Kiko Beibel A Profetisá Tokante Temblor Grandi?

Tur aña míles di temblor ta tuma lugá. Mayoria di temblor ta chikitu, pero algun temblor ta asina grandi ku nan por kousa hopi destrukshon, sufrimentu i morto. Tin biaha, e temblornan akí ta kousa tsunami, destruí área kantu di kosta i kaba ku bida di hopi hende ku ta biba einan. Beibel a profetisá tokante e temblornan akí?

E artíkulo akí lo kontestá e siguiente preguntanan:

Beibel a profetisá tokante temblor?

Un Beibel habrí. Den fondo tin planeta Tera i un aparato di midi temblor ku ta registrá e intensidat di un temblor.

Beibel ta papia di temblor den un profesia ku Hesus a menshoná. Nos por lesa loke el a bisa tokante temblor den e siguiente tres bukinan di Beibel:

“Nashon lo lanta kontra nashon i reino kontra reino, i lo tin skarsedat di kuminda i temblor den un lugá tras di otro.”—Mateo 24:7.

“Nashon lo lanta kontra nashon i reino kontra reino; den un lugá tras di otro lo tin temblor; lo tin skarsedat di kuminda.”—Marko 13:8.

“I lo tin temblor grandi, i den un lugá tras di otro lo tin pèst i skarsedat di kuminda.”—Lukas 21:11.

Pues, Hesus a bisa di antemano ku lo tin “temblor grandi den un lugá tras di otro,” i na mes momento, lo tin guera, skarsedat di kuminda i pèst tambe. Tur esakinan ta marka un periodo den historia humano ku yama “konklushon di e era akí,” òf “e último dianan.” (Mateo 24:3; 2 Timoteo 3:1) Segun kronologia di Beibel, “e último dianan” a kuminsá na 1914 i no a kaba ainda.

E temblornan den nos tempu ta kumplimentu di profesia di Beibel?

Mapa ku ta mustra kaminda tabatin temblor grandi riba tera.

Sí. Loke Hesus a profetisá, ku ta inkluí loke el a bisa tokante temblor, ta kuadra ku e susesonan ku nos ta mira den nos tempu. For di 1914, tabatin mas ku 1.950 temblor grandi ku a kousa morto di mas ku dos mion hende.a Wak algun ehèmpel di nos tempu.

2004—Oséano Indio. Un temblor di un magnitut di 9,1 a kousa un tsunami ku a asotá mas ku 10 pais i mata mas o ménos 225.000 hende.

2008—China. Un temblor di un magnitut di 7,9 a destruí pueblo i siudat. Segun kálkulo, 90.000 hende a pèrdè nan bida, alrededor di 375.000 hende a ser heridá i miónes di hende a pèrdè nan kas.

2010—Haiti. Un temblor di un magnitut di 7,0, siguí pa diferente temblor chikitu a mata mas ku 300.000 hende i laga mas ku un mion hende sin kas.

2011—Hapon. Un temblor di un magnitut di 9,0 i vários tsunami a resultá den morto di mas o ménos 18.500 hende i míles di hende mester a bandoná nan kas. Planta di koriente Fukushima a sufri daño, i esei a hiba na un aksidente nuklear grandi. Dies aña despues, mas o ménos 40.000 hende ku tabata biba serka di e planta ei ainda no por a bai nan kas bèk debí na e nivel haltu di radiashon peligroso.

Kiko profesia di Beibel tokante temblor ta nifiká pa nos?

Un pareha ta kana man tené segun ku nan ta spera riba un futuro briante.

Profesia di Beibel tokante temblor ta spièrta nos tokante loke lo sosodé den futuro serkano. Hesus a bisa: “Ora boso mira e kosnan akí sosodé, boso por ta sigur ku e Reino di Dios ta serka.”—Lukas 21:31.

Beibel ta splika ku e Reino di Dios ta un gobièrnu real den shelu ku Kristu Hesus komo Rei. Hesus a siña su siguidónan pidi pa e Reino akí den orashon.—Mateo 6:10.

Ora e Reino di Dios goberná tera, Dios lo hasi sigur ku desaster natural, manera temblor, lo no hasi daño na hende. (Isaías 32:18) Ademas, Dios lo kura tur daño físiko i emoshonal ku temblor ta kousa den nos tempu. (Isaías 65:17; Revelashon 21:3, 4) Pa haña sa mas, lesa e artíkulo “Kiko e Reino di Dios Lo Hasi?”

a E sifranan ta bini for di Global Significant Earthquake Database ku ta ser aktualisá pa United States National Geophysical Data Center.

Idea robes tokante profesia di Beibel i temblor

Idea robes: Nos no ta biba den un tempu úniko pasobra semper tabatin temblor.

Echo: Beibel a bisa di antemano ku lo tin temblor i tambe vários suseso ku huntu ta mustra ku nos ta biba den e último dianan. Pa haña sa mas, wak e artíkulo “Kiko Ta e Señal di ‘e Último Dianan,’ òf di ‘e Tempu di e Fin’?”

Idea robes: Temblor den nos tempu ta kastigu di Dios.

Echo: Temblor ta kaba ku tantu bon hende komo mal hende. Esnan ku muri hopi biaha ta na e lugá robes i na e momento robes. (Eklesiástes 9:11) Pa haña sa dikon e desasternan natural akí no ta kastigu di Dios, wak e artíkulo “Kiko Beibel Ta Bisa Tokante Desaster Natural?”

Idea robes: E buki di Beibel Revelashon ta bisa ku temblor lo destruí tera.

Echo: E buki di Beibel Revelashon ta referí na temblor den e siguiente versíkulonan: Revelashon 6:12; 8:5; 11:13, 19 i 16:18. Sinembargo, a skirbi e profesia di e buki akí “den forma di símbolo,” pues, e temblornan akí no ta literal pero figurativo. (Revelashon 1:1) Pa haña sa mas, wak e artíkulo “E Buki di Revelashon—Kiko Ta Su Mensahe?”