hende. (Echo. 20:35) I mas importante ainda, nos ta agradá Dios i su Yu.