Piedramentu di Esteban

E HÒMBER na rudia ta Esteban. E ta un fiel disipel di Hesus. Pero mira loke ta pas’é awor! E hòmbernan ei ta tir’é ku piedra grandi. Pakiko nan ta odia Esteban asina tantu te ku nan ta hasi un kos teribel asina? Ban mira.

Dios a yuda Esteban hasi milager grandi. E hòmbernan ei no a gusta esei i p’esei nan a kuminsá pleita kuné dor ku e tabata siña e pueblo e bèrdat. Pero Dios a duna Esteban gran sabiduria, i Esteban a mustra ku e hòmbernan ei su siñansa ta falsu. Esei a hasi nan asta mas rabiá. P’esei nan a koh’é i a yama otro hende pa gaña riba dje.

E sumo saserdote a puntra Esteban: ‘E kosnan aki ta bèrdat?’ Esteban a kontestá dunando un bon diskurso bíbliko. Na kabamentu di su diskurso, el a konta kon e mal hendenan a odia e profetanan di Yehova for di leu den pasado kaba. Anto el a bisa: ‘Boso ta meskos ku e hendenan ei. Boso a mata Hesus, e sirbidó di Dios, i boso no a obedesé e leinan di Dios.’

Esei a hasi e lidernan religioso hopi rabiá! Nan a morde riba djente di rabia. Pero Esteban a hisa su kara i a bisa: ‘Mira! Mi ta mira Hesus pará na man drechi di Dios den shelu.’ E ora ei nan a tapa nan orea i a ataká Esteban. Nan a koh’é i lastr’é te pafó di e stat.

Ora nan yega ei, nan ta kita nan mantel i laga nan den kuido di e yònkuman ku yama Saulo. Bo ta mira Saulo? Despues algun di e hòmbernan ta kuminsá piedra Esteban. Esteban ta hinka rudia, manera bo ta mira, i resa na Dios: ‘Yehova, no kastigá nan p’e maldat aki.’ E sa ku e lidernan religioso a gaña algun di nan. Despues di esei, Esteban ta muri.

Ora hende trata bo malu, bo ta paga malu ku malu, òf bo ta pidi Dios kastigá nan? Ni Esteban ni Hesus no a hasi esei. Asta hende ku a trata nan malu nan a trata ku bondat. Laga nos purba sigui nan ehèmpel.