Rusia A Invadí Ukrania

Mainta trempan, dia 24 di febrüari 2022, ehérsito di Rusia a invadí Ukrania. Vários lider rònt mundu a purba di evitá e guera ei, pero nan no a logra. Ki efekto e guera akí lo por tin riba mundu? Algun dia pasá, António Guterres, sekretario general di Nashonnan Uní, a bisa: “Nos no kier pensa mes kuantu hende lo sufri i kuantu daño i destrukshon esaki lo kousa i kon lo e afektá siguridat di Europa i di mundu.”

Segun Beibel, kiko e tipo di susesonan akí ta indiká?

• Hesukristu a profetisá ku lo yega un tempu ku “nashon lo lanta kontra nashon i reino kontra reino.” (Mateo 24:7) Beibel ta mustra ku e gueranan den nos tempu ta kumpli ku Hesus su profesia. Lesa e artíkulo “Kiko Ta e Señal di “e Último Dianan,” òf di “e Tempu di e Fin”? pa mira esei.

• Den e buki bíbliko Revelashon, guera ta ser deskribí komo un koredó di kabai sintá riba ‘un kabai koló di kandela’ ku ta “kita pas for di riba tera.” (Revelashon 6:4) Lesa e artíkulo “E Kuater Koredónan di Kabai—Ken Nan Ta?” i lo bo mira kon e profesia akí ta apliká na e gueranan den nos tempu.

• E buki Daniel a profetisá un rivalidat entre “e rei di nort” i “e rei di zùit.” (Daniel 11:25-45) Wak e vidio Kumplimentu di Profesia—Daniel Kapítulo 11, i lo bo haña sa dikon nos por bisa ku Rusia i su aliadonan ta e rei di nort.a

• Revelashon ta deskribí tambe “e guera ku lo tuma lugá riba e gran dia di Dios, e Todopoderoso.” (Revelashon 16:14, 16) Pero esaki no ta un guera entre e nashonnan, manera nos ta mira ta pasa awe. Lesa e artíkulo “Kiko e Guera di Armagedon Ta?” E artíkulo ei ta duna mas informashon tokante e guera ei ku lo tuma lugá den futuro.

Dikon bo por tin speransa ku lo tin un mihó futuro?

• Beibel ta bisa ku Dios lo kaba ku guera tur kaminda riba tera. (Salmo 46:9) Pa haña sa mas tokante e futuro ku Dios ta primintí, lesa e artíkulo “Speransa pa un Mihó Futuro” (na spañó).

• Hesus a siña su disipelnan pidi pa Dios su Reino bini. (Mateo 6:9, 10) E Reino ei ta un gobièrnu den shelu ku lo kumpli ku Dios su boluntat riba tera. Anto algu ku sigur ta e boluntat di Dios ta pas mundial. Bo kier sa kon e Reino ei por benefisiá bo? Wak e vidio Kiko e Reino di Dios Ta?

Tin mas ku 129.000 Testigu di Yehova ta biba na Ukrania. Meskos ku e Testigunan di Yehova na tur otro pais, nan ta imitá Hesus. Nan ta keda neutral den asuntu polítiko, i nan no ta partisipá den guera. (Huan 18:36) Rònt mundu, Testigunan di Yehova ta sigui prediká ku ‘e bon notisia di e Reino’ ta e úniko solushon pa e problemanan di humanidat, i esei ta inkluí guera. (Mateo 24:14) Por fabor, tuma kontakto ku nos pa bo siña mas tokante e mensahe di Beibel ku ta duna nos speransa.