KON NOS POR YUDA VENSE ODIO?

1 | Sea Imparsial

Loke Beibel Ta Bisa:

“Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.”—ECHONAN 10:34, 35.

Kiko Esei Ta Nifiká?

Yehovaa Dios no ta husga nos a base di nos nashonalidat, koló di kueru òf kultura. Mas bien, e ta enfoká riba loke realmente ta importante—e persona ku nos ta di paden. Sí, “hende ta mira loke un persona ta di pafó, pero Yehova ta wak kurason.”—1 Samuel 16:7

Loke Bo Por Hasi:

Aunke nos no por lesa kurason di hende, nos por purba di imitá Dios su punto di bista imparsial di hende. Purba di mira kada persona individualmente en bes di mira nan komo un grupo spesífiko. Si bo ta ripará ku otro hende, kisas hende di un otro nashonalidat, ta lanta sintimentu negativo den bo, hasi orashon na Dios i pidié pa yuda bo saka e tipo di sintimentunan ei for di bo kurason. (Salmo 139:23, 24) Si bo pidi Yehova di kurason pa yuda bo ta imparsial, bo por tin sigur ku lo e skucha bo orashon i yuda bo.—1 Pedro 3:12.

a Beibel ta bisa ku Dios su nòmber ta Yehova.—Revelashon 4:11.

“Nunka promé mi a yega di sinta banda di un persona koló kla i sinti mi na pas . . . Awor mi a bira parti di un berdadero hermandat internashonal.”—TITUS

Eksperensia—TITUS

A Vense Odio

Titus tabata miembro di un gang violento ku tabatin hopi rabia riba e leinan ku tabata separá hende koló kla for di hende koló skur. El a bisa: “Nos tabata bai na lugánan den stat kaminda hende koló skur no tabatin mag di bai, manera hotèl i bar, djis pa buska pelea.” Titus a rekonosé ku e tabatin hopi odio i ku esei tabata hasié violento. El a sigui bisa: “Si mi tabatin un desakuerdo ku un hende, sea ta hòmber òf muhé, mesora mi kier a bringa.”

Titus a kuminsá hasi kambio ora el a kuminsá studia Beibel ku Testigunan di Yehova. Ora e tabata lesa Beibel, el a kuminsá pensa i sinti diferente. Loke mas a konmov’é ta e promesa ku lo tuma lugá akí riba tera den futuro: “Lo no tin morto mas; ni tristesa ni sklamashon ni doló lo no tin mas.”—Revelashon 21:3, 4.

Na promé instante, Titus a lucha pa saka e odio ku tabatin den su kurason. El a bisa: “Tabata masha difísil pa mi kambia mi manera di pensa i aktua.” Pero, loke a yuda hopi ta e teksto na Echonan 10:34 i 35 ku ta bisa ku Dios no ta hasi distinshon di persona.

Kiko tabata e resultado? Titus a splika: “Ora mi a mira e amor ku Testigunan di Yehova tabatin un pa otro, sin importá nan nashonalidat òf koló di kueru, esei a konvensé mi ku nan ta e religion berdadero. Asta promé ku mi a batisá komo Testigu, un miembro di e kongregashon koló kla a invitá mi na su kas pa kome. Kasi mi no por a kere. Nunka promé mi a yega di sinta banda di un persona koló kla i sinti mi na pas, pero awor mi tabata kome den su kas. Awor mi a bira parti di un berdadero hermandat internashonal.”