Dikon Hende No Ta Trata Otro na un Manera Desente Mas?—⁠Kiko Beibel Ta Bisa?

Kada dia tin ménos hende ta komportá nan mes na un manera desente. Pashènt ku tin mal manera ta grita dòkter; hende ku ta kome na restorant ta trata e waiternan sin rèspèt; algun pasahero for di kontrol riba avion ta ataká stewardess; mucha mala mucha ta hasi chèrchi di, menasá i ataká nan maestronan i algun polítiko ta hasi kos inapropiá i ofensivo miéntras ku otro polítiko ta purba di hala atenshon na kon desente nan ta.

Beibel ta un guia konfiabel ku ta yuda nos komprondé kiko trata hende na un manera desente ta nifiká. Ademas, e ta splika dikon asina tantu hende awe no ta trata otro na un manera desente.

Dikon hende no ta trata otro na un manera desente mas?

Rònt mundu awe tin kada bes ménos hende ku ta komportá nan mes na un manera desente, esta, ku ta sigui normanan moral i ku ta komportá nan mes na un manera ku ta bon i aseptabel.

• Un enkuesta ku un kompania konosí a hasi na Merka a mustra ku norma i balor di hende na Merka ta di mas abou ku el a yega di ta den e último 22 añanan.

• Un otro enkuesta a ser hasí ku mas ku 32.000 hende na 28 pais, 65 porshento di e hendenan ei a haña ku tin ménos hende awe ku ta komportá nan mes na un manera desente ku nunka promé.

Beibel a bisa ku hende lo komportá nan mes asina den nos tempu.

• “Den e último dianan lo bini tempunan krítiko, difísil pa trata kuné. Pasobra hende lo stima nan mes, stima plaka; nan lo ta bromadó, arogante, blasfemadó, desobediente na mayornan, malagradesí, . . . sin kariño, [i] feros.”—2 Timoteo 3:1-3.

Pa mas informashon tokante kon e profesia akí ta kumpli awe, lesa e artíkulo “Beibel A Bisa Kon Hende Lo Pensa i Aktua den Nos Tempu?”

Un guia konfiabel ku por yuda nos komprondé kiko komportá nos mes na un manera desente ta nifiká

Aunke nos ta biba den un mundu kaminda kada dia tin ménos hende ta komportá nan mes na un manera desente, tin miónes di hende ku a ripará ku Beibel por ta un bon guia pa yuda nan sa kiko ta bon komportashon. E guia ku Beibel ta duna relashoná ku loke ta bon i loke ta malu ta “konfiabel, awor i pa semper.” (Salmo 111:8) Wak algun ehèmpel:

• Loke Beibel ta bisa: “Tur loke boso ke pa hende hasi ku boso, boso tambe mester hasi ku nan.”—Mateo 7:12.

  Nifikashon: Nos mester trata hende na un manera amabel i ku rèspèt, meskos ku nos ke pa nan trata nos.

• Loke Beibel ta bisa: “Awor ku boso a pone gañamentu un banda, boso kada un papia bèrdat ku su próhimo.”—Efesionan 4:25.

  Nifikashon: Nos mester ta onesto den tur loke nos ta bisa i hasi.

Pa mas informashon tokante e tópiko akí, bo por lesa:

• E edishon di E Toren di Vigilansia ku tin e título “Bon i Malu—Un Guia Ku Bo Por Konfia.”

• E artíkulo “Kon Beibel Por Yuda Nos Tolerá Otro Hende?.”