Bida Lo Bira Bèk Manera E Tabata Promé Ku e Pandemia? Kon Beibel Por Yuda Nos?

“Nos tur ke pa bida bira bèk manera e tabata promé.”—Angela Merkel, kansier aleman.

Segun ku e pandemia di COVID-19 ta sigui afektá hende rònt mundu, kisas bo tambe ta di akuerdo ku loke el a bisa. Pero ora hende bisa ku nan ke pa bida bira bèk manera e tabata ántes, kiko nan ke men? Kiko nan tin gana di hasi atrobe?

• Biba manera nan tabata biba promé ku e pandemia. Tin hende lo tin gana di pasa mas tempu ku otro hende. Nan ke un bida kaminda nan por brasa otro, duna man i biaha. Manera dr. Anthony Faucia a bisa, nan ta sinti ku “bida promé ku e pandemia [òf un bida normal],” ta enserá bai “restorant, teater [i] e tipo di kosnan ei.”

• Mehorá nan bida. Tin hende ta mira esaki komo un oportunidat pa kambia nan bida i hasié mihó ku e tabata promé ku e pandemia. Nan ta sinti ku tin kos ku mester kambia, manera trabou ku ta eksigí muchu tempu i energia, trato inhustu pa motibu di nashonalidat òf posishon sosial i e echo ku mas i mas hende ta sufri pa motibu di problema mental. Klaus Schwab, fundadó di World Economic Forum, a bisa: “E pandemia ta duna nos un oportunidat úniko pa pensa riba nos bida i kon nos ke pa e mundu bira i despues hasi e kambionan nesesario. No ta semper nos lo tin e oportunidat ei.”

Algun hende a haña nan ku asina tantu problema pa motibu di e pandemia ku nan ta sinti ku bida nunka lo no bira bèk manera e tabata promé. Por ehèmpel, algun di nan a pèrdè nan trabou, pèrdè nan kas, haña nan ku problema di salú òf asta pèrdè sernan kerí den morto.

Klaru ku ningun hende no por bisa eksaktamente kon bida lo ta despues di e pandemia. (Eklesiástes 9:11) Sinembargo, Beibel por yuda nos pensa tokante futuro na un manera realístiko i yuda nos trata ku kualke kos ku sosodé. Ademas, Beibel ta papia di un futuro ku nos por tin sigur di dje. Un futuro ku kisas nunka bo no a imaginá.

E punto di bista korekto di e pandemia di COVID-19

Hopi tempu pasá, Beibel a bisa ku lo tin malesa òf “pèst” na un lugá tras di otro durante e “konklushon di e era akí.” (Lukas 21:11; Mateo 24:3) Si nos mira e pandemia di COVID-19 for di e punto di bista ei, nos lo realisá ku e pandemia ta un di e kosnan ku Beibel a bisa ku lo tuma lugá, manera guera, temblor i hamber.

Dikon ta importante pa nos sa esei? Aunke ku situashon di e pandemia aktual por mehorá, Beibel ta spièrta nos ku nos ta bibando den “tempunan krítiko, difísil pa trata kuné.” (2 Timoteo 3:1) Ora nos sa esei, nos por tin un punto di bista realístiko di kon bida lo ta den e tempu difísil akí.

Beibel ta duna nos e punto di bista korekto: Nos mundu ku ta yen di difikultat i problema pronto lo bai kambia. Ki kambio lo tuma lugá?

Un futuro ku kisas bo no a imaginá

Beibel no a papia solamente di e problemanan serio ku nos ta enfrentando awor sino tambe di e mihó tempu ku lo bini pronto. Beibel ta deskribí un futuro ku Dios so por hasi bira realidat, un futuro ku ta muchu mas mihó ku loke gobièrnu humano lo por logra. “Lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.”—Revelashon 21:4.

Yehovab Dios ta primintí: “Tende! Mi ta traha tur kos nobo.” (Revelashon 21:5) Lo e solushoná e problemanan di e mundu akí, inkluso e problemanan ku a bira pió pa motibu di e pandemia. Lo e sòru pa lo siguiente:

• Salu físiko i mental perfekto. Lo no tin malesa ni morto mas.—Isaías 25:8; 33:24.

• Trabou satisfaktorio, no trabou ku ta eksigí asina tantu ku hende ta keda sin energia.—Isaías 65:22, 23.

• Un bida próspero pa tur hende. Lo no tin pobresa ni hamber mas.—Salmo 72:12, 13; 145:16.

• Lo no tin doló emoshonal mas, i nos lo tin e speransa di mira nos sernan kerí ku a muri atrobe.—Isaías 65:17; Echonan 24:15.

Dikon ta importante pa nos sa esei? Beibel ta bisa: “Nos tin e speransa akí manera un anker pa nos alma [òf bida].” (Hebreonan 6:19) E speransa ku kos lo bira mihó ta yuda nos trata ku e situashonnan difísil awe, ta yuda nos trata ku strès i ta yuda nos keda kalmu i felis.

Pero bo por kere ku e promesanan den Beibel realmente lo kumpli? Wak e artíkulo “Beibel Ta un Fuente Konfiabel di e Bèrdat.”

Prinsipio di Beibel ku por yuda nos trata ku situashon ku por presentá despues di e pandemia

• Balorá bida

  Teksto: “Sabiduria ta preservá bida di esnan ku ta pose’é.”—Eklesiástes 7:12.

  Kon bo por apliká e prinsipio akí? Tuma bon desishon pa bo tin ménos chèns di bira malu. Evaluá e situashon kaminda bo ta biba. Keda na altura di e reglanan ku gobièrnu ta pone, e kantidat di hende ku ta kontagiá i e porsentahe di e poblashon ku ta kompletamente bakuná.

• Sea kouteloso

  Teksto: “Un hende sabí ta kouteloso, i ta apartá su mes for di maldat, ma e bobo ta arogante i sin kuidou.”—Proverbionan 14:16.

  Kon bo por apliká e prinsipio akí? Sigui hasi loke ta nesesario pa kuida bo salú. Ekspertonan ta pensa ku e corona vírùs lo sigui eksistí pa hopi tempu.

• Usa informashon konfiabel

  Teksto: “E hende simpel ta kere tur kos, ma e hòmber prudente ta wak bon unda e ta bai.”—Proverbionan 14:15.

  Kon bo por apliká e prinsipio akí? Skohe bon ki konseho lo bo sigui. Bo desishon ta importante. Bo por afektá bo salú si bo tuma desishon basá riba informashon robes.

• Keda positivo

  Teksto: “No bisa: ‘Pakiko e dianan di ántes tabata mihó ku esakinan?’ Pasobra no ta for di sabiduria bo ta puntra esaki.”—Eklesiástes 7:10.

  Kon bo por apliká e prinsipio akí? Sea determiná pa biba e mihó bida posibel den bo situashon aktual. Evitá di pensa ku bida tabata hopi mas mihó ku realmente e tabata promé ku e pandemia i no sigui pensa riba e kosnan ku bo no por a hasi pa motibu di e pandemia.

• Respetá otro hende

  Teksto: “Onra tur sorto di hende.”—1 Pedro 2:17.

  Kon bo por apliká e prinsipio akí? No ta tur hende ta reakshoná meskos riba e pandemia i su konsekuensianan. Respetá nan opinion, pero na mes momento, no kambia e bon desishonnan ku abo a tuma. Tene konsiderashon ku hende ku no ta bakuná, hende di edat òf hende ku tin problema serio di salú.

• Tene pasenshi

  Teksto: “Amor tin pasenshi i ta bondadoso.”—1 Korintionan 13:4.

  Kon bo por apliká e prinsipio akí? Ora otro hende tin miedu pa hasi algu ku tabata normal promé ku e pandemia, sea bondadoso ku nan. Si bo ta sinti ku ta difísil pa bo kuminsá hasi algun kos bèk ora ku e situashon mehorá, tene pasenshi ku bo mes.

Kon Beibel ta yudando hende trata ku e pandemia?

Komo ku Testigunan di Yehova sa di e bunita promesanan ku Beibel tin pa futuro, esei ta duna nan konsuelo i ta yuda nan pa wak mas aleu ku e pandemia. Ademas, Testigunan di Yehova ta animá otro ora nan ta sigui Beibel su mandamentu pa reuní regularmente pa adorá Dios. (Hebreonan 10:24, 25) Tur hende ta bon biní pa asistí na e reunionnan di Testigunan di Yehova ku ta tumando lugá virtualmente durante e pandemia.

Algun hende ta di akuerdo ku e reunionnan di Testigunan di Yehova a yuda nan masha hopi mes durante e tempu difísil akí. Por ehèmpel, un señora ku a haña COVID-19 a aseptá un invitashon pa konektá ku e reunionnan virtual di Testigunan di Yehova. E reunionnan akí a yud’é emoshonalmente aunke ku e mester a sigui trata ku e problemanan di salú ku e vírùs a kousa. Mas despues el a bisa: “Mi ta sinti ku mi tambe ta parti di e famia akí. Ora mi lesa Beibel, mi ta haña pas mental i mi ta sinti mi trankil. Beibel ta yuda mi enfoká riba mi speransa pa futuro en bes di riba mi problemanan. Danki pa yuda mi hala serka Dios, pasobra esei ta loke mi kier a hasi henter mi bida.”