Tiroteo na Skol—Kiko Beibel Ta Bisa?

Dia 24 di mei 2022, un tragedia teribel a tuma lugá na Merka, na e pueblo Uvalde na Texas. E korant The New York Times a bisa ku “un hòmber armá a mata 19 mucha i dos yùfrou di skol . . . na Robb Elementary School.”

Ta masha lamentabel ku e tipo di susesonan ei ta tuma lugá asina tantu den nos tempu. E korant USA Today a indiká ku na Merka so “tabatin 249 tiroteo na skol aña pasá. For di 1970, nunka tabatin asina tantu tiroteo den un solo aña.”

Dikon e kosnan horibel ei ta tuma lugá? Kon nos por trata ku e situashonnan horibel ei? Tin speransa ku lo yega un fin na violensia? Beibel ta kontestá e preguntanan ei.

Dikon mundu ta birando mas i mas violento?

•  Beibel ta bisa ku nos ta bibando den “e último dianan.” Beibel ta bisa tambe ku den e tempu akí hopi hende lo no tin “kariño,” i nan lo ta “feros.” Nan lo hasi kos kruel i violento. I e hendenan ku tin un aktitut asina lo “bai di malu pa pió.” (2 Timoteo 3:1-5, 13) Pa haña mas informashon tokante esaki, lesa e artíkulo: “Beibel A Bisa Kon Hende Lo Pensa i Aktua den Nos Tempu?”

Hopi hende ta puntra nan mes: ‘Dikon Dios no ta hasi algu pa prevení suseso horibel manera tiroteo na skol?’ Si bo ke sa loke Beibel ta bisa tokante esaki, lesa e artíkulo: “Dikon Kos Malu Ta Pasa ku Bon Hende?”

Kon nos por trata ku e situashonnan horibel ei?

•  “Tur loke a ser skirbí anteriormente a ser skirbí pa nos instrukshon, pa asina mediante . . . e konsuelo for di e Skritura nos por tin speransa.”—Romanonan 15:4.

Prinsipio di Beibel por yuda nos trata ku e violensia ku tin den mundu awe. Pa haña mas informashon, wak e revista Spièrta! na spañó ku tin e título: “Lo Yega un Fin na Violensia?”

Pa mira kon un mayor por yuda un yu trata ku mal notisia, lesa e artíkulo na spañó: “Kon Mal Notisia Ta Afektá Mucha?”

Lo yega un fin na violensia?

•  “E lo reskatá nan bida for di opreshon i violensia.”—Salmo 72:14.

•  “Nan lo bati nan spadanan traha plug ku nan, i nan lo bati nan lansanan traha skèr pa snui ku nan; nashon lo no lanta spada kontra nashon, i nunka mas nan lo no tren pa guera.”—Mikéas 4:3.

Dios sí por logra loke niun hende por logra. Su Reino, ku ta den shelu, lo eliminá tur arma i kaba ku violensia. Pa haña sa loke e Reino di Dios lo logra, lesa e artíkulo: “Bou di e Reino di Dios Lo ‘Tin Abundansia di Pas.’”