SPLIKASHON DI TEKSTO DI BEIBEL
Yeremías 29:11—“Mi Sa e Plannan Ku Mi Tin pa Boso”
“‘Mi sa bon bon loke mi tin pensá pa boso,’ Yehovaa ta bisa, ‘mi ke pa boso tin pas, no kalamidat. Mi ke duna boso un futuro i un speransa.’”—Yeremías 29:11, Tradukshon di Mundu Nobo.
“‘Mi sa e plannan ku mi tin pa boso,’ SEÑOR ta deklará, ‘plannan pa pas i no pa kalamidat, pa duna boso un futuro i un speransa.’”—Yeremías 29:11, Beibel Santu.
Splikashon di Yeremías 29:11
Yehova Dios a primintí su sirbidónan ku lo e duna nan un futuro yen di pas. Aunke Dios a dirigí e palabranan ei na hende den pasado, te awe e ta pensa meskos. E ta “e Dios ku ta duna speransa.” (Romanonan 15:13) Bon mirá, el a sòru pa e promesanan ei ta den Beibel pa asina “nos por tin speransa” di un mihó futuro.—Romanonan 15:4.
Konteksto di Yeremías 29:11
E palabranan ei tabata parti di un karta dirigí na e israelitanan ku a ser hibá den eksilio for di Herúsalèm pa Babilonia.b (Yeremías 29:1) Den e karta ei, Dios a bisa nan ku nan lo keda hopi tempu na Babilonia i ku nan mester traha kas, planta hòfi, kasa i haña yu. (Yeremías 29:4-9) Pero Dios a agregá: “Despues ku setenta aña wòrdu kumplí pa Babilonia, lo mi bishitá boso i kumpli ku mi bon palabra pa ku boso, pa trese boso bèk na [Herúsalèm].” (Yeremías 29:10) Pues, Dios a sigurá nan ku lo e no lubidá nan i ku nan speransa di bolbe na Herúsalèm lo bira realidat.—Yeremías 31:16, 17.
Dios a kumpli ku su promesa. Manera el a profetisá, Rei Siro di Pèrsia a konkistá Babilonia. (Isaías 45:1, 2; Yeremías 51:30-32) Anto Rei Siro a permití e hudiunan bai nan pais bèk. Despues di 70 aña prezu, nan a bolbe Herúsalèm.—2 Krónikanan 36:20-23; Èsdras 3:1.
E echo ku Dios ku a kumpli ku e promesa na Yeremías 29:11 ta duna nos konfiansa den e otro promesanan ku Dios a hasi. Un di e promesanan ei ta ku lo tin pas mundial pa medio di e Reino di Dios bou di guia di Hesukristu.—Salmo 37:10, 11, 29; Isaías 55:11; Mateo 6:10.
Idea Robes Tokante Yeremías 29:11
Idea Robes: Dios tin un “plan” pa kada hende.
Echo: Dios ta laga kada ken disidí kiko nan ke hasi ku nan bida. Yehova a dirigí su palabranan di Yeremías 29:11 na e grupo di israelita den eksilio na Babilonia. E tabatin pensá di duna e grupo ei un futuro yen di pas. (Yeremías 29:4) Pero el a permití kada persona disidí pa su mes si e ke benefisiá di e promesa ei òf nò. (Deuteronomio 30:19, 20; Yeremías 29:32) E hendenan ku a disidí di buska Dios a hasi orashon na dje ku un kurason sinsero.—Yeremías 29:12, 13.
Lesa Yeremías kapítulo 29.
a Yehova ta e nòmber personal di Dios.—Salmo 83:18, NW.
b The Expositor’s Bible Commentary ta bisa tokante Yeremías 29:11: “Kasi bo no ta haña un promesa mas bunita den Beibel ku ta ekspresá Yahweh [Yehova] su tierno kompashon pa e eksiliadonan ei. E promesa ei por fin ta duna nan berdadero motibu pa ta optimista i pa karga speransa.”—Tomo 7, página 360.