Krísis di Refugiado—Miónes di Hende Ta Hui for di Ukrania

Dia 24 di febrüari 2022, ehérsito militar di Rusia a invadí Ukrania. Komo ku e habitantenan di Ukrania a haña nan ta hui pa e guera, esei a krea un krísis humanitario.a

Nataliia, kende tabata biba na e stat Kharkiv na Ukrania, a konta: “Bòm tabata kai tur kaminda i tabatin hopi eksploshon. Bo no por imaginá kuantu miedu nos tabatin. Ora nos a tende ku tabatin trein pa evakuá hende, nos a disidí di bai mesora. Nos tabatin mag di bai ku un tas pa persona. Kon bo por pone tur loke ta importante pa bo den un tas so? Al final, nos por a bai ku solamente papel importante, remedi, awa i algun ko’i kome. Tur sobrá kos a keda atras. Segun ku bòm tabata kai, nos a bai stashon di trein.”

Nadija, kende tabata biba na e stat Kharkiv, a konta: “Te na último, nos a pensa ku lo no a bini guera. Mi tabata tende kon eksploshon tabata tuma lugá na otro parti di stat, i tur bentana tabata sagudí. Mi a disidí di hui, i m’a bai ku solamente loke tabata nesesario. M’a sali kas 8 or di mainta i kohe trein bai Lviv, i despues mi a kohe bùs bai Polonia.”

E artíkulo akí lo kontestá e siguiente preguntanan:

• Kiko realmente ta algun kousa di e krísis akí di refugiado?

• Ki speransa tin pa refugiado?

• Beibel por yuda refugiado?

Kiko realmente ta algun kousa di e krísis akí di refugiado?

E krísis akí di refugiado na Ukrania a kuminsá pasobra Rusia a invadí Ukrania. Pero Beibel ta mustra ku tin algun otro kousa mas pa esei:

• E gobièrnunan di e mundu akí no a logra pèrkurá pa e nesesidatnan di hende riba tera. Mas bien, hende den puesto di outoridat hopi biaha ta usa nan poder pa oprimí otro hende.—Eklesiástes 4:1; 8:9.

• Satanas, e Diabel, ta “e gobernante di mundu.” E tin asina tantu mal influensia riba humanidat ku Beibel ta bisa ku “henter mundu ta den poder di e Malbado.”—Huan 14:30; 1 Huan 5:19.

• Pa hopi siglo, humanidat a enfrentá tur tipo di problema. Pero awor, nos ta bibando den un tempu ku Beibel a papia di dje di antemano. Na 2 Timoteo 3:1, Beibel ta bisa ku “den e último dianan lo bini tempunan krítiko, difísil pa trata kuné.” Ademas, Beibel a bisa ku e kosnan ku mas nos lo mira den e último dianan akí ta guera, desaster natural, skarsedat di kuminda i epidemia. Tur e susesonan ei ta pone hende hui for di nan pais.—Lukas 21:10, 11.

Ki speransa tin pa refugiado?

Beibel ta mustra ku nos Kreador, Yehova,b ta un Dios ku tin amor i kompashon pa refugiado i pa hende ku ta haña nan obligá ta bandoná nan kas. (Deuteronomio 10:18) Dios ta primintí di solushoná e problema di refugiado mediante un gobièrnu den shelu. Beibel ta yama e gobièrnu akí e Reino di Dios, i lo e remplasá tur gobièrnu di hende. (Daniel 2:44; Mateo 6:10) Yehova lo usa su Reino pa destruí Satanas e Diabel. (Romanonan 16:20) E Reino ei lo goberná henter mundu, i asina lo e kaba ku e fronteranan nashonal ku ta kousa divishon. Henter humanidat lo bira un famia uní. Nunka mas hende lo tin ku hui for di nan kas, pasobra Beibel ta primintí: “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan, pasobra e boka di e SEÑOR [Yehova] di ehérsitonan a papia.”—Mikéas 4:4.

Ta e Reino di Dios so por trese un solushon permanente pa e krísis di refugiado ku nos tin awe. Yehova lo usa su Reino pa kaba ku e problemanan ku ta obligá hende di bira refugiado. Wak algun ehèmpel:

• Guera. “[Yehova] ta hasi gueranan stòp.” (Salmo 46:9) Pa haña sa kon Dios lo kaba ku tur guera, lesa e artíkulo “Kiko Lo Trese Pas na Mundu?”

• Opreshon i violensia. “[Yehova] lo reskatá nan bida for di opreshon i violensia.” (Salmo 72:14) Lesa e seri di artíkulo titulá “Nos Por Vense Odio!” E artíkulo ei ta splika kon hende por kambia nan mal aktitut maske esei por parse difísil.

• Pobresa. “[Yehova] lo libra esun den nesesidat ora ku e sklama pa yudansa.” (Salmo 72:12) Lesa e artíkulo “Ta Realístiko pa Spera un Sistema Ekonómiko Hustu?” (na spañó), i wak kon Dios lo kaba ku e kousanan prinsipal di pobresa.

• Skarsedat di kuminda. “Lo tin abundansia di maishi den e tera.” (Salmo 72:16) Lesa e artíkulo “Un Mundu sin Hamber Ta Posibel?” (na spañó), i wak kon Dios lo sòru pa niun hende no tin ku pasa hamber mas.

Beibel por yuda refugiado?

Sí! Beibel ta duna refugiado un speransa pa futuro, pero tambe e por yuda nan trata ku e difikultatnan ku nan ta enfrentá aworakí.

Beibel ta bisa: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso mente.”—Filipensenan 4:6, 7.

Loke esaki ta enserá: Pidi Dios duna bo pas mental i un kurason trankil den kualke sirkunstansia ku bo haña bo aden. Lesa e artíkulo “Filipensenan 4:6, 7—‘No Sea Anshá Tokante Nada’” (na spañó).