KON NOS POR YUDA VENSE ODIO?

3 | Saka Odio For Di Bo Mente

Loke Beibel Ta Bisa:

“Transformá boso mes dor di renobá boso mente, pa boso por komprobá pa boso mes kiko ta e boluntat di Dios, ku ta bon, agradabel i perfekto.”—ROMANONAN 12:2.

Kiko Esei Ta Nifiká?

Nos manera di pensa ta importante pa Yehova. (Yeremías 17:10) No ta sufisiente pa djis evitá di bisa òf hasi algu pa motibu di odio. Odio ta kuminsá den nos mente i kurason. P’esei, nos mester stòp di pensa riba kualke kos ku por lanta sintimentu di odio. Esei ta e úniko manera ku nos por “transformá” nos mes i vense odio.

Loke Bo Por Hasi:

Analisá onestamente kon bo ta pensa i sinti tokante otro hende, spesialmente hende ku ta di un otro nashonalidat. Puntra bo mes: ‘Kiko mi ta pensa di nan? Mi punto di bista ta basá riba loke ami mes sa di nan? Òf e ta basá riba loke otro hende ta pensa di nan?’ Evitá retnan sosial, pelíkula òf entretenimentu ku ta promové odio òf violensia.

E palabra di Dios ta yuda nos vense odio ku ta ankrá den nos mente i kurason

No ta semper fásil pa evaluá nos mes pensamentu- i sintimentunan onestamente. Pero e palabra di Dios por yuda nos “saka pensamentu i intenshon di kurason na kla.” (Hebreonan 4:12) Pues, sigui analisá loke Beibel ta siña. Kompará loke Beibel ta bisa ku loke abo ta pensa, i purba di trese bo pensamentunan na armonia ku loke Beibel ta bisa. E palabra di Dios por yuda nos vense odio ku ta “fuertemente ankrá” den nos mente i kurason.—2 Korintionan 10:4, 5.

Eksperensia—STEPHEN

A Kambia Su Manera di Pensa

Pa motibu di odio, Stephen i miembronan di su famia a ser tratá malu na man di hende koló kla. P’esei, un grupo polítiko ku tabata masha konosí pa nan forma agresivo di defendé derechonan sivil tabatin un influensia grandi riba dje. Ku tempu Stephen tambe a kuminsá kometé krímen motivá pa odio. El a bisa: ‘Ami ku mi amigunan tabata bai wak algun pelíkula ku tabata mustra kon e katibunan afrikano tabata sufri na Merka. E inhustisianan ku nos tabata mira a pone nos rabia asina tantu ku nos tabata ataká e hóbennan koló kla ku tabata den e sala di sine. Despues, nos tabata bai den e barionan di hende koló kla pa buska mas hende pa bati.’

Stephen su punto di bista a kambia kompletamente ora el a kuminsá studia Beibel ku Testigunan di Yehova. El a bisa: “Komo ku mi a mira asina tantu diskriminashon, loke mi a nota entre e Testigunan a impreshoná mi. Por ehèmpel, ora ku un Testigu koló kla mester a biaha pa eksterior, el a laga su yunan serka un famia koló skur pa [e famia ei] kuida nan. Tambe mi a mira kon un famia di Testigu koló kla a laga un yònkuman koló skur, ku no tabatin kas, bai biba serka nan.” Stephen tabata konvensí ku e Testigunan di Yehova ta stima otro di bèrdat, i esei ta loke Hesus a bisa ku lo identifiká su sirbidónan.—Huan 13:35.

Kiko a yuda Stephen pa stòp di ta violento i di odia otro hende? E teksto na Romanonan 12:2 a yud’é. El a bisa: “Mi a realisá ku mi mester a kambia mi manera di pensa. Mi mester a hasi esfuerso pa no djis komportá mi mes na un manera pasífiko sino pa ta pasífiko di kurason.” Awor Stephen tin mas ku 40 aña ta disfrutá di un bida sin sintimentu di odio.