Kon pa Mehorá Nos Sirbishi: Prediká den Teritorio di Negoshi

Dikon Esaki Ta Importante: Mayoria di hende ta traha oranan largu. P’esei, tin biaha ta mihó pa hiba e mensahe di Reino na nan boka di trabou. Prediká den teritorio di negoshi ta interesante i produktivo pasobra semper tin hende i e trahadónan sa ta masha kortes ku hende ku nan ta mira komo posibel kliente. Pa publikadónan por tin éksito, nan mester usa takto, ser atento i nan mester ta na òrdu i nèchi bistí. (2 Kor. 6:3) P’esei, e superintendente di sirbishi mester paga tinu kon frekuente i kua ta e publikadónan ku ta prediká den teritorio di negoshi.

Kon pa Hasié:

Prepará un presentashon kòrtiku. Si nos tuma muchu tempu di e trahadó, kisas den futuro nos no ta haña chèns mas pa papia kuné.
Pasa na un ora ku e negoshi òf kompania ta ménos drùk, por ehèmpel, ora e kaba di habri.
Purba di papia ku e manager i sea amabel. Bo por bis’é: “Nos ta bishitá hende na nan trabou ya ku no ta fásil pa nos haña nan na kas.” Duna un presentashon kòrtiku i ofres’é un tratado, revista òf un otro publikashon. Ta mihó pa no trese e punto di donashon dilanti, a ménos ku nan ke sa kon nos trabou ta ser finansiá, pa evitá ku nan por konfundí nos ku un salesman.
Si e manager ta amabel, puntr’é si bo por papia brevemente ku e otro trahadónan. Na algun negoshi òf kompania, ta mihó pa puntra si bo por laga algun literatura den kantina.
Sea atento i sea fleksibel. Por ehèmpel, si un trahadó ta papia ku un kliente òf ta okupá, warda te ora e ta kla pa bo aserk’é.

Purba di Hasi Esaki Durante e Luna Akí:

Durante bo siguiente Adorashon Komo Famia, entrená un presentashon kòrtiku ku bo por usa si bo ta traha den teritorio di negoshi.