Bo A Pèrdè Trabou? Algun Prinsipio di Beibel Ku Por Yuda Bo
No ta nada fásil ora bo pèrdè trabou. Bo por haña bo ku problema finansiero, i bo bida di famia por ser afektá. Pero no esei so, bo estado emoshonal i mental tambe por ser afektá. Wak kon e siguiente sugerensianan akí por yuda bo. Nan ta basá riba prinsipio di Beibel ku ta práktiko pa nos tempu tambe.
Papia ku otro hende tokante kon bo ta sinti bo.
Loke Beibel ta bisa: “Un amigu ta stima tur ora bai.”—Proverbionan 17:17.
Despues ku bo pèrdè trabou, ta normal ku bo por sinti bo tristu òf rabiá. Tambe bo por sinti ku bo no sa mas kiko pa hasi òf ku bo ta un frakaso. Ora bo konta bo famianan i bo bon amigunan kon bo ta sinti bo, nan por duna bo e sosten emoshonal ku bo mester i asina yuda bo sinti mihó. Ademas, nan por duna bo konseho práktiko ku por yuda bo ora di buska otro trabou.
No sea demasiado anshá.
Loke Beibel ta bisa: “No sea nunka anshá pa e dia di mañan, pasobra e dia di mañan lo tin su mes inkietutnan.”—Mateo 6:34.
Beibel ta mustra ku ta bon pa nos plania adelantá. (Proverbionan 21:5) Pero, Beibel ta konsehá nos tambe pa nos no ta anshá òf demasiado preokupá pa futuro. Hopi biaha nos ta ansha pa kos ku kisas nunka lo sosodé. P’esei, ta mihó nos enfoká riba kada dia.
Beibel por duna bo konseho práktiko ku por yuda bo trata ku strès. Pa haña mas informashon, lesa e artíkulo “Kon pa Trata ku Strès.”
Ahustá bo budget.
Loke Beibel ta bisa: ‘Mi a siña keda kontentu den tur kos, sea ku mi tin abundansia òf mi no tin nada.’—Filipensenan 4:12.
Adaptá bo mes na bo sirkunstansia nobo. Esei ta enserá ku bo tin ku baha man na gastu pa asina bo no gasta mas sèn di loke bo tin. Anto tene kuidou pa bo no traha debe innesesario.—Proverbionan 22:7.
Pa haña mas sugerensia kon pa adaptá na bo sirkunstansia nobo, wak e artíkulo “Siña Kon pa Biba ku Ménos Sèn.”
Hasi bon uso di bo tempu.
Loke Beibel ta bisa: “Sigui kana den sabiduria . . . i usa boso tempu di e mihó manera.”—Kolosensenan 4:5.
Aunke bo no tin ora fiho di trabou mas, ta bon pa bo plania bo dia i hasi bon uso di bo tempu. Esei lo yuda bo mantené un bon rutina di bida i lo bo sinti bo bon i mas sigur di bo mes.
Adaptá bo mes.
Loke Beibel ta bisa: ‘Trabou duru ta trese benefisio.’—Proverbionan 14:23.
Sea dispuesto pa hasi diferente tipo di trabou, asta si e trabou ta otro for di loke bo a kustumbrá kuné. No nenga un trabou djis pasobra e ta parse ménos importante òf ta paga ménos ku bo trabou anterior.
No entregá.
Loke Beibel ta bisa: “Sembra bo simia mainta, i no keda sin hasi nada atardi; pasobra bo no sa si sembramentu di mainta òf di atardi lo tin éksito.”—Eklesiástes 11:6.
Sigui buska trabou. Laga otro hende sa ku bo ta buskando trabou. Por ehèmpel, bo por papia ku bo famianan, bo konosínan, bo eks koleganan di trabou i bo bisiñanan. Bo por bai agensia ku ta yuda hende buska trabou i bo por subi website kaminda sa ofresé trabou. Tambe bo por bishitá website di vários kompania pa wak si nan tin vakatura habrí. Tene kuenta ku kisas bo mester bai vários entrevista i skirbi hopi karta di solisitut promé ku bo haña trabou.